Gihagit ni Duterte og pinusilay si Acierto

GIHAGIT ni Presidente Rodrigo Duterte og pinusilay si kanhi Police Sr. Supt. Eduardo Acierto kinsa mipasangil nga nahilambigit sa ilegal nga droga si kanhi Presidential Economic Adviser Michael Yang.

Miingon ang presidente nga dili angayng tuohan si Acierto tungod kay usa kini sa mga gidudahang ninja cop o polis nga nagrecycle sa mga nasakmit nga ilegal nga droga.

Kakonsabo sab ni Acierto ang usa pa ka polis nga si Ismael Fajardo kinsa giingon nga maoy responsable sa pag- frame up kang Marine Officer Ferdinand Marcelino nga nahimong PDEA agent.

Kahinumdoman nga nadakpan si Marcelino sa usa ka shabu laboratory sa Manila pero giabsuwelto sa korte ug karon nakabalik na sa serbisyo sa AFP.

Daan nang gipahayag ni Duterte nga si Acierto nalambigit sa pagkidnap ug pagpatay sa Koreano nga si Jee Ick Joo sa Camp Crame. Ug dugang niini, modus kuno sa grupo ni Acierto ang pagkidnap og langyawng mga negosyante aron makakuwarta.

Matingad-on nga gipangutana ni Duterte ang mga sundalo ug kapolisan kon ngano nga hangtod karon (sa pagsulat niini) buhi pa man si Acierto.

Gikataho nga nagtago-tago si Acierto sa dihang na- dismiss sa serbisyo apan mga pipila ka adlaw ang nanglabay mitumaw kini ug giamong sa operasyon sa ilegal nga droga ang suod nga higalang Insek ni Pres. Duterte nga si kanhi Presidential Economic Adviser Michael Yang ug ang lain pang Insek nga si Allan Lim.

Gawas pa niini, may report sab nga namaligya pa gyod og mga armas nga AK-47 si Acierto ngadto sa mga sakop sa New People’s Army (NPA).

Samtang ‘gibanatan’ ni Duterte si Acierto, gidayeg sab niya si Yang. Imposible kunong malambigit sa ginadiling droga si Yang tungod kay kanunay kining gikauban ni Chinese Premiere Li Keqiang.— TNB