Buwan Wika ng gilusad: KWF Suportado sa Siyudad sa Manila
USA ka talagsaong panagtapok ang flag raising ceremony sa Liwasang Bonifacio, atubangan sa Manila City Hall niadtong Lunes, Hulyo 29. Wala lang kini maglangkob sa pakigpulong ni Mayor Francisco “Isko Moreno” Dumagoso kondi sa pag-ila sa nagkalainlaing lokal nga dila sa Pilipinas isip sayo nga pag-abli sa Buwan ng Wika nga may temang: “Mga Katutubong Wika sa Pilipinas Tungo sa Pagbuo ng Pambansang Pagkakilanlan.”
Tibuok ang puwersa ang KWF (Komisyong sa Wikang Filipino) nga mitambong sa maong panagtigom. Gipangunahan kini sa ilang Head of Public Affairs and Information nga si Rene Napeñas ug sa tinahod nga Nasodnong Alagad sa Arte ug Tagsiya nga si Dr. Virgilio S. Almario.
Usa ka inspirasyon ang pakigpulong ni Dr. Almario tungod kay gitagad na man sa KWF ang pagpreserbar sa nagkalainlaing pinulongan sa nasod. Ang maong tahas ilang gipalig-on pinaagi sa pagpatukod og Bantayog-Wika sa nagkadaiyang parte sa nasod.
Ang Bantayog-Wika o monyumento usa ka art installation nga ginama sa asero diin dinhi gikulit ang mga pulong sa balak ni Bonifacio nga gihubad sa pinulongan sa matag dapit. Kinse ka monyumento na ang napatukod sa KWF. Makita kini sa Antique (Kinaray-a nga pinulongan), Ifugaw (Tuwali nga pinulongan), Mati City (Mandaya nga pinulongan), Kalinga (Kalinga nga pinulongan), Occidental Mindoro (Mangyan nga pinulongan),
Bukidnon (Binukid nga pinulongan), Batangas (Tagalog Batangas nga pinulongan), Bataan (Ayta Magbukon nga pinulongan), Surigaw del Sur (Surigawnon nga pinulongan), Baguio (Ibaloy nga pinulongan), Sorsogon (Bikol Sorsogon nga pinulongan), Batanes (Ivatan nga pinulongan), Pangasinan (Pangasinan nga pinulongan), General Santos City (B’laan nga pinulongan) ug Lake Sebu (T’boli nga pinulongan).
Gisuportahan pod kini ni Mayor Isko sa iyang pakigpulong: “Ang taong walang kasaysayan ay walang pinanggalingan.” Tataw sa bag-ong mayor ang iyang kasingkasing alang sa katitikan ug kasaysayan. Naa pay kausa nga nangayo siyag simpatiya kang Dr. Almario sa iyang kaluoy sa pipila ka kawani sa city hall nga napulo ka tuig na lang sa pagserbisyo apan wala gihapon mahatagig permanenteng posisyon. Igo lang mitando si Dr. Almario niadtong higayona ug didto nakita sa mata sa nasodnong alagad sa arte nga si Mayor Isko Moreno anaa dapig sa matinud-anong pagbati sa katawhan.
Wala pod magpaulahi ang bantogan nga boxing champ ug senador nga si Manny Pacquiao. Nagkaguliyang ang mga tawo sa dihang gipaila-ila na siya ni Mayor Isko. Gisaysay ni Pacman ang iyang pagpamaligyag buwak sa Manila nga pinalit pa niya sa Dangwa. Bisag nag-iningles ug nagtinagalog, klaro gihapon ang pagka Bisaya sa boksidor kay si Pacman, sa atong nahibal-an, taga General Santos City man.
Ingon ni Manny: “Mahirap talaga ‘yung leader na di nakaranas ng paghihirap. Iba kasi ‘yung alam ang problema at iba naman ‘yung hindi lang alam ‘yung problema kondi nararamdaman, nararanasan. Dahil hindi s’ya tatalikod doon sa pinanggalingan n’ya…” Mao kini ang paghulagyaw ni Pacman sa maayo nga lider.
Ang lumad nga mga pinulongan gikalisangan nga mawala. Nagkalisod tuod ang lumad nga mga pinulongan. Diyotay na lay mogamit kanila tungod sa globalisasyon. Nagtuo ang kadaghanan sa mga Pilipino nga ang pag-estoryag Iningles maoy mas makaayo sa panarbaho. Kining matang sa kalisod matandi ra pod nato sa kalisod sa pagpakabuhi nga maoy nasuwayan nila ni Mayor Isko ug Pacman. Kahayag ang gidala sa duha ka sikat ug pinalanggang politiko sa ilang pagsuporta sa Buwan ng Wika.
Malipayong buwan sa mga pinulonggan sa tibuok nasod nga Pilipinhon! —