kongkreto ug may tulay na ang kalsada paingon sa among dapit
Ug kamatuorang dili gayod namo ikalimod nga bisag kinsa pay kontratista, kaming mga mulupyo sa Dulian, Kanaokanao, Maramara ug ubang kasikbit nga mga barangay nangalipay kaayo nga kongkreto ug may tulay na ang kalsada paingon sa among dapit.
UNYA sa dako namong kahikurat— kaming tanan nakurat— dihang kalit nangabot ang bag-ong mga makinarya nga kusog miungad dili lang sa tiwasonong nagtalikod nga mga bungtod sa liko-likong kilid sa lawom mga lugot sa Brgy. Tusik nga wa maabot sa kontrata sa Osaka ug lakip na mismo ang libaongong kalsada nga milagbas sa among yuta sa Brgy. Dulian— bag-ong mga makinarya nga kaugalingon kuno sa among mayor sa lungsod, ambot kon tinuod ba kaha.
Pero ang amo lang gayong nasayran nga maoy tinuod nga nakapakurat kanamo nga ang bag-ong nakakuha sa gikinahanglang dakong trabaho mao ang HSO Construction ni Congressman Henry S. Oaminal. Busa kinsa ba lagiy di makurat. Maingon nga naunay man pagkuha sa amo mismong kongresista ang dakong project pagkongkreto sa national highway paingon sa bukid tadlas sa among dapit.
Ug labi na gayod kaming nakurat nga ang kinatibuk-ang trabaho pagkongkreto sa tibuok national highway gikan mismo didtos dapit diin natapos ang kontratas Osaka ug hangtod ngadto sa Josefina nga kasikbit nga lungsod sa Don Victoriano diin nagsukad usab ang kadungang bagat nga trabaho nga nasikop tanan sa HSO Construction.
Ingon sa dili katuohan apan mao gayoy tinuod. Kay ang nagdumala sa trabaho didtos Brgy. Betianan nga sakop sa lungsod sa Don Victoriano ug ingon man sa Dulian ug Kanaokanao sakop sa Bonifacio mga tawo gayod sa kongresman. Ang dakong kamatuoran mao ang anak mismo ni Kongresman, si Fernando nga ginatawag sa tanang trabahante nga Ando, didto kanunay sa maong mga dapit nagsusi o nagtan-aw sa dagan sa trabaho. Gani kining tagsulat duna may mga apo ug pag-umangkon nga nagtrabaho sa maong mga dapit. Gibagat ang pagtrabaho sa among national highway aron kuno dali mahuman nga gikalipay kaayo namong mga mulupyo sa Dulian ug mga kasikbit nga barangay.
Ang katingad-an lang kaayo lagi kay karon pa sukad mahitabo nga ang usa ka dako kaayong proyekto sa gobyerno-nasyonal giunay pagsikop sa kongresista sa kaugalingong dapit. Gani ang maong kontrata mokabat mag dul-ang traynta kilometro. Kay ang tibuok god national highway may gitas-ong 33.801 kilometro gikan sa Bonifacio hangtod sa Don Victoriano. Busa maingong dako, bulto kaayo ang kontratang nakuha sa HSO Construction, samtang ang nahaunang mga kontratista gihatagan ra mag ginagmay, may tagsa o duha lang ka kilometro. Sama sa Osaka nga maayo unta kaayog agi sa trabaho. Gani ang trabaho sa Osaka ingon sa maoy gihimong basehan sa gidak-on sa
gipadayong bag-ong trabaho lakip mismo ang estilo paghan-ay sa mga siding maong lapad kaayo tan-awon ang kalsada bisag 2-lane lang.
Pero hinuon didto sa records sa Department of Public Works and Highways, Misamis Occidental, 2nd District Engineering Office, Tangub City, wala makita nga ang HSO Construction maoy kontratista sa kinadak-ang bahin sa Bonifacio— Don Victoriano National Highway.
“Si Eric Lim maoy daghan dihag kontrata,” diretsong tubag sa among pakisayod kang kanhi Engr. Federico V. Padilla Jr. nga mao niadtoy tagdumala sa 2nd District Engineering Office sa Tangub City uban ni Engr. Reynaldo Z. Sagun. Si Engr. Padilla Jr. dugay na kaayong nag-alagad sa maong buhatan.
“Kapin na akong traynta ka tuig dinhi, gikan pa sa panahon ni Ponso,” maoy dugang niyang patin-aw nga ang gipasabot mao si kanhi Mayor Alfonso Tan sa Tangub City nga nahimo sab nga gobernador sa among lalawigan.
Sinati kaayo ni Engr. Padilla Jr. ang pamaaging gisunod sa ilang buhatan. Kon ang ipahigayong proyekto mokostar lag singkuwenta milyones paubos, ang ilang buhatan maoy magdumala sa ipahigayong bidding ug maoy mangunay pagdumala sa ipahigayong proyekto.
“Kon dako ang project ug mokostar og kaping singkuwenta milyones, ang bidding adto na himoa sa regional office sa Cagayan de Oro,” maoy iyang patin-aw.
Busa dili tuod angay katingad-an kon nganong wala sa records sa ilang buhatan ang HSO Construction nga maoy nagtrabaho sa kinadakang bahin sa among national highway nga may dako kaayong budget gikan sa Brgy. Tusik sa among lungsod hangtod ngadto sa lungsod sa Josefina diin usab naggikan ang gipahigayong bagat nga trabaho.
Gani ang bahin lang sa kalsadang nagsukad sa Upper Dulian paingon sa Brgy. Kanaokanao mikostar mag- two hundred seventeen million sumala pa kang Congressman Oaminal sa iyang pagtambong sa dakong piging nga gipahigayon sa Tangub City.
“The construction of Dulian-Kanaokanao road is already ready with a total budget of two hundred seventeen million,” maoy iyang pagpasigarbo nga nakalipay kaayo namong tanang mulupyo. Matapos na man gayod sa hingpit ang among kalbaryo sa dul-ang usa ka kilometrong tungason kaayong bahin sa Kanaokanao diin kinahanglan manaog sa sakyang motor sa among pagtungas ug paglugsong kay peligro kaayong malimbuwad ang sakyanang duha ray ligid. Labihang kutasa man gayod sa pagtungas ilabi na kon magdali aron dili hiabtan sa nagsingabot nga ulan.
Samtang ang trabaho sa kalsada gikan sa Kanaokanao hangtod sa Maramara gidumala sa Mindanao Rock sumalas makita sa billboard.
Kining maong isyu bahin sa kontratista ug kon kinsay nagtrabaho dili na unta namo angayng tukion. Kay sa kamatuoran lagi, nalipay kaayo kami nga nahimo na gayod ang pinangandoy namong national highway nga milagbas sa taliwalang bahin sa among mga yuta sa Brgy. Dulian maong dako kaayog naiban kay lapad.
Ugaling lang kay ang kongretong karsada nangliki dayon dangtan lag pipila ka adlaw human sa pagtrabaho bisag wala pa hiagiig mga tawo.
Maoy hinungdan nga giinspeksiyon sa mga kawani sa DPWH nga namangag gayod sa daghang dapit aron kaha pagsusi nganong nangliki dayon ang daghang bahin sa bag-o lang nahuman pagkongkreto nga kalsada bisan wala pa lagi hiagiig mga tawo ug sakyanan.
Dili gayod namo kalikayan nga batiog kasubo ug kabalaka nga basig sulod lang sa pipila ka tuig magusbat na ang kongkreto namong kalsada. Maayo untag mahimo gayong pulido ang among national highway nga motunhay gayod og daghang katuigan nga nindot namong agian.
Gani, si Gobernador Herminia Ramero nanaad nga iyang ipasusi ang tanang bahin nga nasakop sa pagtrabaho sa HSO Construction kon nganong nangliki bisag wa pa hiagiig mga tawo ug sakyanan ang nakongkretong kalsada. Ambot kon unsay mahimong sangpotanan sa gipahimong inspeksiyon sa buotan namong gobernador.
Hinuon, dili man gayod mahinungdanon kaayo alang kanamo kon kinsa ang mga kontratistang nagtrabaho sa among national highway. Ang kamatuoran nga kaming tanang mulupyo sa Dulian, Kanaokanaon, Maramara ug kanait nga mga barangay sama sa Siboyon, Bag-ong Anonang ug Migsali nga nia na sab mag-agian sa among national highway, nangalipay kaayo nga ang pinangandoyng dako nga kalsada sa tibuok namong kinabuhi natuman ra gayod sa kadugayan.
Ang kamatuoran dili namo ikasalikway— nga karong mga adlawa natapos na ang among kalbaryo sa pait kaayo namong pagbaklay sa lisod kaayo kaniadtong dalan nga among giantos sa daghang katuigan.
Ug kamatuorang dili gayod namo ikalimod nga bisag kinsa pay kontratista, kaming mga mulupyo sa Dulian, Kanaokanao, Maramara ug ubang kasikbit nga mga barangay nangalipay kaayo nga kongkreto ug may tulay na ang kalsada paingon sa among dapit.
(KATAPOSAN)