ANG BRUNO PASCUALA SUICO GRAND REUNION
SABADO sa kadlawon, Mayo 25, 2019. Kining tagsulat uban kang Mario, ang drayber, mingtagbo sa mga delegado sa pier 4 nga gikan sa Hilongos, Leyte sakay sa Roble Shipping Lines ug among gihatod sa among pinuy-anan sa Mantuyong, Dakbayan sa Mandaue. Gidalit dayon ang painit sa among pag-abot.
Pasado alas otso human sa among pamahaw, didto na usab kami sa erport nagpaabot sa katunga sa mga delegado nga nanukad sa Dakbayan sa Tagum, Davao del Norte kay ang laing katunga niini nagtraking man via Leyte-Cebu. Ila usab gihapit ang ilang mga ig-agaw ug pag-umangkon nga gikan sa Isla sa Dawahon, sakop sa lungsod sa Bato, Leyte nga nagdalag seafood sama sa saang, takubo, sunlotan, nukos, kugita, tihitihi ug guso nga ilang dugang tampo sa paniudto sa pagka ingon ugma.
Naghimamatay, nag-ilhanay, nagpangomostahay ang pundok sa taga Baas, sa Hilongos, Leyte ug ang pundok usab sa taga Tagum City sa among pag-abot sa balay. Mga bata, kaulitawhan ug kadalagahan nag-iyahayg punit-halok sa mga kamot sa mga edaran. Ang ubang mga babayeng hamtong nagbeso-beso nga pulos nagangisi sa ilang paghangopay niining una ug halandomong panagkita.
Human sa paniudto, gihatod sa drayber ang taga Tagum sa Cityscape Hotel sa may Mabolo, Cebu City. Si Rey Suico usab nga akong pag-umangkon sa pag-agawan sa Opao, Mandaue nga dunay serbes nga sakyanan maoy mitukboy sa iyang mga iyaan ug uyoan ug mga pag-umangkon sa Baas ngadto sa Horizons 101 Hotel sa Cebu City. Pulos sila tagduha ka adlaw ug duha kagabii sa hotel kay
mobisita pa man sila sa Birhen sa Simala.
Domingo sa buntag, gisugdan ang pagpangtala sa mga delegado. Didto kini ipahigayon gym sa Saint Louis College-Cebu sa may Sudlon, Maguikay, Dakbayan sa Mandaue.
Si Josephus “Tonypete” Alejandrino, akong pursusong pagumangkon, maoy HR sa maong tunghaan ug maoy among presidente sa Bruno-Pascuala Suico Grand Reunion karong tuiga— 2019.
Si Padre Noel S. Tatoy, akong apo sa pag-agawan maoy mipahigayon og misa sa kasaulogan. Sa iyang homily, gisilsil sa matag usa ang panaghiusa, mag-uliay ug magpasayloay sa usag usa ug ipatigbabaw ang maayong kabubut-on ug maayong relasyon. Gipahinumdom ni Padre Tatoy ang tema sa 2017 nga reyunyon didto sa Bato, Leyte: One Mind, One Heart and One Root.
Gidalit dayon ang esnak sa buntag. Mga delicacy nga gikan
sa Hilongos ug Bato sama sa cassava roll, muron, magsaysay ug sinaging. Sa hapon, bibingka ug masareal sa taga Mandaue.
Wala damha, may duha ka sakyanan nangabot ug nanggawas ang mga sakay sa sakyanan. Walay nagtuo nga sila mga kaliwat ra kay wala man mag-uniporme. Ang taga Sogod, Cebu diay.
Sila si Lucita ug Glice maoy among gikaestorya kay kami nangita sa kabanay ni Balbino. Si Lucita anak ni Balbino ug si Glice apo na ni Balbino. Si Balbino apo ni Vicenta ug igsoon sa among apohan— si Bruno Suico.
Amo silang giabiabi ug gipalingkod. Nagdala silag letson nga kagumkom pa kaayo. Wala madugay, giputol ang programa ug maoy gisunod ang paniudto pinaagi sa maabtikong serbisyo sa katerer nga taga Carmen, Cebu. Ang nahuman og kaon didto mopaingon sa photo booth nagpapiktyur-piktyur nga walay bayad. Libre ang tanan sa buot magpakuhag hulagway nga way limit.
Gihimo gilayon ang panag-ilhanay pinaagi sa pagpaila sa matag pamilya. Maoy giuna ang taga Sogod, Cebu ug si Glice Conde maoy mipaila sa iyang mga kuyog.
Tapos sa pag-ilhanay sa tanan nga mga pamilya ug kabanay, gipaila usab ni Lamberto N. Marababol, akong ig-agawg tagurha si Hon. Diosdado P. Suico, ang tagtukod sa dakong Suico Clan sa Mandaue. Si Daddy kanhi konsehal sa Dakbayan sa Mandaue.
Sa tuig 2014 nakatambong kaming pipila ka pamilya sa Mandaue ug sa Bato sa dakong reyunyon nga gipangulohan ni Daddy Suico. Karong ulahi sa 2018 didto sa GenSan, Cotabato City ang reyunyon. “Awhagon ko ug akong dasigon kamo nga mga Suico sa Leyte ug Davao sa pag-apil niining atong Suico Clan. Basta Suico, apil ka!”
Apan lahi man god kining amoa nga Suico Clan kay ang makaapil kadto lamang lehitimo nga nasubay sa gigikanang kaliwat o kabanay.
Ang pagpresentar o pagpaila sa family tree gitugyan ning tagsulat kay mao may naninguha nga mapalgan ug makit-an ang uban pang kabanay nga nahilubong na lang sa kalimot. Hunahunaa lang, tingalig mga pito ngadto sa walo ka dekada ang nakalabay mao pay among pagkasayod nga sila ug kami, sa tinuoray lang, mga mag-agaw diay. Ang among apohan nga si Bruno Suico igsoon usab diay sa ilang apohan nga sila si Macario, Eduarda, Vicenta ug Eduardo.
Nag-inilhanay man tuod kami nga mga paryente apan wa namo matugkad ang matuod gayod nga relasyon ug kagikan. Maoy pagaingnon nga nagpunay mig kaon og pan apan wa mi masayod sa ngalan sa pan nga among gikaon!
Unya usa ka proposal ang gipadayag ni Pres. Josephus Alejandrino sa pagbalhin sa Bruno-Pascuala Suico Lineage ngadto sa Felix-Graciana Suico Lineage.
Pinaagi sa gihimong konsensos, ang tanan way misupak sa pagbalhin sa ngalan ngadto sa Felix-Graciana Suico nga maoy tinubdan sa among kaliwat ug mao nay opisyal nga gamiton matag duha ka tuig nga magpundok ang mga Suico sa Leyte, Cebu ug Davao.
Ang gidalit nga sayaw sa usa ka bata maoy gikahimut-an sa tanan. Si Lilyana, 8 anyos nga anak ni Teody og Jalyn sa Tagum City mipakita sa iyang kahanas mosayaw nga tukma gayod sa tokar nga way kalainan sa atong makita sa telebisyon.
Samtang nagpadayon ang sayaw, may gipangtunol nga ref magnet nga may dagway sa bag-ong logo sa Suico Clan. (Si Tonypete ang nangunayg buhat sa logo.)
Unya gisundan dayon kini sa video message. Unang nakita sa screen ang dalagang maanyag nga si Monalisa “Monmon” Alejandrino, chiefmate sa barkong Hoegh Masan. Dako niyang kalipay ang panagtapok sa mga kabanay nga Suico. Nangandoy siyang makaapil pod puhon sa reyunyon aron iyang ikaila ang ubang mga paryente nga wala pa niya ikahimamat.
Misunod si Ramil Alejandrino, nars ug maguwang ni Monmon nga nagpuyo sa Paramaribo Suriname sa South America. Sa likod sa eskrin ang iyang asawa usab ug ang bata nga iyang gikugos maoy una nilang liwat— si Yves Niño. Si Ramil anak nilang Ramon ug Liza Alejandrino.
Ang mga batang magsoon, Elijah (magulang) ug Ethan (manghod), mingpabati usab sa ilang mga mensahe atol sa
kasaulogan sa Suico Clan. Ang mapinanggaong mga ginikanan mao sila si Anna Margarita S. Mulder og Duane Mulder nagpuyo sa 2274 Aspen Drive Fayetteville, Arkansas, USA. Si Elijah ug Ethan mga apo nilang Estong ug Apec Suico.
May mga kalingawan ug mga dula nga gipasiugdahan sa magdudumala sa tulumanon nga si Ma. Theresa S. Alejandrino, kapikas ni Tonypete ug magtutudlo sa Sacred Heart School Ateneo de Cebu sa Canduman, Dakbayan sa Mandaue.
Misalga ug nanalmot ang hapit ang tanang batan-on ug wala magpaulahi ang mga hamtong sa makalingaw ug makapahimuot nga bato-bato pick, knee trembler, nose dive, tumblers up, separation anxiety, hula hoop relay ug cotton relay.
Ang raffle draw maoy gisunod ug daghan ang nakadawat og mga premyong mahalon, mga butang nga magamit ug kapahimuslan sa panimalay.
Gihimo gilayon ang pag- turnover sa logo. Si Josephus Alejandrino mitunol sa logo ngadto kang Teody S. Salon ug naglamanohay ang mag-agaw. Sa tuig 2021, adto na usab sa Dakbayan sa Tagum ang dakong katigoman sa Suico Clan ubos na sa ngalan: Felix-Graciana Suico Lineage-Grand Reunion.
Ang panapos nga pakigpulong ni Padre Noel nagkanayon: “Itunol ko ang dako kong pasalamat ngadto sa nag- host, pinangulohan ni Tonypete Alejandrino kauban ang mga pamilya nga ming-ayuda kaniya aron ilang ikapakita nga sila nagmalamposon sa ilang mga paningkamot. Dili ko gayod hikalimtan ug angay gayod nato nga pasalamatan si Tiyo Atong Pono sa iyang pagpanukiduki aron lang iyang makaplagan ang mga kabanay nato nga nia na uban kanato karon. Salamat sa Suico Clan. Ug labaw sa tanan, kamo nga nia karon naghago ug naghatag og panahon pagtambong ning makahuloganong okasyon, daghan salamat kaninyo!”
Mga delegadong nanambong gikan sa Tagum City, Lydia S. Salon (tagtukod ug pinanser sa Suico Clan); Elma S. Perandos, Demetrio A. Perandos Jr., Thea ug Elijah Perandos, Teody S. Salon, John Enzo T. Salon, Lilyana T. Salon, Lloyd Vincent S. Buagas, Jade Chloe S. Buagas (bag-ong nakapasar pagka CPA) ug Carlo S. Buagas;
Teresita S. Postrano, Francisca S. Salmasan, Ma. Grace Suico, Victoria P. Piloton, Norman S. Pacumios, Niel Ian Pacumios, Niña Bliss L. Pacumios, Domnino R. Suico, Daniel L. Suico. Tita A. Suico (PSK, bag-o lang namatay), Maximar Suico, Marivic Suico, Martin Suico, Jessie Max Suico, Teotima S. Obelle ug Ritchie S. Obelle;
Glafica Suico, Fe Merlyn S. Mercader, Bebe Ken Suico, Siu Keiffer Suico, Luisa Faye Suico, Padre Noel S. Tatoy, Wulfilda S. Tatoy, sa Bato, Leyte; Ma. Elena T. Alias ug Bea Teresa T. Alias sa Hindang, Leyte; Allan Suico, Estela Suico ug John Seth Suico, sa Lapulapu City; Susana Senita, Teodora Senita, Raffy Senita, Danilo Suico, Celsa Suico ug Celia S. Amorin sa Isla sa Dawahon;
Melba Antolin, James Antolin, James William Antolin, Joana Antolin, Narcissa A. Montecillo, Lucita Dutosme, Belen A. Ortiz, Rey Ortiz, Eloise Ortiz, Christine Ortiz, Glice A. Conde, Beverly A. Suico, Aloha C. Bonuso sa Sogod, Cebu;
Avelino O. Suico, Ana Sabucido, Marilyn Roma, Cocoy S. Roma, Marieta Luzares, Adelina V. Suico, Gio Anthony Sabucido, Girlie S. Sabucido, Vhone Andrei Ceniza, Tomas S. Remedio, Geneva M. Oracion, Ma. Griselda Oracion, Teofilo C. Remedios, Democrita V. Remedios, Dominic V. Remedios, sa Baas, Hilongos, Leyte;
Rugen Suico, Angel Bert Suico, Christian Suico, Angela Suico, Baby Girl Suico, Jullet Mae Suico, Melemuel Suico, Julito Alilin, Remegio Suico Jr., Teresa Suico, Gerlyn B. Suico, Jhon Vincent Suico, Mark Joseph Suico, Mark Lest Suico, Andrea Suico, Andrean Suico, Angelica Suico, Andrenalyn Suico, Ricardo Suico, Farah Jhen Suico, Yuri Mae Suico, Yumi Jhanela Suico, sa Opao, Mandaue (kagikan sa Baas, Hilongos, Leyte);
Marife S. Sanchez, Christian N. Sanchez, Kathleen Suico, Mary Iris Mariaca, Thelma Juera, Chessny Juera, Louie J. Fernandez, Josephine Fernandez, Cristina Mariaca, Regine Mae Mariaca, Ma. Theresa Montebon, sa Hipodromo, Cebu City;
Diosdado P. Suico, Lamberto N. Marababol, Antonio S. Alejandrino, Delia S. Alejandrino, Josephus S. Alejandrino, Ma. Theresa R. Alejandrino, Salvi Andrea Alejandrino, Ricci Luke Alejandrino, James Daniel Alejandrino, Zeporah A. Bascon, Ramon S. Alejandrino, Elisa D. Alejandrino ug Zaire Docena;
Renato Pono Jr., Ailee A. Pono, Rogelio S. Pono, Zildian Pono, Reina P. Rosario, Renato S. Pono Sr., Nunila R. Pono, Peachie P. Bondoc, Roberto Bondoc Jr., Katrina Alice Bondoc, Keira Amber Bondoc, Ruben Soco, Susana P. Soco, Ruby Ana Soco, Andrei Pono, Rizza P. Ramos, Romel P. Ramos, Romel James P. Ramos, Reiand Jiel P. Ramos ug Rene Adrian P. Ramos, sa Dakbayan sa Mandaue.
(KATAPOSAN)