( ANG INYONG KAPALARAN SA AGOSTO 15 – 31, 2019)
PISCES – (Pebrero 20 – Marso 20) – Makalingaw ang imong pasiaw sa grupo. Mabalik ang imong pagka seryoso sa paghisgot sa mga hinungdanong isyu. Ituboy kang lider sa giapilan mong kapunongan. Di mapiog ang imong baroganan. Matagbawon ang romansa. Sabado ang suwerte mong adlaw ug 2, 9, 4 ang palaran mong numero.
ARIES – (Marso 21 – Abril 20) – Niining mga semanaha magmapuslanon ang gigamit mong bagong pamaagi sa panguma. Daghan ang moawat sa imong diskarte. Magmalamposon ang imong mga anak sa ilang pag-eskuyla. Magpasalamat kas Kahitas-an. Mainit ang romansa. Suwerte mong adlaw ang Huybes ug palaran mong numero ang 5, 6, 7.
TAURUS – (Abril 21 – Mayo 21) – Modaghan ang abot sa imong umahan. Mohatag kag donasyon sa simbahan. Mogahin kag panahon nga makatambong sa ipahigayong prayer meeting. Usbon na ang dagan sa imong kinabuhi. Magtarong ka na. Maanod kas agni sa kidhat. Domingo ang suwerte mong adlaw ug 4, 3, 2 ang palaran mong numero.
GEMINI – (Mayo 22 – Hunyo 21) – Niining mga semanaha daghan ang makamatikod sa imong pagpanghindik. Di mo damhon nga moduaw ang kanhi mong gihalaran. Mabanhaw ang pagbating nag-uros-uros sa imong kahiladman. Mopalabtik kag mga pulong nga mopukaw sa pagbati. Suwerte mong adlaw ang Lunes ug palaran mong numero ang 8, 2, 9.
CANCER – (Hunyo 22 – Hulyo 22) – Mamatikdan mo ang lahing taras sa imong igsoon. Hatagan mo kinig atensiyon kay basig maulahi sa pag-atubang sa kamatuoran. Ayaw pasagdi ang imong igsoon nga magumon sa bisyo. Malukmay ka sa mainitong mga parayeg. Biyernes ang suwerte mong adlaw ug 6, 7, 3 ang palaran mong numero.
CAPRICORN – (Disyembre 22 – Enero 21) – Dakog ikatabang ang bag-o mong ekstrang trabaho sa pagsulbad sa problemang pinansiyal. Mahimong hanas ka na human sa dupot mong pagbansay. Di ka angayng mag-usik og panahon. Makigdungan ka pagtungas sa pungkay sa himaya. Sabado ang suwerte mong adlaw ug 4, 7, 9 ang palaran mong numero.
LEO – (Hulyo 23 – Agosto 23) – Niining mga semanaha sangonan kag dugang responsabilidad. Di ka angayng mobalibad kay madugangan ang imong kahibalo. Ma- promote ka basta nuntan nimo sa kakugi sa pagtuman sa imong katungdanan. Katagbaw human mosilaob ang kahidlaw. Suwerte mong adlaw ang Domingo ug palaran mong numero ang 2, 7, 8.
VIRGO – (Agosto 24 – Septiyembre 23) – Mosakdap sa imong kaisipan ang masadyaong nangagi. Mobalik ang kadasig sa imong kalawasan. Abtik kang manglihok-lihok. Mohatag kag pakigpulong nga mosangpot sa inspirasyon sa kabatan-onan. Makapahiyom ka human sa pakighilawas. Martes ang suwerte mong adlaw ug 5, 4, 3 ang palaran mong numero.
LIBRA – (Septiyembre 24 – Oktubre 23) – Niining mga semanaha makahagdaw kag mapuslanong taho nga magamit mo sa imong pagpanukiduki. Di ka angayng mokompiyansa sa suod mong higala kay basig masulod ka sa iyang laang. Pagmatngon kanunay. Dugosnon ang romansa. Suwerte mong adlaw ang Miyerkoles ug palaran mong numero ang 9, 1, 6.
SAGITTARIUS – (Nobiyembre 23 – Disyembre 21) – Niining mga semanaha mokusog ang halin sa imong tinda. Angay dugangan mo pa ang imong puhunan aron makalahutay ka sa kompetensiya. Hatagig maayong serbisyo ang imong mga kostumer. Makasinati kag di makalimtang kalalim. Suwerte mong adlaw ang Lunes ug palaran mong numero ang 8, 6, 2.
SCORPIO – (Oktubre 24 – Nobiyembre 22) – Makahatag kag tabang sa imong igsoon pinaagi sa pagtambag kaniya. Pahimangnoan mo siya kanunay aron di mahitumpawak sa kaalaotan. Agnihon mo siya nga mosimba na matag Domingo. Mogamit kag baryasyon alang sa katagbawan. Huybes ang suwerte mong adlaw ug 7, 3, 5 ang palaran mong numero.
AQUARIUS – (Enero 22 – Pebrero 19) – Niining semanaha makadiskobre kag sekreto nga makahatag og solusyon sa giatubang mong problema. Hatagan mo nag panahon ang imong kaugalingon nga mahiduol sa Ginoo. Mag-ampo ka na kanunay. Kusog ang imong sex appeal. Suwerte mong adlaw ang Biyernes ug palaran mong numero ang 1, 8, 3.