Ang Bituon sa Sidlakan sa Bisayas
MATAG adlaw na lang gyod mapupos ang tsok sa akong blakbord tungod aning pauso sa mga estudyante karon nga hugot lines. Usahay mahimuot na lang ko inigbasa sa blakbord og mga linyang “kumain ka ng saging para ikaw ay maging akin” nga ila pod kunohayng gipahaom sa tema sa Nutrition Month.
Dili na gayod ikalimod ang kausaban sa kabatan-onan karon. Sagad, gugma o maoy ang giatiman! Pipila na lamang ang nagdiniyos pagtuon aron maiwagan ang kaugmaon.
Sa akong bahin, sagad sa mga tinun-an nga akong gialagaran, nahipnotismo sa gilak sa mga urog nga ilang nakita sa social media. Dili ko sab mabasol ang maong kabagohan. Dili ba, mao man kini ang atong mga pangindahay sa atong kagahapon, ang de kalibre nga kaugmaon sa umaabot nga henerasyon pinaagi sa teknolohiya? Apan, hinaot nga ang teknolohiya dili mamahimong tinubdan sa mga kapakyasan sa atong tumong aron makat-on.
Anaay usa ka estudyante sa Tacloban City nga mipakita sa kaayohan sa teknolohiya sa iyang pagsabot sa kalibotan. Si Hillary Andales migamit og teknolohiya sa iyang pagkomunikar sa labing lunsay nga paagi sa theory of relativity ug sa equivalence reference frames. Su’d sa tulo ka minuto nga bidyo naesplikar niya sa kinasimplehan nga paagi ang komplikadong mga konsepto. Migamit siyag animations aron ikapatuhop sa utok sa audience ang iyang gustong ipasabot.
Sa edad nga diseotso, nadughit ni Hillary ang matamis nga bunga sa gugma sa siyensiya sa ikaduha niyang pagsalmot sa Breakthrough Junior Challenge niadtong tuig 2017. Ang Breakthrough Junior Challenge usa ka tinuig nga kompetisyon alang sa mga estudyante sa tibuok kalibotan. Tumong sa maong kompetisyon ang pagdasig sa mamugnaong hunahuna sa mga batan-on kabahin sa siyensiya. Sa maong tigi, gitahasan ang mga mingsalmot sa pagmugna og orihinal nga bidyo nga maghatag og kinabuhi sa mga teyorya sa life sciences, physics o mathematics. Gihukman ang ilang mga entry pinaagi sa pagsusi sa abilidad sa tinun-an kon giunsa nila pagkomunikar ang mga lisod nga siyentipikong alinghuna sa makabigon, makadan-ag ug mamugnaon nga paagi.
Wala matawo si Hillary sa bulawan nga kutsara. Sama usab siya sa uban nga gipaningkamotan sa mga ginikanan aron makaeskuyla. Gipangandoy niya nga mamahimong astronaut tungod sa iyang interes sa astronomy. Sa dihang 10 anyos pa siya, giila-ila na niya ang physics pinaagi sa iyang amahan nga usa ka chemist. Gisuginlan na siya sa iyang amahan kabahin sa quantum mechanics ug theory of relativity. Apan sa tuig 2016 lang niya kini giseryoso og sabot.
Dili pod katiaw-tiawan ang mga unos nga ming-agi sa iyang kinabuhi. Sama na lamang sa mapang-iton nga paglampurnas sa bagyong Yolanda sa ilang lungsod. Nasaksihan niya ang mga paglubid sa supertyphoon sa kakahoyan o bisan unsang butang nga maagian niini. Ang makahahadlok nga pagpakiay ni Yolanda sa tubig nakakalas og liboan ka kinabuhi. Tungod