Pasiplat sa Bandang The Frabs

DAAN nang gipanagna sa mga ekspertong tigpaniid sa lokal nga kisaw sa musika nga kon motuasik man ang di kapugngang Bisrock explosion gikan sa Sugbo, posible ug seguradong adto kini sunod nga mobuto sa Lalawigan sa Bohol. Kini gumikan kay labihang duola ra man gyod ining duha ka managsilingang probinsiya.

Ug miabot ang panahon nga nagnuod gyod ang maong panagna. Labihan kaaktibo ang kisaw karon sa local music scene sa Bohol. Daw nagbaga nga lava sa mibutong bulkan ang kainit sa paghangop karon didto sa mga batan-ong musikero pagmugna og kaugalingong komposisyon nga Binisayang mga awit. Nunot niini, nag-iyahay pagsulpot ang daghang banda nga migakos paggamit sa kaugalingong dila diha sa tinagik nga mga awit. Ug ang luhag nga kisaw sa musika wa lang maggimok sa sentrong Dakbayan sa Tagbilaran, kondili, hangtod na ngadto sa kalungsoran. Gani, nanuybo man karon didto daw mga uhong ang daghang music bars nga maoy pasilonganan karon sa mga bandang lokal partikular sa mga lugsod sa Tubigon, Clarin, Buenavista, Getafe, Talibon, Ubay, Jagna ug daghan pa.

Usa sa aktibo kaayong banda karon didto sa Bohol mao ang The Frabs. Tulo pa lang ka tuig sukad sila naporma nga nagsugod niadtong Marso 2016. Ang ngalan nga “FRABS” acronym kun resulta sa gisipong nga pangalan sa mga band members nga F- Fernan, RRienon / Ronald / Ronel, A- Aldrich / Angie, B- Barry ug SSamkent. Gipili nila ning maong ngalan sa banda nga The Frabs kay gawas nga unique ug catchy paminawon, wala kiniy kaparehas bisan pag i-Google. Unya mas dali ra usab nga i- search sa YouTube kay nag-inusara man lang nga band name, komparar sa ubang banda nga d dugay maukay k ug makalibog, k lib usahay h tungod d sa kd kadaghang h kaparehag ngalan diha sa lokal ug international entertainment industry. Pormal nga gitibuok ang The Frabs nilang Rienon Jamisola Añora ( vocals), Angie Petecio Añora ( female vox) Don Aldrich Panio ( bass guitar), Ronald Torrejos ( rhythm guitar), Fernan Gab Jumamoy ( lead guitar), Samkent Eroy ( keyboards) ug Barry Cenabre ( drums). Pipila sa natokaran na nilang music bars ug restaurant mao ang Al Fresco Pizza House, Viajedor Dock & Dine (Getafe), Tambayan Sa Lacion (Consolacion, Cebu), Safety Stop Restobar (Clarin) ug Chel Ann’s Restaurant (Talibon). Ug ang dagkong concert events nga ilang naapilan pagtokar mao kadtong Unity Jam For Naga (Inabanga), Panagtapok sa Sandugo 2017 (Dakbayan sa Tagbilaran), Brod Riders Night (Clarin Fiesta), La Esperanza Concert For A Cause ug ang tinuig nga Dait Music Festival (Dait Norte, Buenavista).

Alternative rock ang tiradang genre sa The Frabs. Pero dili layo ang posibilidad nga mo- evolve ni sila ngadto sa reggae, folk ug classic rock gumikan kay ang ilang band leader ug founding member nga si Rienon usa man ka innovative artist nga misanong sa hagit nga makamugna og something different sa lokal nga industriya sa musika. Sa laktod, usa lang si Rienon sa matawag natong tinuod gyod nga sundalo sa arte. Kay gawas nga usa siya ka singer-songwriter, usa usab siya ka inila ug notadong visual artist sa Bohol. Ang female vox nga si Angie kapikas sa kinabuhi ni Rienon ug silang duha parehog propesyon isip sakop sa PNP kun Philippine National Police nga nadestino sa lalawigan sa Bohol.

Abril 2016. Unang nakita ang The Frabs nga mi- perform atubangan sa publiko dihang gidapit sila nga patugtogon sulod sa mahalong kananan didto sa dakong lungsod sa Talibon, Bohol. Atol kadto nga ang okasyon usa ka farewell party sa miretirong Bol-anong huwes gikan sa usa ka regional trial court. Giangkon sa bokalistang si Rienon nga dili sayon alang kanilang kuyabog pang banda nga motokar atubangan sa nagkalainlaing inila ug notableng mga personalidad. Gani, nasinati kuno nila ang gamayng pagpangurog samtang nagtokar apan ila rang napilde sa kaulahian ang kabakikaw ug pabutok-butok sa dughan. Milanat ang usa ka tuig nilang pagpanokar sa daghang gigs, sing-al sa nagkadaiyang cover songs dihang nakadesisyon sila nga mosugod pagtugtog og kaugalingong komposisyon.

Tuod man, ang kantang gitaytolan nilag “Inday” mao ang unang hit single sa The Frabs nga gitagik ni Rienon. Ang “Inday” usa ka Bisaya pop rock song kansang lyrics nagsugilon sa usa ka probinsiyanong estudyante nga nagtungha sa Tagbilaran nga hilom nga mibati og gugma sa usa sab ka estudyanteng maanyag nga taga dakbayan. Ang maong awit nag-abli kanilag dalan nga makalabang gikan sa Bohol paingon sa Sugbo dihang ilang gisalmot ang maong komposisyon sa Bisrock Songwriting Contest 2018 nga gipasiugdahan kanunay sa Lemmonhead Publishing. Ug tuod man, ang ilang pagsalmot sa BSC 2018 nahimo nilang tikanganan nga mailhan sa Bisrock community dihang ang “Inday” nakasulod sa Top 10 gikan sa 42 finalists nga hinagpat nang daan sa sobra 300 ka song entries. Pero bisag wa nila malangkat ang titulong grand champion atol sa BSC 2018 Finals Night nga gipahigayon didto sa Tambayan sa Lacion (Consolacion, Cebu) niadtong Enero ning tuiga, pero kadto na ang naghatag kanilag dakong kahigayonan nga marekord ang ilang komposisyon sa Lemmonhead Records ug maoy nahimo nilang pasaporte aron mahimong contract artist sa Lemmonhead Publishing.

Isip nakapasilong na sa Lemmonhead Publishing, ang ilang first recorded song “Inday” madungog na karon nga kanunay gipatokar sa nagkadaiyang FM stations sa Kabisay-an ug Mindanao. Nakahimo na usab silag live performances sulod sa pipila ka nanag-unang FM stations sama sa M.O.R 97.1 FM sa ABS-CBN sa Sugbo. Ang ingong kalamboan sa music career sa The Frabs nakatabang kanilag dako aron makakulit og kaugalingong tatak aron dali rang mailado isip bag-ong sulbong nga bandang Bisrock diha sa mga local music fanatics. Ug dili kay kana ra…

Gumikan sa first hit single nilang “Inday”, ang vocalist-composer sa bandang The Frabs nga si Rienon Jamisola Añora usa na karon ka mapagarbohong membro sa prestihiyosong FILSCAP kun Filipino Society of Composers, Authors and Publishers. Ang FILSCAP gipangulohan karon sa banggiitang music artist nga si Rico Blanco. Sa pagkatinuod lang, sulod sa taudtaod nang pagsulbong sa local music scene sa Kabisay-an ug Mindanao nunot sa daghang banda ug musikero nga nanggimaw apan wala ra tingali kaabot sa singko porsento (5%) ang nahimong membro sa FILSCAP. Mao niy nakabentaha sa mga artist nga nasulod sa Lemmonhead Publishing kay trabahoon man dayon sa managing publisher nga si Mr. Nhash Maquiling nga mapamembro sa maong prestihiyosong pundok ang mga nahisakop sa Lemmonhead.

Ang nakab-ot karon sa The Frabs maoy gihimo nilang inspirasyon nga mokugi pa sa pagpadayon pagtagik og orihinal pang mga obra. Sa pagkakaron, aduna na silay pito tanan ka komposiyon nga kuwang na lag gamay aron mokompleto sa usa ka album. Ang ilang mga obra mao ang “Inday”, “Sukad Sa Imong Pagbiya”, “Pakdot”, “Duyog Sa Ulan”, “Dili Lalim”, “Boholana” ug “Joyride”. Kining tanan nilang komposisyon nga nahinganlan sa ibabaw may impluwensiya sa musika sa Eraserheads, Parokya Ni Edgar, Missing Felimon, Coldplay ug The Doors.

Ang first hit single “Inday” sa The Frabs ma- search na ug madungog sa YouTube ubos sa Lemmonhead Publishing ug kaugalingong channel mismo sa banda. Puyde pod kining mastream ug ma- download sa Amazon, Backlink, Deezer, iTunes, Google Play, Spotify ug uban pang digital music online stores sa tibuok kalibotan.

Plano sa The Frabs nga mo- release sa kamagwangan nilang album karong umaabot Disyembre ning tuiga, o kon dili man, adto na sa buwan sa Pebrero sunod tuig 2020. Sila nanghinaot nga padayon pang mosuporta ang masa sa lokal nga kisaw sa musika ug mas labi pa unyang mohangop sa ilang banda.—