Dili Makausab Sa Balaod Ang Pulong Sa Presidente

MORA kog natuk- an niadtong miaging semana sa dihang nadungog nako ang tipik sa pakigpulong ni Presidente Rodrigo Duterte 118th Philippine National Service Anniversary didto sa Camp Crame niadtong miaging semana. Sa iyang pakigpulong ngadto sa mga polis, ang pamuno- nasod nagkanayon:

“Hindi ko kayo iipitin, basta pagbigyan kayo eh tanggapin n’yo. It is not bribery... it cannot be bribery because it is allowed by law. What I mean, if there is generosity in them, sabi ng anti- graft [ law] you cannot accept gifts? Kalokohan,” Duterte said.

Gahulat ko nga bakwion tos presidente didto mismo sa iyang pakigpulong. Apan wala, mihanoy na ang iyang mensahe ngadto sa mga polis. Haskang bulaboga gyod sa mga tawong nagsuporta sa iyang kampanya batok sa korapsiyon tungod sa maong pamahayag. Haska pod kahang lingawa sa tambaluslos nga mga polis nga kotong ug pangilkil ang kanunayng raket. Ang maong pamahayag sa presidente mahimo gyong sabton nga pagtugot ngadto sa mga polis nga modawat bisag unsang kantidad nga ihatag kanila bisan pa tungod kini sa ilang gitrabaho.

Unang mipadayag og pintok kaayong pagsupak sa pamahayag sa presidente si Senador Panfilo Lacson nga kanhi usa ka taas nga opisyal sa polis. Sa iyang twitter account, mipadayag ning maong mensahe ngadto sa presidente:

“Mr. President, insatiable greed starts with simple, petty graft. It could be more addicting than drugs. There is no detox, nor is there rehab facility available for addiction to money.”

Nagkabuang intawon og esplikar ang tigpamaba sa Malacañang, kay bisan ang Civil Service Commission ug mismo ang Philippine National Police miklaro na man gyod nga supak sa balaod ug manubag gyod ang mga polis nga modawat og salapi ug regalo gikan sa mga tawong ilang gihatagan og serbisyo. Sa mga nanagtuo sa maisogon ug matinud- anong kampanya ni Duterte batok sa korapsiyon, mas maayong hunahunaon na lang nga lain na usab kadtong komedya sa siawan natong presidente. Lisod kaayong isambog ang mao niyang way klarong pamahayag sa tarong kaayo niyang kampanya batok sa korapsiyon. Dili na lang nato kadto sabton base sa kahulogan sa mga pulong nga iyang gilitok kondili diha sa nagpahiping tinarong niyang katuyoan sa paglimpiyo sa gobyerno. Unsa man ang iyang gipamahayag, dili gyod kini mahimong basehan sa mga polis nga modawat na lang sa bisan unsang ihatag kanila tungod sa ilang trabaho. Dili gyod kini makausab sa tin- awng mga lagda sa atong mga balaod, gikan sa karaan na kaayong Revised Penal Code nga nagpahamtang og taas nga silot pagkabilanggo sa krimen nga bribery kun pagpangayo ug pagdawat og mga butang ug kantidad diha sa panerbisyo sa mga opisyal ug empleado sa gobyerno, sa Presidential Decree No. 46 nga nagsilot sa maong buhat bisan pa kun ang regalo o salapi nga gihatag panahon sa Pasko ug adlawng natawhan, sa Republic Act 6713, ug sa Republic Act 3019 kun Anti Graft and Corrupt Practices Act nga susamang nagpahamtang og silot sa maong binuhatan sa mas taas pa gani nga gidugayon pagkabilanggo lakip na ang pagpapahawa sa puwesto sa tagsala. Demokrasya ang sistema sa atong panggobyerno— panggobyerno diin ang mga

balaod ug dili ang mga opisyal ang angay sundon. Diin ang mga opisyal ug ang ilang mga aksiyon dili gayod mahimong mosungag o mosukwahi sa balaod.

Ours is a government of laws and not of men, matod pa sa usa ka batakang doktrina sa political law. Ug nga walay bisan kinsang tawo, bisan unsa pa kataas sa iyang puwesto sa gobyerno, bisan pa ang presidente, nga mahimong mas taas ug molabaw pa sa balaod kay una sa tanan ang iyang gahom ug ang iyang posisyon gimugna man sa balaod ug nagsumikad sa balaod. “No man is above the law.”

Hinaot lang unta nga walay tarong nga mga polis nga motuo sa maong pamahayag sa presidente. Wala mausab ang balaod ug magpabilin gyod nga kini higpit nga nagdili ug nagsilot sa mga opisyal ug empleyado sa gobyerno. Hangtod nga kini dili mausab o maamendar sa Kongreso, obligado ang tanang tawo nga nahilambigit sa pagsunod, ug patuman niini. Ug kini usab butang nga dili mahimong katiaw- tiawan kon seryoso kita sa pagsalbar sa atong nasod.–