Kon Nganong Mitambong Ko Sa Grand Finale Night Sa Ika-40 Nga Araw ng Sibagat Ug Ika-19 Nga Bagat Festival Niini

Bisaya - - Salad Bowl - Ni NITS B. BERONILLA Sibagat, Agusan del Sur

SA kap-atan ka tuig nga kasaulogan sa pagkahimon­g lungsod sa Sibagat, Agusan del Sur ubos sa tema nga “Ang Pagpahandu­raw Sa Bagat Festival Ug Pagsaulog Sa Adlaw Sa Sibagat Alang Sa Pangkatili­ngbanong Kultura Ug Ekonomikan­hong Kalamboan”, karon pa gayod ako makatambon­g. Kon ngano? Balikan ko anay makadiyot ang nangagi nga maoy magpatin-aw ining tanan.

Kalim-am ug duha ka tuig na akong nanimuyo sa Sibagat gikan sa Leyte sa tuig 1968 uban sa akong ginikanan ug duha ka igsoon nga babaye ug lalaki— sila si Mana Luly among magulang ug si Jun akong manghod. Ulitawo pa ko niadto, 22 ang panuigon. Nagtubo nga bukidnon, halayo sa katilingba­n sa Mahaplag, Leyte, ug sayong naghambin og balatian nga miduot ngadto sa kabilingga­n sa panglawas mao nga nahimo kong maulawon kaayo. Tungod niini, human sa hayskol gisulayan kog bugtaw diha sa pag-inusara, ang hilig sa pagpanulat kanus-a pagabot namo sa Sibagat may gisipitan na kong usa ka sugilanon ug usa ka balak nga napatik sa Bisaya. Inanayng gipadayon ko ang akong gisugdang tinguha. Uban sa panghingya­p nga unta molampos ko ug makapunpon og agi nga makaangkon og diyotayng bili sa akong pagka ako. Ug salamat sa Diyos, anam-anam kong nanghapnig sa agi nga akong hinagoan nga nangapatik sa Bisaya ug sa Bag-ong Suga.

Tuod man, usa ka binuhat nga nahigala ug nadani sa hiyas nga akong gihuptan. Siyay nahimo kong magdadasig ug diha kaniya natagik ko ang daghang balak sa gugma, usa ini ang “Kanang Bangaw Ug Ang Atong Gugma” (Bismag, Peb. 21, 1973) nga giisip nga labing nindot nga balak sa gugma, nga gisag-ulo god ni Brad Ric Tubio nga kaubang magsusulat sa Bisaya.

Nahiusa ang akong kinabuhi uban kaniya ni Nellie Luz, sa kadalaga kaniadtong Marso18, 1974. Gilayon gipundar namo ang Nelian’s Store isip maoy sukaranan sa among panginabuh­i ilabi na kay miburos siya dayon. Wala ray P100.00 ang among puhunan. Kakha gyod taman sa ginhawa ug tungod niini gisalindot ko ang pagpanulat. Isip padre de pamilya, gigahin ko ang tibuok panahon alang sa tindahan. Sa kaluoy sa Diyos, inanayng milambo ang gitambayay­ongan namong panginabuh­ian.

Mibuto ang Mount Pinatubo sa Hunyo 1991, ug miulbo pod pag-usab ang gana ko pagpanulat dihang napatik ang akong come back poem ubos sa maong ulohan sa Bisaya.

Misalmot kog mga tigi sa sinulatay sa Ludabi, sa Dagang Foundation, sa BATHALAD-Cebu ug sa BATHALAD-Mindanao diin ako nagpasakop. Nakaani kog lainlaing ganti

Apan halos hilom ug way nasayod sa lungsod sa kahimoan sa akong dagang. Samtang ang tindahan nakita ug tunog kaayo sa katawhan. Gani, ilado ang Nelian’s Store kay sa akong ngalan mismo…

sa lainlaing kategoriya sa katitikan. Hangtod gituboy ko sa Hawanan sa Kabantog (Hall of Fame) sa BATHALAD-Mindanao kaniadtong Nob. 18, 2007 sa ika-11 nga kasumaran sa BM didto sa Iligan City. Nagsunod ko nilang Gumer Rafanan, Marlo Geocallo ug Mario Batausa.

Magkatalir­ongan ang pagsugod ug paglambo sa akong pagpanulat ug sa among pagpaninda. Apan halos hilom ug way nasayod sa lungsod sa kahimoan sa akong dagang. Samtang ang tindahan nakita ug tunog kaayo sa katawhan. Gani, ilado ang Nelian’s Store kay sa akong ngalan mismo. Ug daghan kaayong motawag niyag Nelian kay sa iyang binunyagan Neliza o Nellie nga iyang angga. Ang NELIAN kombinasyo­n sa among mga ngalan: NELIza ug ANito.

Sa Peb. 1,1980, nahimong lungsod ang Sibagat ubos sa Batas Pambansa No. 56 ug sa Pres. Exec. Order No. 440. Si G. Vicente Benigian Sr. maoy appointed mayor. Gamay ra kini nga lungsod ug may 32,340 ka libong mulupyo sa 24 ka barangay apil na ang Poblacion. Ang langyab ini 567.82 kilometro kuwadrado.

Panguma ang nag-unang paginabuhi­an ning lungsod nga nahimutang sa kabukiran sa Agusan del Sur nga dili agianan og bagyo. Ang bagyong Pablo sa Nob. 2012 mao ray nasinatian ko dinhi, kanus-a kasagingan lang ang nangapukan. Lahi sa Leyte nga maglinya ang mga bagyo. Diin sa bagyong Amy, Dis. 3,1951, lima ka tuig pa ko, natakloban kami sa balay sa Hindang, Leyte, di ko makatuyhad sa paglingkod kay halos kami mapiga sa yuta.

Pastor ang akong amahan sa UCCP ug didto siya sa Hilongos nga simbahan adtong hitaboa.

Adtong Peb. 1, 2020 ning tuiga, wa ko damha nga mianha sa tindahan si Atty. Grian B. Damarillos, ikatulong abogado nga anak Sibagatnon. Nagpahibal­o siya ug nagdapit kanako sa pagtambong sa Grand Finale Night, Peb. 3, uban si Nellie nga akong kapikas, si Nian among anak ug si Gagay nga asawa niya. Kay lagi maulawon, nagpanuko ako sa pagtambong. Apan tungod sa abiba sa akong banay, ug sa paghunahun­a nga ang pagdumili daw pag-insulto kang Atty. Damarillos ug sa nagtahas kaniya nga mao si Mayor Maria Liza Lamanilao-Evangelist­a.

Nagdasok ang katawhan sa maong gabii sulod sa foldable theater sa Yemani Park ubos sa dakong municipal hall nga gabansiwag sa bungtod. May mga cultural dance nga gikumboyah­an sa Father Saturnino Urios High School ug sa Sibagat National High School of Home Industries, diin apil ang apo kong si Aijae sa mga sumasayaw. May mga mag-aawit sama kang Lance Busa, Elaine Duran ug Aljun Cayawan nga mga mananaog sa tigi sa pag-awit.

May pole dancing nga gidalit ni Miss Julifer Ytac Ponder kinsa may pole dancing studio sa Cebu City. Sila si Aljun ug Julifer pulos anak Sibagatnon nga may talagsaong hiyas sa arte.

Ang ngalan nga Sibagat naumol gikan sa pulong bagat kun panagtagbo. Sa kanhiay, matod sa sugid, ang bagat may negatibo nga kahulogan. Kay kaniadto ang bagat anha himoon sa Ugbon,

ang dapit diin mag-abot ang Sibagat River ug ang Wawa

River. Didto magduwelo ang tribung Manobo batok Higaonon (dagatnon) sa ilang panagbangi gamit ang sundang, bangkaw u

g uban pang hinagiban. Sibag nga panagbagat, matod pa, kay maangin ang pagkakalas og mga kinabuhi. Komplikto sa yuta, ancestral land, sa mga netibo ang gamot.

Pagpanglab­ay sa panahon, naresolbar na ang panag-awayaway. Ug gikan sa agiw sa panagbingk­il mipatigbab­aw ang kalinaw.

Mao nga kawhaag usa ka tuig human mahimong lungsod ang Sibagat, namugna ang konsepto sa Bagat Festival. Kini alang na sa diwa sa kalinaw, kaangayan ug kalamboan alang sa tanang Sibagatnon, way pagpihig bisan unsa nga kaliwat.

Ug sa Grand Finale Night sa lima ka adlaw nga selebrasyo­n (Enero 30 hangtod Pebrero 3) usa ako sa daghang gipasidung­gan sa lainlaing natad sa paningkamo­t ug kalamposan. Diha sa People’s Choice Award, sa kategoriya sa micro scale business, ang Nelian’s Store nga kap-atan ug unom ka tuig naglungtad, uban sa panabang sa Dios, ang labing karaang tindahan sa lungsod, maoy napili.

Sa kinatibuk-an, ang kalamposan sa maong selebrasyo­n nahimo tungod sa pagpanguli­n ni Mayor Maria Liza L. Evangelist­a uban ni Vice-Mayor Dado Villariver­a, ug sa mga sanggunian­g panglungso­d nga mao sila si Bebe Benigian, Ver Vergara, Marlon Muldez, Bobong Lañas, Frank Dumdom, Peping Mabasle, Loloybacau Coranes, ug Joel Quitoriano. Ingon man ang mga head of officer ug tanan sa LGU.

Mabuhi ang lungsod sa Sibagat! Mabuhi hangtod sa sunod nga panagbagat! —

Si Julifer sa iyang pole dancing.

Ang balay-lungsod sa Sibagat.

Si Aljun nga nag-awit.

Si Mayor Liza sa iyang pakigpulon­g.

Ang gakit parade sa Wawa River.

(Gikan sa wala paingon sa tuo) Si Atty Damarillos ang Chairman sa People’s Award, si Mrs. Flora Valencia, si Nits, si G. Fidel Samson, kauban mga pinasidung­gan, ug si Mayor Maria Liza.

And mga sakop sa sanggunian­g panlungsod

Newspapers in Cebuano

Newspapers from Philippines

© PressReader. All rights reserved.