Awit sa Awaaw

Bisaya - - Balak - CD BORDEN Dakbayan sa Sugbo

Mabugnaw nga kabuntagon Sa tempo sa mga impakto.

Tuig sa huwaw, buwan sa bakunawa, Sumad sa pagkahanaw ni Mariya,

Kinsa gisugo aron itugway ang baka, Apan wala na intawon mahiuli Dihang mihapit og pamupog uhong Kilid sa iladong taw-an nga sapa.

Huluhungin­hong bahin sa ukoy, agta, Ug, siyempre, kadtong estranyo Nga tigsuroy og puto-balanghoy Nga wala na magpatim-aw sukad.

Usa ka baryo sa mga sanglahon Diin ang nag-inusarang tambalan Namatay ug gihaya pa hangtod karon, Ug kansang biyuda nabuang og pangaliya,

Kang Hesus, O, maluluy-ong Hesus! Nga gilansang sa kawayan nga krus Taliwala sa hawan nga kahumayan Aron bugawon ang mga langgam.

Newspapers in Cebuano

Newspapers from Philippines

© PressReader. All rights reserved.