Luyo Sa Mga Kasikas Ang Bahandi
(Anib 14)
UG gisuginlan dayong Eloy sa ilang nakita. “Didto sa nahitaboan, Mayor, way balay sa duol nga among mapangutana. Naghuwat-huwat mig laing mga tawong mapangutan-an. Wala magdugay, may miaging traysikol ug among gipara. Mao nang hulagway sa traysikol ug sa drayber.” Ug gisugilon dayon ni Eloy ang gisulti sa drayber.
“Ug sa dihang gipakita ko kaniya ang mga hulagway sa nanulis sa pawnshop, miingon siya nga maoy ilang gipanul-ob.” Nagpanglingo ang mayor. “Wa pa gayod matagbaw? Na, hala, hiposi na ug ipakita unya na sa kapolisan. Kanang babaye diha mao nang biktima? Ug pila man say natulis nga kuwarta gikan niya?”
“O, Mayor! Mga kawhaan ra ka libo ka pesos ang nahabilin niyang kuwarta. Maoy sulod sa iyang pitaka. Ug sa dihang gipakita ko siya sa mga hulagway sa mga lalaki diha, midali siya pag-ingon nga mao kuno!” Ug dayong lad-ok og laway ni Eloy dayong hipos sa selpon.
“Na, hala! Paniudto sa mo! Hapit nang alas dose,” sa mayor dayong gawas sa pultahan.
Mitindog usab si Eloy ug gipangita si Carlito human niya maserhi ang pultahan kay nakagawas na ang mayor.
Human sa ilang paniudto ni Carlito, giingnan siya niini nga nagkatawa: “Kon matulog ka, basig maghilak na sab ka karon.”
Nagpanglingo si Eloy ug gitinguha niyang malimtan ang ngilad nga damgo. Naghunahuna siyag lain. Maoy gihunahuna ang kaayohang nadawat gikan sa mayor.
Maoy namatngonan ni Eloy nga giyugyog ang iyang pikas nga abaga kay nagtakilid man siya paghigda. Sa pagbuka nas iyang mga mata, maoy iyang nakit-an si Carlito nga nagkatawang nagdungo kaniya.
“A… puwerte mang hinanoka. Ala una imedya na. Ug nia nas mayor.”
Mitimbakuwas si Eloy ug sa iyang paglingkod, gidapuwas niya ang iyang duha ka palad sa nawong. Midali siyag tindog ug miduol sa lamesa sa mayor. “Good afternoon, Mayor.” Mikatawa ang mayor nga mipalingkod dayon kang Eloy humag tubag niini kaniya sa iyang pagpangatahoran.
“Gikapoy?” sa mayor nga nagngisi.
“Mibalik man god ang akong damgong daotan.” Nagpanglingo si Eloy sa hinayng tingog.
“Dugay kong nahikatulog ug gipaninguha kong malimtan.”
“Kining… pagpangayo rog emergency number sa kapolisan aron maka- emergency call ka kon magpakita nimo inigsakay mog traysikol. Pahunonga ang traysikol sa dili pa moabot sa ilang nahimutangan ug tawga ang kapolisan. Una pa palargahon kon maabot nang mga polis,” sa mayor nga mitutok kang Eloy, gibatig kaluoy.
Human sa diyotayng kahilom, mipadayon pagsulti ang mayor: “Adto mo ron sa kapolisan aron makit-an nila ang resulta sa inyong lakaw kaganina. Ug subaya ang resulta sa nangagi tang nakita