Rogelio S. Pono, 79
USA ka dakong haligi nga nakalig-on pag-ayo sa Bathalanong Halad sa Dagang, Inc. – Cebu kun Bathalad-Sugbo mipanaw na pod ngadto sa sunod kinabuhi nga wala nay kataposan.
Si Rogelio S. Pono kun Roger (Bathalad No. 13) miagpas nilang Ernesto Lariosa, Israel Ybañez, Melchor Yburan, Gumer Rafanan, Mariano Mañus, Sr., Urias Almagro, Renato Amper, Dionisio Gabriel, Tem Adlawan, Pantaleon Auman, Winefredo Suico, Alfredo Cabinatan, Frank Alforque, Jose Tomarong, Fidel Mag-usara ug uban pang mga sakop sa kapunongan nga ‘atua na’.
Usa siya ka tadhang magsusulat sa lainlaing genre: sugilanon, balak, nobela, drama. Ubay-ubay ang naani niyang mga ganti sa tigi sa sinulatay. Ang una niyang pagdaog sa bangga sa sinulatay mao kadtong nailok niya ang ganti sa essay contest nga gipasiugdahan sa Kislap-Graphic dihang nagtungha pa siya sa hayskul. Ang kaikag niya pagbasa sa Binisaya nagsugod dihang segundo grado na siya. Adto siya magyampungad sa balay ni Teofilo Palen aron pagbasa sa mga sinulat sa Bisaya, Alimyon, Saloma ug Lamdag.
Si Roger usa ka premyadong magsusulat. Niadtong tuig
1994, awardee siya sa Cultural Center of the Philippines (CCP) alang sa Sugboanong Sugilanon tungod sa iyang mga sugilanong nag-ulohan og “Ang Batang” ug “Si Imong”. Nahimo siyang Writer of the Year sa Bathalad-Sugbo sa maong tuig. Ug sa tuig 2009, gituboy siya sa Hawanan sa Kabantog sa Bathalad-Sugbo.
Ania ang mga mananaog niyang obra: (1) Unang Ganti sa Sugilanon sa tuig 1989 sa Magsusulat, Inc. (Balik Sa Sabakan Sa Kahusay); (2) Unang Ganti sa Balak sa tuig 1988 sa Ludabi (Mga Dangan Nga Mga Liso Nga Gisaliyab Ni Beelsebub Sa Mga Tugkaran Sa Nagsalimuang Nga Mga Kalibotan); (3) Unang Ganti sa Gumalaysay sa Cebu Arts Foundation, Inc. (Ang Way Kataposang Pagkaplag Sa Malinis Nga Tubig); (4) Unang Ganti sa Balak sa Durano Awards for Literature (Bugno… Palad Ug Kinutoban); (5) Unang Ganti sa Nobela sa 1995 sa Bathalad-Sugbo (Magic Makinilya); (6) Ikaduhang Ganti sa Balak sa 1995 sa Bathalad-Sugbo (Mga Ganghaan).
May pito siya ka nobela nga giseryal pagpatik sa Bisaya Magasin: (1) Nagdilaab Nga .45; (2) Ang Samurai Nga Bulawan; (3) Isla V; (4) Magic Makinilya; (5) Treasure Hunter; (6) Ang Bituon Nga Mikidlap Taliwala Sa Kamingaw; ug (7) Dearest Hope.
Si Roger natawo sa Dakbayan sa Sugbo sa tuig 1941. Ang iyang mga ginikanan mao sila si Santiago Villa Pono ug Prima Tecling Suico. Natapos niya ang elementarya sa Bato, Leyte diin siya nagdako. Migradwar siya sa kurso nga Bachelor of Arts (AB) sa St. Michael College, Hindang, Leyte, sa tuig 1964 nga usa ka working student. Ning maong tunghaan, napasidunggan siyang “Debater of the Year” ug “Poet of the Year”. Niadtong 1968, nakapasar siya pasulit sa Career Service Professional sa Civil Service Commission.
Nakaalagad siya sa gobyerno. Una niyang nakuptan nga trabaho mao ang pagka election clerk sa COMELEC. Sa tuig 1973, nahimo siyang senior clerk sa Department of Public Information (DPI) hangtod nga nahimong feature editor dihang ang DPI nahimong Office of Media Affairs. Miresayn siya sa OMA sa tuig 1987. Nahimo sab siyang associate editor sa Bloom, literary magazine nga gipatik sa DPI, Region VII. Natudlo siyang editorial assistant sa Southern Outlook Magazine, associate editor sa Habagatan, publisher and associate editor sa Bantayan sa Hari, editor sa Tubod, Kahayag, Sugid ug Hiyas Magazine.
Nakaalagad si Roger sa Bathalad-Sugbo isip pamuno sa tuig 1992-1993. Tungod sa maukoton niyang pag-alagad ning panahona, gibansagan siyag “Mister Bathalad” sa iyang mga anak. May igsoon siya nga usa usab ka magsusulat ug nakaalagad sa kapunongan sa taudtaod nga panahon— si Renato S. Pono. —