Si KOWBOY SANTOS ug ang PIGDOG
DILI kaayo daghang tawo ang nasayod nga kasagaran sa banggiitang gitarista sa atong panahon, mga walhon. Pananglitan sila si Iggy Pop, Paul McCartney, Duanne Allman, Mike Knopfler, Noel Galagher, Joan Jett, Paul Simon, Gary Moore, Jimi Hendrix, sa paghingalan lamang og pipila. Sa lokal nga esena sa musika, usa sa mga walhon nga gitarista nga naghimo nag gantuong sa mga balod sa pipila na karon ka tuig mao si Kowboy Santos.
Isip anak nila ni Nilo Santos ug Tessy Alfonso (kinsa mas nailhan sa iyang stage name nga Sampaguita), si Kowboy mao ray nagtudlo sa iyang kaugalingon sa pagtugtog sa gitara.
“Yes I am mostly self-taught, but have had intense lessons for a year under the student of Joe Satriani, Doug Doppler in
San Francisco for a year,” matod ni Kowboy. Sa lokal nga mga musikero, ang iyang mga impluwensiya naglakip nilang Wally Gonzalez ug Gary Perez.
“Sa foreign is Jimi Hendrix, Jimmy Page, Marc Ford of the
Black Crowes and Santana,” dugang niya. “I am more of a blues player, my skills are kind of rudimentary so I mostly stick to basic structures and concentrate on the groove more,” dugang pagangkon ni Kowboy.
Dinhi siya mahimugso sa Pilipinas apan milalin sa Estados Unidos sa edad lang nga siyam ka tuig. Ang iyang mga ginikanan nagbulag samtang nagpangedaron pa lang siyag unom ka tuig. Nagpuyo siya uban ang iyang amahan sa Amerika, una sa Hawaii, ug unya ngadto na sa Habagatang California. Unya nakapuyo siyag San Francisco sulod sa usa ka tuig. Niining panahona nga si Kowboy nagsugod og kakuryoso sa mga gitara.
“My dad have guitars lying around the house. And I remember my mom would have photo shoots in and around our yard when I was much younger,” matod ni Kowboy.
Ang nakapasilaob pa sa iyang kuryosidad mao ang iyang mga pagbisita kang Sampaguita matag tapos sa semana ug ang pagadto sa mga gig sa naulahi sa Olongapo.
“Bands would hang out with my mom and I would get to meet them first hand,” matod niya.
Ug sa linghod pa lang nga pangedaron nga 16 anyos sa tuig 1993, nagsugod na siya sa pagtokar sa publiko. “I played with a lot of bands, I first started performing with my mom’s band as myself, to keep them together and gigging, this was in Hobbit House. Then I joined the Blue Rats and played with that blues band for 8 years. After that I was with Tempestuous Jones,” pagangkon ni Kowboy.
Isip beterano sa daghang banda lakip na ang bandang Generations diin nakigkomboya siya sa duha ka anak ni Jose Mari Chan (oo, si Jose Mari Chan nga maoy mag-aawit sa bantogang mga awit nga “Beautiful Girl” ug “Christmas In
Our Hearts” ug uban pang mga hit) nga sila si Mike Chan (keybordista) ug Joe Chan (bahista) kauban usab ang anak sa mag-aawit-aktres nga si Celeste Legaspi ug kompositor nga si Nonoy Gallardo nga si Ige Gallardo (ritmo gitara).
Miinsister si Kowboy nga wala man sab tuyoa nga silang tanan mga anak sa leyenda sa musika sa Pilipinas. “Natiyempo lang,” matod ni Kowboy.
Sa wala pa kini, nakigbanda usab siya nila ni Maegan Aguilar ug Rocky Perez isip Luzviminda ug maisip kini nga usa ka super-band uban usab sa ilang mga super-talents nga gihuptan. Si Maegan anak ni Freddie Aguilar ug si Rocky anak ni Sampaguita ug Anak Bayan alumnus ug guitar wizard nga si Gary Perez.
Kini bang bandaha uban nila ni Maegan ug Rocky gituyo aron paghiusa sa mga anak sa leyenda sa musika sa Pilipinas?
“Natiyempo lang din,” matod ni Kowboy. Aduna usab siyay self-titled album ilawom sa Star Records.
Ang iyang kahanas sa gitara maoy hinungdan nga gianggaan siyag “The Southpaw Axe Slinger”. Ang iyang pagkalambigit sa dili na maisip nga mga project band naghatag kaniyag kahigayonan nga maitsa sa lainlaing genre sa musika sa kasamtangang panahon. Si Kowboy parehas rag petsa sa adlawng natawhan sa iyang inahan nga si Sampaguita, Hulyo 17. Sa dihang gipangutana siya unsang tuiga siya nahimugso, ang iyang tubag: “Every year, man!” agik-ik ni Kowboy.
Usa sab siya ka kanhi print ad model. Ug ang iyang sulti nganong ginganlan siya sa iyang ngalan karon,
“When your parents are both in rockstar status during their heyday, they can pretty much do anything they want, in a whim,” deklarar ni Kowboy.
Ang tuig 2015 mao ang malumong tuig sa kinabuhi ni Kowboy human siya makadaog sa giilogan nga “Philippine Guitar God Award”. Ug sa gikasulti na nga kamatuoran, gipahamis pa ni Kowboy ang iyang abilidad ug gipahait pa ang iyang mga lick sa lainlaing banda, tablado, mga gig sa lainlaing dapit sa Pilipinas sulod sa dul-an tulo ka dekada.
Karon uban sa iyang bag-ong banda nga PigDog, nga gianggaan sab sa kadaghanan nga usa ka super-band tungod sa mga sakop niini nga naglakip nila ni Tirso Ripoll, Johnny Besa, Miguel Ortigas ug Beatrice
Gomez, si Kowboy Santos gipangutana kon giunsa man nila pagtibuok ang maong grupo.
“Conceived from the fires of Mordor! Ha-ha... just joking…! We are all friends and we were also in different bands together before, it was just the right time,” deklarar ni Kowboy kalabot sa pagkahimugso sa maong banda.
Ang PigDog naglangkob nila ni Beatrice Gomez isip bokalista, Kowboy Santos isip gitarista, Miguel Ortigas isip tambolista, Johnny Besa isip bahista, ug ni Tirso Ripoll isip gitarista.
Isip membrong tagtukod sa bandang Razorback ug usa sa nahabiling tulo ka orihinal nga sakop, ang gamhanan ug estowikong tinokaran ni Tirso maoy nagbutang kaniya sa hataas nga pedestal sa esena sa rock dinhi sa Pilipinas. Sukad sa pagtaliwan ni Kevin
Roy sa tuig 2018 ug ang wala damha nga pagpanaw ni Brian Velasco sa miaging Enero 2019, ug ang ilang kataposang album sa tuig 2015, ang Razorback maingon nga nagsakay sa huyuhoy sa ilang paningkamot. Ug niining bag-o lang, ang ilang banda nakigkomboya sa ubang musikero sama nila ni Dong Abay, Raimund Marasigan, Nicole Asencio, ug Basti Artadi. Uban ang solidong siyam ka album nga diskograpiya ilawom sa iyang ngalan, wala na tingaliy lain pang pamatud-an si Tirso sa iyang pagka musikero.
Si Miguel Ortigas, ang orihinal nga tambolista sa Razorback, nakahukom nga mobiya sa banda sa tuig 1996, maoy nakaaghat sa banda nga kuhaon si Brian Velasco. Sa sinugdanan, si Ortigas nagkupot sa gitara ug sa ngadto-ngadto mao nay mibunal sa mga tambol. Si Ortigas nagtuon usab og musika ilawom sa Yamaha School of Music ubos ni Benjie Zialcita, kinsa mao usab ang nagtudlo kanila ni Tirso Ripoll, Louie Talan ug David Aguirre. Nagtibuok usab siyag banda kaniadto nga gitawag niyag Thunder Love ug
Sydney Side. Daghan ang makasaksi sa gahom ug kabanggiitan ni Miguel nga maoy nakaingon nga pinangita kaayo ang iyang talento. Usa siya ka semi- permanent nga residente sa Sydney, Australia. Si Miguel magbisitahan sa Pilipinas matag karon ug unya.
Si Johnny Besa usa sa mga founding member sa The Breed. Kauban ni Charlie Ysmael, ang ilang hypnotic rock groove nga “Black Mercedes Benz” usa ka standard staple sa dekada 90. Ang banda nabungkag (dili opisyal) human sa pipila ka hit sa music scene. Bisan aduna silay pseudo reunion sa miaging tuig pinaagi sa usa ka awit nga gitugtog sa tulo ka orihinal nga sakop atol sa usa ka thanksgiving gig alang kang Wally Gonzalez, si Johnny bukas alang sa reyunyon sa buhi pang mga sakop sa The Breed. Si Manny Amador, ang lead guitarist sa The Breed mitaliwan kaniadtong 2011. Si Johnny nakatampo og mga kanta sa ilang bugtong album nga “Free” kaniadtong tuig 1995.
Si Beatrice Gomez usa ka kanhi bokalista sa Australia-based rock band nga Thunder Love. Usa ka tipik sa ilang pagtugtog sa Sydney nagpakita sa kahanas sa iyang tingog sa rock, reggae, latin ug blues.
Karon nga anaa pa sa ilang katuigan sa pagsugod, ang mga sakop sa Pigdog maoy maisip nga perpektong kowalisyon sa usa ka banda sa Pilipinas sa pagkakaron. Pinasikad sa kalig-on sa ilang kanhing mga banda, ang si bisan kinsang tigpaniid sa kalihokan sa musika makaseguro sa kabagtik sa tokar niini ug sa matampo sa umaabot sa esena sa musika sa Pilipinas.
Ang nakamaayo kon motan-aw ta og usa ka supergroup mao nga makadungog kag tinagsip sa bisan unsa gikan sa ilang gigikanang banda isip dugang lamas sa han-ay sa talento nga girolyo ngadto sa usa, ug busa, sama ra nga nagtan-aw kag lima ka banda sa usa lang ka akto. Di ba kana talagsaon?
“And in between those bands, I jammed with different club bands that I like,” dugang pa ni Kowboy.
Namahayag siyag dugang nga ang iyang panilaw sa musika mas mikiling ngadto sa classic rock. “I listen to a lot of 60’s to 90’s material and I listen to a lot of reggae as well, and I can appreciate hiphop when it has conscious and defiant lyrics.”
Ang inadlaw niyang gimbuhaton?
“Practice with my guitar, do something healthy, check on our projects, and take care of my dogs,” panapos ni Kowboy. —
Ang iyang pagkalambigit sa dili na maisip nga mga project band naghatag kaniyag kahigayonan nga maitsa sa lainlaing genre sa musika sa kasamtangang panahon.