Business Outsourcing Industry: Temporaryong Puluy-anan sa Pandemya
SA pag-igo sa pandemiya niadtong Marso 2020, malaomon ang tanan nga mahuman ra kini nga malipayon. Duha ka konsiderasyon: Wala pa kini mahuman ug ang kasubo mao nay esensiya sa mga panimalay ug mga negosyo. Tanan, nakigbatok kontra sa hilom nga kriminal, makapabuang, makapagubag pamilya ug nakahatag og problema sa negosyo.
Ang Pandemya
UNA pa miabot ang COVID 19 virus, anaa usay
H1N1 virus o labawng nailhan sa tanan nga Spanish Flu. Bisag wala kiniy kalambigitan sa Espanya, ang maong pandemya sa sayong bahin sa ika-20 nga siglo, ang angga nagpabilin ug maoy labaw nga nailhan. Ang termino nga Spanish Flu gihimo aron makabaton og ngalan ang maong pandemya. Wala poy censorship ang Espanya sa lebel sa kasayoran. Gituohan nga ang virus nagagikan sa Tsina. Depende sa imong tinubdan nga basahon, ang ikaduhang bersiyon sa estorya nagaingon nga ang virus nadala sa mga sundalo gikan sa Unang Gubat sa Kalibotan sa ilang barko, diin sila mingnabigar og dugay sa pagpauli. Mingabot og lima ka tuig ang pagsumpo sa maong virus. Walay saktong komunikasyon kabahin sa maong virus. Ang mga tawo mingsalig lamang sa mga mantalaan ug sulti-sulti aron makakuhag impormasyon. Ang kakuwang sa mga ospital o medical facilities ug ang pagka walay alamag sa katawhan kabahin sa maong virus ang mga hinungdan nganong kini mikaylap pag-ayo. Maayo untag nakahibalo pa dayon ang mga tawo kon unsay buhaton o dili angay buhaton. Sumatotal, ikatulong bahin o 50 milyones ka kinabuhi sa tawo sa kalibotan ang gisakmit sa Spanish Flu wala pay labot sa pagsubay ang kahayopan nga naapektohan sa tuig 1918. Ug 700,000 ka kinabuhi niana gikan sa nasod nga Amerika.
Lokal nga Pamuo o Negosyo
SA lokal nga bahin, labaw nga apektado ang SME ( small and medium-sized enterprises). Nabatyagan sa establisado nga mga negosyo ug ang mga kauban niini ang ilang kahuyang.
Ang mga maglilibod og paninda sa kabalayan o kadalanan maoy direkta nga nag-antos, kadtong mga kakha-tuka.
Nahurot ang mga tinigom, mga napundar, wala na maatiman og bayad ang mga utang ug sa lain pang pagkasulti miunlod kita sa pinansiyal nga aspeto. Ubay-ubay pod ang wala dayon mingtuo sa virus ug naghunahuna nga kini estorya-estorya lang. Ug kini miresulta og labaw nga kadaot sa panglawas ug pinansiyal nga bahin sa tibuok nasod ug ubang kanasoran. Ang turismo maoy una ug labaw nga napiang. Ug gisundan kini sa uban pang mga negosyo nga anaay kalabotan niini.
Ang usa ka Filipino entertainer alang sa international cruise ship nga si Eller Obias mipaambit: “We were all told to go home first and will be called upon as soon tourism resumes. With no guest to serve and entertain, we all have our thumbs in our mouth and do nothing if we stay.”
Nagsubay sa ruta nga South America ang cruise ship ni Eller. Ug ang maong cruise ship naila nga kinamaayohang kompaniya sa tibuok kalibotan. “So I went home in the Philippines, and practically wait for a miracle,” puno pa ni Eller.
Ug tungod kay hurot-hurot na ang iyang tinigom ug naglaundok na ang mga bayranan, gikonsiderar ni Eller ang pagtrabaho sa BPO industry. Tuod, sa maong industriya, dili na siya mabalaka sa diskriminasyon isip kabahin sa LGBT community. “It was a rewarding experience, considering I get to use my communication skill, which I use extensively during my stay in the cruise ships, I get to meet a lot of people and get to
know them from all walks of life,” ingon pa ni Eller.
Ang Industriya sa BPO
NAGSUGOD ang BPO industry sa Pilipinas niadtong tuig 1992. Niadtong panahona, usa ra ka minority sa business world ang BPO sa atong nasod. Apan, walay nagdahom nga ang maong dark horse miani og 15% sa global market sa Pilipinas pa lang gani. Gitagna nga sa tuig 2022, mopadayon og ani ang maong industriya og 60 bilyon sa Pilipinas. Ang BPO industry mao nay kinataposang hunat alang sa Pilipinas. Niadtong
1992, kuwarenta ra ka kompaniya sa BPO ang mingsulod sa nasod apan karon gipilo-pilo na kinis 700 ka kompaniya. Anaay lainlaing klase ang serbisyo sa BPO sama sa technical support, service desk analyst, data entry, customer support, marketing, sales ug uban pa.
Gisuportahan sa gobyerno ang BPO tungod sa kaayohan nga nahatag niini sa ekonomiya sa nasod. Hinatagan og pabor ang maong industriya sama sa tax holidays ug exemptions. Taas og lebel ang communication skills sa mga Pilipino ug takos pod sa daghang industriya. Dekalidad nga sebisyo ang gidalit sa BPO sama sa voice, non-voice ug back office sa mga kliyente nga nag-ani sa daghan pang oportunidad sa pag- outsource sa nasod. Aduna poy lapad nga kaalam ang mga empleyado sa BPO kabahin sa western culture.
Adunay duha ka klase ang outsourcing: onshore ug offshore. Kon ang usa ka empleyado nagabase sa Pilipinas apan nagtrabaho alang sa usa ka kompaniya sa gawas sa nasod, offshore account ang tawag niana. Kon ang PLDT mo- hire og iyang kaugalingong call center agent nga nagbase sa Pilipinas ug motrabaho sa Pilipinas, mao kanay onshore.
Dako og matigom ang kompaniya nga mo- outsource tungod kay labaw nga gamay ra ang gikinahanglan nga budget sa operasyon, dili na kinahanglang mobayad og dakong suweldo ang kompaniya sa mga in-house employee. Apan bisan pas kagamay na lang sa bayronon sa kompaniya sa pagpadagan sa negosyo, wala gihapon makompromiso ang kalidad sa serbisyo tungod sa katakos sa mga Pilipino. Ang outsourcing company maoy responsable sa pagmentenar ug paggasto sa mga panginahanglanon sa operasyon. Ug labaw kining nakapaspas sa trabaho, nakapanindot sa relasyon sa mga kasosyo, nakapahugot sa seguridad ug nakahatag og maayong kasinatian.
Gikinahanglan sa BPO ang mga hanas og communication skills ug sa ubang pa ganing accounts o kompaniya, taas nga lebel sa maong abilidad ang gipangita. Anaay poy non-voice account. Ug sa maong account gikinahanglan nga banggiitan ang aplikante sa pagsulat ug paspas pod mo- type. Ginadili ang diskriminasyon sa BPO bisan pa man sa relihiyon, edad, kaliwatan ug gipiling sekswalidad sa usa ka tawo. Maong talagsaong kanindot ang kasinatian ni Eller Obias sa BPO.
Ingon pa ni Eller: “After working for that company for five months, I ventured into a different account, which is an HMO account. I stayed there for another 5 months and transferred again to a telecommunication account, not to my liking though, the company that hired me felt that a transition is in order,” kagiki ni Eller.
Usa ka Katolikong nasod ang Pilipinas human kini masakop sa Espanya sulod sa 350 ka tuig maong anaa na kiniy naestablisar nga mga kalihokan ug mga pagtuo sa pagka relihiyoso. Usa ka kompaniya nga natrabahoan niining tagsulat, mi- require sa ilang empleyado nga mag- novena sa sugod ug sa kataposang bahin sa shift. Ang maong kompaniya dili modawat og aplikante nga anaay kalambigitan sa Islam. Ang BPO industry wala motubay sa panultihon sa relihiyon o pagtuo sa tawo. Ug gimandoan gyod ang mga empleyado nga dili mag-ablig tapik kabahin sa kaliwat, edad, relihiyon ug sa gipiling sekswalidad sa tawo, gawas lang kon ang hingtungdan nay mopaambit niini. Ug dili kinahanglang motubag ang usa ka tawo sa mga pangutana kabahin sa nasulting sensitibo nga isyu.
Sagad sa mga kompaniya, modawat og edad nga 28 pataas. Apan, daghan pod og gikonsiderar. Basta gradwado lag high school ug anaay diploma, kalipikado ka na. Anaa poy ubayubay nga account nga kapilian nga anaay work from home setup. Mao nang karon, ang BPO maoy nahimong dangpanan nga sektor sa pangempleyado. —
Gisuportahan sa gobyerno ang BPO tungod sa kaayohan nga nahatag niini sa ekonomiya sa nasod. Hinatagan og pabor ang maong industriya sama sa tax holidays ug exemptions...