Boarding House
TUNGOD sa kaestrikto o kahigpit sa akong mga ginikanan, ang duha ko ka magulang namiya sa among panimalay human sila makatapos sa ilang pagtuon. Si Ate Zsa Zsa atua na sa Manila nagtrabaho sa usa ka drug store kay usa man siya ka pharmacist. Si Ate Perlie sab tua sa Tacloban City nagtrabaho. Namiya dayon sila sa amo human sila makagradwar sa kursong ilang gipangkuha kay gusto silang makalingkawas sa kahigpit sa among parents. Kon mamauli sila sa Sugbo, dili sila moestar og dugay. Dili sila comfortable uban sa conservative namong mga ginikanan.
Usa ka kanhi seaman si Papa Amado. Sulod sa kapin sa ten years niyang pagpanakay og barko nga magbiyahean sa gawas sa nasod, nakatigom siyag daghang kuwarta. Nakapatukod mig dakong balay sa Beverly Hills. Ang ground floor niini maoy among giokupar.
Ang ikaduhang andana among gipaabangan sa mga estudyanteng boarder.
Nagtungha na ako sa fourth year sa kursong Nursing sa usa ka unibersidad sa Sugbo sa dihang may boarder nga lalaki nga miabang sa kuwarto sa among balay. Siya si Reuben. Sa akong nasayran, taga Negros Oriental og kagikan si Reuben. Nagtungha siya sa usa ka unibersidad sa Sugbo sa kursong Information Technology. Gusto siyag privacy mao nga siya ray miokupar sa usa sa mga kuwarto. Lahi sa uban namong mga boarder nga nag- bed spacer lang kay walay ika- afford pag-abang sa tibuok kuwarto.
Na- crush ko kang Reuben. Ambongan siya. Kusog og sex appeal. Alang nako, aduna siyay charisma nga kusog maka- attract sa mga babaye.
Mi- admire ko sa kaguwapo ni Reuben. Pero nagmatngon ko nga dili hisabtan sa akong mga ginikanan. Seguradong masuko gyod sila nako. Gipaninguha ko nga dili kami magka- close si Reuben. Apan kon dili gayod kalikayan nga magkaduol kami, dili ko siya pakitaan og maayong pagtagad ilabi na kon anaa ang akong parents. Nagmatngon kog maayo sa akong mga lihok. Si Reuben sab ingon sa nakasabot sa kahigpit sa akong mga ginikanan. Maglikay sab siya pagpakigsulti nako kon anaa sila si Papa Amado ug Mama Marlinda.
Apan kon magkita kami sa gawas, maayo ang pagtinagdanay namo ni Reuben. Bisan managlahi ang unibersidad nga among gitunghaan may mga adlaw nga magkakita kami sa mga mall. Sama sa nahitabo usa niana ka higayon samtang namili ko og pocketbooks sa National Bookstore sa may Mango Square. Nakugang ko sa dihang may mikuhit sa akong bukton samtang nagbasa-basa ko. Si Reuben diay. Nagtingsi siya.
“Hi!” Mitimbaya siya kanako.
“Hello!” Mibalos ko pagtimbaya.
Unya kalit lang mikulba ang akong dughan sa dihang iya kong gitutokan. Nabatyagan ko nga ingon sa nanginit ang akong aping.
“Naunsa man ka?” Nakapangutana si Reuben nako nga kaha nakamatikod sa lahi kong reaksiyon sa akong pagkakita kaniya.
“Kuyawa nako, uy,” matod ko. “Ikaw man diay ni, Reuben. A-abi kog…”
“Abi mog hold-aper na?
“Dili, uy. Kaguwapo sab nga hold-aper no?”
“Duna bayay hold-aper nga guwapo. Kasagaran mga guwapa pod ang ilang biktimahon.”
Wala ko motingog. Miduko ko. Nagpadayon gihapon pagtutok si Reuben nako. Ingon sa dili ko makaharong sa iyang tinan-awan nga maduloton kaayo.
“Mangesnak una ta, Kaycee,” agda ni Reuben nako.
“H-ha?” Nakugang ko sa iyang gisulti.
“Pahimuslan ta kining higayona nga nagkakita ta,” ni Reuben pa. “Mora ra bag aloof ka kaayo nako kon tua ta sa inyo.”
“Pasensiya na,” matod ko. “Estrikto ug estrikta kaayo sila si Papa ug Mama.
“Nakasabot ko. Mao bitawng dili na lang ko makigsandurot nimo kon tua ta sa balay. Busa karon nga nagkakita ta, pahimuslan ta ang higayon.”
Naikog kong mobalibad kang Reuben maong gisanong ko ang iyang pag- invite. Nanggawas mi sa National Bookstore. Nanulod mi sa usa ka outlet sa Jollibee.
“Unsay gusto mong kaonon?” Gipangutana ko ni Reuben. “Ikaw nay maantigong mopili,” giingnan ko siya.
“Okay. Pangita og bakanteng lamesa.”
Samtang milinya si Reuben sa counter, milingkod ko sa bakanteng lingkoranan atubangan sa usa ka lamesa. Pagduol ni Reuben nga nagdala na sa iyang mga inorder, nangaon dayon mi. Nagsige siyag tutok nako.
Wala na lang nako hatagig daotang kahulogan ang kanunayng pagtutok ni Reuben nako. Wala man sab ko makamatikod nga lustful ang iyang tinan-awan nako. Mipadayon kog kaon kay lamian ang mga pagkaon nga giorder ni Reuben.
Apan nagsige gyod og tutok si Reuben nako samtang nagpadayon mi pagpangaon.
“Mahimo bang dili mo ako tutokan?” Giingnan ko siya. “Basin mahilis ko sa imong tinan-awan.”
“Pasagdi lang god ko,” niya pa. “Dili man god ko pul-an nga magsud-ong sa imong kaguwapa.”
“Saba diha.”
“Tinuod bitaw. Matahom ka, Kaycee.” “Salamat sa compliment.”
“You’re welcome.”
Gitibawas namo ang pagpangaon.
“Dili kaha masuko ang imong bf kon makita ka niya nga nakig-uban nako?” Gipangutana ko ni Reuben.
“Wala pa koy boyfriend.”
“Dili ko motuo. Sa imong kaguwapa lisod kaayong tuohan nga walay nanguyab nimo.”
“Dunay nanguyab pero wala sila makahuygo kay akong gilikayan. Dili ko gustong masamok ang akong kinabuhi. Nakaseguro kong masuko gyod sila si Papa ug Mama kon masayran nila nga nagbaton na kog boyfriend.”
“That’s unfair sa imong side, Kaycee. Sobra ra man ka- strict ang imong parents. Mora man og wala sila moagi pagka batan-on.”
Wala ko motingog. Miduko ko. Unya naigking ko sa dihang gigunitan ni Reuben ang tuo kong kamot. Mitutok na sab siya nako. “A-ang akong kamot, Reuben,” nako pa. “B-buhii. Please…” “I love you, Kaycee.”
Nakugang ko sa akong nadungog. Wala ko makatingog.
(SUMPAYAN PA)
May miturok nga pagbati sulod sa boarding house. May katumanan kaha kini taliwa sa mga kakulian?