Bisaya

Diin Nasayop Ang Mga Pangandoy

- Sugilanon ni Narciso M. Caparoso

(Ikatulong Bahin)

SI RayJun duha ka gabii nang wa mopauli?!” nagkadunga­g sukit nilang Mundo ug Lilay sa ilang mga magulang nga wa na lang manaka kay si Orbi maghimo pag lesson plan maong magdalig pauli.

“Oo. Niadtong usang gabii abi namog nalangan lang siya sa pagpauli. Apan wa gyod moabot tibuok adlaw. Maoy hinungdan nga ako na gayod siyang gipangita didtos ilang eskuylahan ug mga dapit nga sagad nilang adtoan. Apan wa gyod nako siya makita. Akong gipakisayr­an ang mga klasmeyt niyang nailhan nako. Apan wa sab sila mahibawo. Ganihang hapon, miadto na gyod ko sa ilang eskuylahan. Sumala pang Miss Suson, ang ilang teacher in-charge, dugaydugay na man kunong wa mosulod sa ilang mga klase si RayJun nga gipakaingo­n niyag may sakit. Nagplano man gani kuno siya pagpasusi didtos balay. Maoy hinungdan nga, humag panihapon, mianhi mis Soling aron pagpahibal­o ninyo kon hain kaha paingon tong inyong anak,” taas nga patin-aw ni Orbi.

“Hain man kaha diay paingon tong anaka? Unsa man kahay iyang gidangatan­g wa man mahiuli!” tuaw nilang Lilay ug Mundo nga giharian sa kahikurat ug kabalaka.

“Labing maayo nga ugma tabangan natog pangita tong inyong anak. Mopalta kos among mga klase,” sugyot ni Orbi.

“Sige, Manong ug Manang. Mosayo mig gikan ugma dinhis balay. Adto ta magsugod og pangita sa ilang eskuylahan,” hukom nilang Mundo ug Lilay.

Pagkaugma, sayo sila si Mundo ug Lilay nga nangadto sa Divine Mercy ug ilang gipakigkit­aan ang teacher-in-charge sa ilang anak.

“Kaping duha ka semana na mang wa mosulod sa iyang mga klase si Raymundo Jr., Mr. ug Mrs. Saldivar. Magsugo na man gani unta kog klasmeyt niya pag-adtos inyo aron pakisayran kon unsay nahitabo niya, nagkasakit ba,” tug-an ni Miss Suson.

“Wa na diay si RayJun magsudlana­n sa iyang mga klase niadtong hapon nga nakita siya ni Manoy Orbi nga namalit ug siyabu uban sa iyang mga klasmeyt didtos gawas sa koral ning inyong eskuylahan, Miss Suson,” nagkanayon sila si Mundo ug Lilay.

“Mao diay tong morag luya si Raymundo Jr. niadtong ulahing sulod niyas among klase. Kay wa na diay siyay balong kuwarta,” sa magtutudlo dayong atubang sa iyang mga tinun-an ug nangutana: “Kinsa ninyo ang kauban ni Raymundo Jr. nga namalit og siyabu? Tug-an! Wa ninyoy

makalimod kay nakita man mo ning uyoan ni RayJun. Kon di mo motug-an, ipatawag mo nako sa atong prinsipal,” ni Miss Suson sa ugdang nga tingog.

“Kami, Ma’m,” daling tug-an sa upat ka lalaking nanindog. “Pero mao na man toy kataposan namong pagpalit og siyabu kay wan-a man mi hatagig balong kuwarta sa among mga ginikanan,” tug-an nilang Karyo, Puroy, Abon ug Goryo.

“Kon mao kana, di na mo nako ipatawag sa atong prinsipal. Tugotan mo nakong tabangan silas Mr. Saldivar pagpangita sa ilang anak. Nagtuo kong nahibawo mo kon asa ninyo pangitaa si Raymundo Jr. kay inyong kabarkada,” ni Miss Suson kinsa gikalipay kaayo nilang Mundo.

“Daghan kaayong salamat, Miss Suson,” nilang Lilay ug Mundo.

Uban sa mga klasmeyt sa ilang anak, giadto nilang Mundo ang tanang dapit nga suroyanan ni RayJun kauban sa iyang mga barkada. Hangtod nga may nakita silang mga batan-on sa merkado nga misulti kanila kinsay gikuyog-kuyogan sa ilang anak.

“Niadtong una, kauban-uban namo si RayJun. Apan ning miaging mga adlaw, didto na siya magkuyogan kang Japet, pag-umangkon nilang Nang Santas ug Nang Urya, magsoong gulang-dalaga namaligyag mga utanog isda dinhis merkado.”

“Mao ba? Hain man magpuyo nang giingon ninyong Nang Santas ug Nang Urya?”

“Duol sa simbahan sa mga Sabadista daplin sa haywey. Apan nia man sila karon dinhis merkado nanindag mga isdag utanon. Sige, kuyogan mo namo ngadto nila, Manong,” sa duha ka batan-on dayong agda kanilang Mundo sa pagsunod ngadtos tindahag mga utanon sa merkado sa lungsod.

“Nang Santas, niay nangitang RayJun nga kabarkada na ron ni Japet. O, sige, Manong, kamo na lay mosulti kang Nang Santas kay duna na sab miy hakotonon,” sa duha ka batan-on nga morag mga kargador didto sa merkado.

“Nangita mong RayJun? Ang taas nga batan-on ug guwapo? Ig-unsa man diay ninyo siya?”

“Kami, Manang, ang mga ginikanan ni RayJun. Amo siyang gipangita kay wa na man mouli. Nabarkada diay sa inyong pag-umangkon,” ni Mundo sa babaye nga gulangdala­ga kuno, matod pa sa duha ka batan-ong naggiya kanila.

“Oo, nabarkada siya sa akong pag-umangkon, aron kuno makakuwart­a siya. Tua man gani sila karon nanuroy ngadtos laing kalungsora­n diin may mga suki ang akong pagumangko­n.”

“Unsang mga lungsora, Manang?”

“Di nako manganlan. Daghang lungsod dinhis atong lalawigan ug didtos kanait natong mga lalawigan. Tagdugay

Buot tudloan ni Mundo og leksiyon ang pakloy nga anak. Buot niyang patilawon sa pasingot ug pakusog nga trabaho sa usa ka mag-uuma...

sila mahiuli. Kasagaran lawom nang gabii.”

“Mahimo ba ming mangadtos inyong balay, Manang, bisag lawom nang gabii? Kinahangla­n gayong makita namo ang among anak.”

“Mahimo. Basta manuktok lang mos pultahan namo ug manangpit, seguradong mangabli mi.”

“Sige, Manang, mangadto mis inyong balay unyang gabii. Manuktok lang mi ug manangpit. Daghan kaayong salamat,” ni Mundo nga nalipay kaayo sa maayong gawi nga gipakita sa gulang-dalaga.

Mag-ala una sa kadlawon silas Mundo nga nangadto sa pinuyanan sa magsoong gulang-dalaga nga dali ra sab nangabli sa ilang pagpanukto­k ug panangpit. Gamay ra ang kongkreton­g balay diin ang katulganan­g lawak sa magsoon nahimutang duol sa pultahan maong daling nakadungog ug nakapangab­li.

“Ang inyong anak mao pa lang gyoy pagkatulog kay di pa lang dugay nahiuli uban nianang among pag-umangkon,” ni Nang Santas nga mitudlog una kang RayJun nga naghigda duol sa pultahan nga dali ra sab nahigmata dihang giyugyog sa gulangdala­ga.

“Niang imong mga ginikanan, RayJun, nangita nimo.”

“Ha… unsa?”

“RayJun, nia mi nangita nimo. Mora ka na mag iro nga way kaugalingo­ng balay. Sige, bangon dayon, didto na tiwas og katulog sa ato,” ni Mundo sa ugdang nga tingog ug dayong puno: “Sori kaayo, Nang Santas, nga nahukaw namo ang inyong pagkatulog.”

“Way sapayan, Mr. Saldivar. Ug kini diayng akong katupad, si Manang Urya, magulang nakong dalaga,” paila ni Nang Santas sa magulang nga nakadapit sa kaikag nilang Mundo ang sayag kaayong panagway nga maayo sab og gawi.

“Wa moy angay kabalak-an, Mr. Saldivar. Basta higala sa among pag-umangkon, welkam kaayo sa among kaugalingo­n,” ni Nang Urya.

“Sige, Nang Urya ug Nang Santas, daghan kaayong salamat sa inyong pagpapuyo sa among anak. Di namo makalimtan ang maayo ninyong gawi,” subling pagpasalam­at ni Mundo dayong puno: “RayJun, kuhaang imong mga gamit kay mamauli na ta.” “Wa man koy mga gamit dinhi, Pa.”

“Bitaw, Mr. Saldivar. Wa may dalang mga gamit nas RayJun pag-abot dinhis amo,” dason sa magsoong Nang Santas ug Nang Urya.

Nananghid si Mundo sa magsoong gulang-dalaga nga mapahiyomo­n sab nga mingkaway sa ila nang pagpanglak­aw.

Walay tingog-tingog silang nanglakaw paingon sa balay nilang Orbi ug Soling. Paghiabot nila didtos balay sa ilang magulang, si Mundo wala na maghulat nga makalingko­d si RayJun.

“Hain ang imong sapatos, RayJun? Nganong nagtsinela­s ka na lang? Nganong nagtisirt ka na lang? Matod pa nilang Nang Urya ug Nang Santas, wa kay dalang mga gamit pag-abot didtos ila?”

“Akong gipamaligy­a.”

“Unsa? Imong gipamaligy­a ang tanan nimong mga gamit?” nagkadunga­ng tukso nilang Lilay, Soling ug Orbi nga nangaiknat ang tingog ug kilay.

Si Mundo nahasiga ang mga mata, naminting namulong: “Yabaga nimo, RayJun!”

“Unsaong wa na man koy panggasto.”

“Unsaon gong kon hatagan ka namog allowance, siyabu may imong paliton! Karon, mas grabe nang imong bisyo! Gawas nga nagsiyabu, nagpuser pa gayod hinuon! Naghunahun­a ko pagpahunon­g gayod nianang barot nimong mga bisyo! Katulog na kay ugma may lakton tag sayo!” ni Mundo nga hapit isinggit ang tanan sa kapungot dayong ligid sa banig nga gibukhad ni Soling alang kanila nga makatulog og gamay niadtong panahon nga namasibas na ang silangan.

Humag pamahaw, si RayJun natingala nganong nangadto sila sa buhatan ni Hepe Macoy Digno sa kapolisan sa lungsod.

Labihang kurata niya, nanagko ang mga mata, dihang namulong ang iyang amahan:

“Tsip, presoha ning akong anak,” ni Mundo sa hinay apan ugdang nga tingog diin si RayJun nga nakabati nanglingin ang mga mata. Silas Orbi ug Soling nahatutok kang Mundo ug Lilay.

“Presohon? Nganong presohon man? Unsay sala?” sukit ni Tsip Digno nga nakurat. Sukad, mao pa nahitabo nga ang usa ka amahan miduol ug mihangyo niya sa pagpapreso sa kaugalingo­ng anak.

“Dako kaayog sala ning among anak, Tsip. Among gipaeskuyl­a unya nagyabag-yabag lang, naghubog-hubog ug nagdroga.”

“Apan di na igong katarongan, Mr. Saldivar, aron among presohon ang imong anak.”

“Apan, Tsip, di ba diay igong katarongan ang pagpapreso ning among anak nga naghubog-hubog ug nagdroga? Di ba gipanakop man ang mga nagdroga, gipapreso. Duna man ganiy gipamatay. Maoy tuyo sa atong presidente nga sumpoon ang illegal drugs dinhi sa atong nasod.”

“Oo, gipanakop ang mga tawong nalambigit sa illegal drugs nga nakita gayod sa aktong naggamit og droga, dili sa sulti lang samas gusto nimong ipabuhat namo karon ning imong anak. Ug labi nang wa miy gipreso dinhis atong lungsod tungod lang sa hubog-hubog. Di gyod namo na mahimo kay peligrong makasohan mig violation against human rights. Kinahangla­ng may ebidensiya ug may court order nga among basehan sa pagpreso sa tawo nga giingong nagdroga o nalambigit sa illegal drugs.”

“Diay ba? Kinahangla­ng dunay ebidensiya aron di mo makasohag violation of human rights? Ug kinahangla­ng dunay court order? Mao gayod na ang mga reglamento­ng ginasunod aron mapreso ang tawo nga nalambigit sa droga sama ning among anak?”

“Oo, Mr. Saldivar,” panapos nga patin-aw ni Tsip Macoy Digno maong napugos sila si Mundo pag-adto sa buhatan ni Judge Roman Salvanera sa ilang lungsod.

Nahiatol nga si Judge Salvanera diha sa iyang buhatan, nagbasa-basa og mantalaan nga migawas niadtong adlawa.

“Uy, ang magtiayong gibantog nga labing dakog kalubian ug sagingan dinhis atong lungsod sa Silangit, suwerteng nasuroy nganhis akong buhatan sa adlaw nga wa koy gipahigayo­ng bista. Sige, panglingko­d mo kay dugay nang wa mo mangadtos balay, Soling ug Orbi,” malipayong pamulong sa huwes kansang asawa iyaan ni Orbi, dayong pakisayod: “Unsa may akong ikaalagad ninyo, Mundo ug Lilay?”

“Nia mi, Judge, tungod ning among anak,” si Lilay ang midalig tubag.

“Ngano, unsa man diay nahitabo?”

“Among gipaeskuyl­a ning bataa, Judge, aron mahimong abugado sama nimo. Apan naghubog-hubog maong gigaid nako didtos punoan sa atis sa among tugkaran. Nanaad siyang magbag-o maong gibalhin namo dihas Divine Mercy pamasin nga matarong siya sa higpit nga mga reglamento­ng gipasunod sa nagdumalan­g pari. Misamot man hinuon ang among problema. Nagsiyabu na man hinuon ug nagpuser pa gayod. Kay di man gayod namo makontrol, amo na lang gyod siyang ipapreso. Ugaling kay si Chief Digno di mopreso ning among anak kon way court order. Mianhi mi aron pagpangayo sa court order nga gikinahang­lan ni Chief Digno, Judge.”

“Lisod man nang inyong gihangyo, Mundo. Di ko mahimong mohatag og court order kon way klarong ebidensiya bahin sa krimen o salang nahimo.”

“Di ba diay klarong ebidensiya nga kami na mismong mga ginikanan ang magpapreso sa naadik ug nagpuser namong anak?”

“Tinuod na. Ugaling kay kon sulti lang, di gayod madawat nga ebidensiya. Delikadong makasohan tag violation of human rights.”

“Kinsa may mopasakag kaso batok nato, Judge, nga amo mang anak ning among ipapreso?”

“Ang Commission on Human Rights maoy mopasakag sumbong. Mao kana ang ahensiya nga kugihan kaayong molihok kon ang sinumbong di lang maggunok pagpanalip­od sa iyang katungod.”

“Diay ba, Judge? Unya ang katungod diay namong mga ginikanan, wa lay bili?”

“Ambot nganong wa man maghunahun­a bahin niana ang atong gobyerno, Mundo. Nganong wa silay gitukod nga Commission on Parent’s Rights. Di ko makahatag sa gihangyo ninyong court order.”

“Kon mao na, Judge, kining among anak magpadayon na gyod sa pagka adik ug puser. Kaming iyang mga ginikanan nangandoy gayod unta paghatag niyag maayong kaugmaon.”

“Mao kana, Mundo ug Lilay, ang sakit nga mga kamatuoran sa kinabuhi. Inyong dawaton kay di man ninyo mahimong isalikway ang inyong anak. Di sab nako mahimo laging ipabalhog sa bilanggoan kay wa may kongkreton­g ebidensiya bahin sa iyang pagka adik ug pagka puser,” panapos ni Judge Salvanera.

Namauli sila nga gubot kaayo ang kaisipan kon unsay ilang buhaton sa anak.

“Mundo, akong natugkad nga dako gayod kaayo ang imong tinguha pagpapreso sa atong anak,” ni Lilay sa ila nang pagpanghig­da.

“Ako man gong nahunahuna, Lilay, nga basin magbag-o siya kon iyang masulayan unsa kalisod puy-an ang bilanggoan. Basig makahunahu­na siyang magtarong nag eskuyla aron makatapos sa kursong atong gipangando­y. Apan wa tay nahimo kay silas Chief Digno ug Judge Salvanera nangahadlo­k makasohag human rights violation. Akong natugkad nga labihang ampawa man diay sa atong gobyerno. Kita mismong mga ginikanan wa hatagig katungod sa balaod pagpitol sa atong anak nga nagumon sa droga.”

“Wa tay mahimo, Mundo, kay mao man kanay mga pamaaging gipasunod kanato sa gobyerno. Mangita na lang tag paaging mapahunong ang mga bisyos atong anak. Di man sab nato siya mahimong isalikway. Ato man siyang anak.”

“Labing maayo tingali nga ato na lang siyang patrabahoo­n uban nato didtos atong kalubihan ug sagingan. Niini, di na siya makahubog-hubog ug di na makadroga. Di na siya makahigayo­n paglaag,” hukom ni Mundo.

“Husto ka, Mundo. Kay nganong ato mang pugson pagpaeskuy­la kanang anak nga way pangandoyn­g makatapos og kurso. Ugma, ato siyang ikuyog paghakot sa mga lubing nahugno. Masayran ni RayJun unsa kalisod ang pagtrabaho,” ni Lilay nga nakabaton nag kalinaw sa pangisip ug kahiladman. Nakatulog silang malinawon hangtod nabuntag.

Pagkabunta­g, human nilag pamahaw, diin si RayJun kusog kaayong nakahigop sabaw sa tinulang pugapo nga kinamungga­yan nga gituyog luto sa apohan, si RayJun ila dayong giestoryah­an.

“Kamis Mama nimo, RayJun, wa mangadtog sayo sa atong kalubihan kay gihulat ka namong mahigmata. Nagkasabot kaming ikuyog ka namo kay di ka na man moeskuyla. Kay human na man tag pamahaw, mangadto na tas kalubihan aron paghakot sa mga lahing,” ni Mundo dayong agda sa pagpanglak­aw nilang Lilay ug anak nga gihatagan sab ni Mundo og usa ka basiyong sako.

Wala silay timik nga nanglakaw hangtod nahiabot sa dapit sa ilang kalubihan.

“Di maagig balsa ning dapit nga banghilig. Kinahangla­ng isulod nato sa sako ang mga lubing naas mga punoan. Sudlan nato ang sako sa gidaghanon­g igo mapas-an ngadtos patag nga gihimong pundokanan pagkuha nas komprador. Nia, sunda ning gibuhat namong Mama mo, RayJun.” Gitudloan ni Mundo ang anak nga wa pa sukad makatrabah­o didto sa ilang uma. “Maayo man kas mga dulang basketbol ug bolibol, RayJun, busa angay gayong maayo sab ka motrabaho,” puno ni Mundo dayong sakwat ug pas-an sa bukag nga puno sa mga lahing.

Gisakwat sab ni RayJun ang sako nga puno sa mga lubi sama sa gibuhat sa mama niya, apan wa niya ikapatong sa iyang abaga kay nasarasay.

“Bug-at man diay kaayo ni!” kusog nga pamulong ni RayJun diin si Mama niya kalit napahunong paglakaw, nahikatawa­ng nagtan-aw sa anak nga kalit mipusdak sa sakong sinudlag mga lubi.

“Ayawg pun-a nang sako. Sudli lang nag igong mapas-an,” ni Lilay.

Gihaw-as ni RayJun ang ubang mga lubi dayong sakwat sa sako dihang hamabaw na lang sa sulod. Wa gihapon niya ikapatong sa abaga. Nahibalik og kabusdak.

“Bug-at pa gihapon!” ni RayJun nga nakapahika­tawa ni Mama niya.

“Haw-asi pa gihapon. Wa man god ka maanad,” ni Lilay nga nahimuot nga nagtan-aw sa iyang anak.

Nahimuot silang Mundo ug Lilay nga nagtan-aw kang RayJun nga nagsusapin­dayng naglakaw, nagtikubon­g nagpas-an sa tunga sa sakong lubi.

“Haskang luoya tan-awon sa atong anak. Makalakaw lag pila ka lakang, ibutang ang dala,” ni Lilay samtang nag-esnak silang Mundo sa balon nilang hinog nga saging lakatan ug maruyang saging nga gardaba nga giparesag lemon juice.

“Maayo nang makatilaw siya. Basig makahunahu­na na siya pag-eskuylag tarong,” ni Mundo dayong puno: “Pag-esnak una diri, RayJun.”

“Sakit kaayo ning akong abaga sa gahing mga lubi nga akong gipas-an,” ni RayJun human ikabundak ang gipas-ang sako ibabaw sa mga lubing hinakot nilang Mama ug Papa niya.

“Kon nagtarong ka pag-eskuyla, di unta ka masugamak ning bug-at ug lisod nga trabaho. Mao ganing gipaeskuyl­a ka namong Papa nimo aron makabatog trabahong sayon. Apan nagyabagya­bag ka lang, naghubog-hubog ug nagsiyabu pa gyod.”

“Suwerte ka gani, RayJun, nga silas Chief Digno ug Judge Salvanera wa motugot pagpreso nimo. Ipapreso man gyod unta tika aron maamgohan nimo ang kasakit nga among gibati. Ug karon, bagnati kag trabaho ning lisod ug bug-at nga pangita sa mga mag-uuma. Mag-agwanta kag pas-an uban namo nianang nahugnong mga bunga sa lubi,” patin-aw ni Mundo.

SA pagpanglab­ay sa mga adlaw, si Lilay ingon sa gibati nag kabalaka.

“Labihang luoya na gayod tan-awon sa atong anak,” pulong pa ni Lilay nga ingon sa gibati nag kaluoy ug kabalaka sa anak nga di na magtingog-tingog. Di na gani makigsulti kang Lola Toyang niya nga maoy tig-andam niyag pagkaon.

“Ato siyang pasagdan, Lilay, nga maoy mosulti unsay angay niyang buhaton: magpapreso ba siya o moeskuyla? Morag maayo alang niya ang magpapreso kay way lisod nga trabaho, magsige lag lingkod-lingkod, higda-higda sulod sa presohan. Kon moeskuyla siya, labing maayo. Apan kinahangla­ng magtarong gayod. Kon mousab siya paghubog-hubog ug pagsiyabu, ako na gayod siyang ipapreso bisag tutol silas Judge Salvanera ug Chief Digno. Kay di na gayod ako motugot nga iya lang gihapong binuangan ang maayo natong plano ug pangandoy alang kaniya,” ni Mundo.

Ug tuod man, usa niana ka adlaw, sila si Lilay ug Mundo nangalipay nga miduol kanila si RayJun samtang sila namahulay sa ilang beranda human sa ilang paniudto.

“Mama…Papa, moeskuyla na lang kog balik. Magtarong na gyod ko. Likayan na nako ang mga barkada. Mag-ulian na lang ko nganhis ato kay naa may akong scooter. Didtos ilang Auntie Soling sigehan man kog adtos akong mga barkada,” sugyotpasa­lig ni RayJun.

Tungod sa labihang kalipay, si Lilay migakos sa anak samtang nagkanayon: “Sus, kanindot, Anak, kon mao nay imong buhaton! Sangko sa langit ang akong kalipay! Basig matuman ra gayod ang pangandoy namong Papa nimo nga mahimo kang abugado,” pulong pa ni Lilay nga ang mga mata gilugmawan sa luha sa kalipay.

“Mao nay akong gipangando­y nga imong buhaton, RayJun. Kami si Mama nimo maningkamo­t kanunayng hayahay ang imong pag-eskuyla nga sangkap sa tanang panginahan­glan. Naay among giandam nga hustong panggasto hangtod mahimo kang abugado. Brayt ka god, RayJun,” ni Mundo nga miagbay gayod sa iyang anak nga sa unang higayon mihatag kanilag nindot nga pasalig.

Pagkasunod adlaw, si RayJun sayong gikuyogan sa iyang mga ginikanan aron kapasaliga­n ang maestra nga moeskuylag balik ang ilang anak nga dili na magsigeg palta.

Sa mingsunod nga mga adlaw, nahimong hapsay kaayo ang dagan sa pag-eskuyla ni RayJun. Tagsayo nang mahiuli human sa ilang mga klase sa hapon. Sa labihang kalipay nilang Mundo ug Lilay, gihatagan na sab nilag dakong panggasto si RayJun.

Sa mingsunod nga mga adlaw, si RayJun nagpakitag talagsaong kakugi. Nagtuon na kanunay sa ilang mga leksiyon matag gabii. Sa matag Sabado ug Domingo, makigdula kang Aura nga gikalipay sab kaayo sa iyang manghod.

“Dako kaayog epekto ang gihimong pagpakuyog nato kang RayJun didtos atong kalubihan. Iyang nasuta nga labihang lisora gayod sa trabaho natong mga mag-uuma,” ni Lilay dihang gibalibara­n na sab ni RayJun ang kanhing mga barkada nga gustong modala kaniya ngadto sa salmotan nilang basketbol.

“Hinaot untang makatapos gayod siyas pag-eskuyla ug mahimong abugado,” dason ni Mundo nga ang tingog naghulad sa pangindaha­yng hinukad sa iyang kahiladman ug kalag.

NAHIABOT sa ilang balay si Sian Ming nga suod kaayong klasmeyt ni RayJun didto sa Divine Mercy nga sinati sab nilang Lilay ug Mundo kay ang mga ginikanan maoy suki nilang komprador.

“Birtdey man god nako, Nang Lilay ug Noy Mundo, maong kinahangla­ng ikuyog nako si RayJun ngadtos among Waterfall Mountain Resort sa bukid. Gusto sab nilang

Papa Wang ug Mama Chengli nga pakuyogon gyod mo isip espesyal nilang bisita. Kay anibersary­o sab nilang Mama ug Papa. Kay kamo goy dakong suki namo sa lubi. Tulo ka adlaw ang giandam nilang gastos pangaligo didtos among resort. Total, wa man miy klase si RayJun kay naganid man ang pista opisyal sa mga adlawng Sabado ug Domingo,” patin-aw sa klasmeyt nga Insek ni RayJun.

“Nindot unta nang higayonas birtdey nimo, Sian, nga anibersary­o sab nilang Mama ug Papa nimo. Ang nakaporki lang kay nagsige pa mig hakot sa nahugno namong mga lubi. Di mahimong biyaan kay pangawaton kon dugayng mahakot. Si RayJun ray ikuyog kon gusto niya.”

“Mama… Papa, gusto ninyong mokuyog ko?”

“Si Sian Ming man ning nagdapit nimo, di nato kabalibara­n. Total nakita namong naningkamo­t ka na gayod sa pagbag-o,” pamulong nilang Lilay ug Mundo nga nangalipay kaayo nga ang yabag nilang anak, karon, molakaw lang kon ilang tugotan.

(PADAYONON)

 ??  ?? “Bug-at man diay kaayo ni!”
“Bug-at man diay kaayo ni!”
 ??  ??

Newspapers in Cebuano

Newspapers from Philippines