Nagpahipi Nga Ginagmayng Milagro

“The Lord will set things right, in that I put all my faith.”

WALAY puas ang pagdangat sa mga milagro sa atong kinabuhi. Apan mahimo nga sa daghang higayon dili lang kita makamatikod niini, ilabi na kadtong maingon nga ginagmayng milagro. Usahay pod mahimong sa atong pagtan- aw maoy magpasulabi ang mga suliran busa masalimbongan ang milagro nga diay nagpahipi niini.

Niining bag- o pa lang, nakasinati ako og suliran diin adunay nagpahipi nga milagro. Tingali, alang sa uban, gamayng butang ra ang panghitabo nga akong naagian. Apan alang kanako nga mao mismo ang hingtungdan, dako ug makahuloganon kini. Busa buot ko gayod kining ipaambit agi og pasalamat ngadto sa Kahitas- an.

Subay sa tambag sa doktor nga akong gikonsulta, gikinahanglan nako nga mosulod o magpa- admit sa hospital alang sa pagtino pinaagi sa biopsy kon unsa gayod ang mga kadudahang napanid- an sa CT- scan dinha sa pipila ka bahin sulod sa akong lawas.

Sanglit ako ug ang akong asawa ( nga managsamang senior citizen) ra maoy nagpuyo sa among balay, ang unang suliran nga among gikaharong kalabot sa akong pagpa- admit sa hospital mao ang pagpangita og ikauban ug moabagabag sa akong asawa dinha sa balay mentras atua ko sa hospital. Kaluha niini nga suliran ang pagpangita pod kinsa ang mokuyog isip akong tigbantay o watcher sa hospital. Nahimong suliran kining mga butanga sanglit wala man god miy suod nga kabanay sa duol nga madali- dali og hangyo alang sa tabang sa ingon niini nga mga sitwasyon.

Nahadiin- diin mi og pangontak sa mga kaila ug higala aron magpatabang nga makakuha og ikauban sa akong asawa ug ingon man akong tigbantay. Apan hapit tanan namong gipangontak mibalibad nga wala silay nakit- an nga makatubag sa among panginahanglan. Naningkamot man pod sila sa pagpangita pero maingong demalas kay wala gyoy nakita. Paglabay sa pipila ka adlaw sa ingon niining sitwasyon, giabot na mi og kahingawa. Unsaon na lang kon wala gyoy igkita nga makauban ni Misis sa balay ug makabantay pod nako sa hospital?

Unya, sa dihang halos makabsan na mi og paglaom, wala damha nga mianha sa balay ang among silingan nga sastre kinsa usa sa among gihangyo pagtabang pagpangita og makauban ni Misis sa balay. Kuyog niya ang usa niya ka

Alang kanako, kining maong nahimo nakong kasinatian nagmatuod nga atubangan sa ingon sa lisod kaayo ug makapalusno nga mga sitwasyon dili gayod kita angay mamuhi sa atong pagtuo ug pagsalig, dili mohunong sa pagpangaliya, ug sa kaulahian ang Kahitas-an magahatag kanato og milagro.

pag- umangkon kinsa misugot nga maoy mahimong kauban ug kaabag ni Misis sa balay. Hay, daghang salamat! Maingon gyod nga usa kini ka milagro alang kanako sanglit wala man gyod mi magdahom nga naa ra diay sa among silinganan ug kadto pa lang gyod ikahimamat ang maong pag- umangkon sa among kailang sastre.

Dayon, nagmensahe sab pinaagi sa Skype ug FB Messenger ang usa namo ka anak nga atua sa laing nasod. Nakaestorya kuno niya ang usa niya ka amiga dinhi kinsa kauban niya kaniadto sa gitrabahoang opisina ( ug nakauban pod nako sa mao gihapong opisina). Sa ilang panagestorya, gilakbitan niya ang mahitungod sa among problema pagpangitag makabantay nako sa hospital. Ug giboluntaryo sa iyang amiga ( nga ako pong amiga) ang usa niini ka anak aron mahimo nga akong watcher. Giingnan ko sa akong anak nga kontakon ang among amiga. Abtik ko nga mikontak sa among amiga, ug tuod man nasulbad ang among problema kalabot sa mahimong watcher nako. Milagro gihapon kini alang kanako sanglit panalagsa ra gyod intawon ko magkontak- kontak sa mao nakong amiga pinaagi sa FB, ug ang ako pa gyong anak nga atua sa gawas sa nasod maoy nahimong dalan aron masangpit ang iyang tabang.

Dako ang among pagpasalamat sa Kahitas- an sa pagtubag sa among hilom apan walay puas nga pag- ampo pinaagi sa paghatag og kasulbaran sa among labad gikan sa mga tinubdan nga wala damha. Ambot unsay imong itawag niini, pero basta alang kanako usa kini ka milagro.

Ug labaw pa gyod nga milagro ang nagpahipi sa misunod nga mga panghitabo.

Human nga nakapa- swab test ako ug ang akong watcher segun sa gikinahanglan sa hospital aron maadmit, gihatod na mi sa akong kompare ( ugangan sa among kamanghorang anak) ngadto sa hospital nga maoy gisabotan namo uban sa mga doktor nga moatiman sa pag- biopsy kanako. Buntag sa adlaw nga Lunes kadto. Pipila ka oras ang among gigugol pagpaningkamot nga makasulod ko sa maong hospital. Apan naabtan na lang mi og hapit tingpaniudto, wala gyod mi makasulod kay matod pa walay bakante nga kuwarto nga kabutangan nako.

Gitawag nako ang usa sa mga doktor nga moatiman kanako aron siya pahibaloon sa sitwasyon ug mangayog tambag gikan kaniya. Mitawag siya sa hospital aron tabangan kami nga makasulod. Pero udtong tutok na lang, wala gyoy klarong resulta. Misugyot na lang ang doktor nga moadto mi sa hospital diin siya nahimutang ug didto mosulay pagpaadmit.

Human makapaniudto, minglahos mi sa hospital nga gisugyot sa doktor. Gipaubos na pod mi sa proseso sa screening alang sa pagpaadmit. Apan misangko gihapon kini sa pag- ingon sa mga taga hospital nga wala gyod silay bakanteng kuwarto niadtong higayona. Hinuon, matod pa nila, posible nga dunay pasyente nga makagawas o madischarge nianang hapon o kaha pagkaugma. Giingnan mi nga kon naay mabakante nga kuwarto, ila kining ireserba para nako.

Kay hapon na man, mingdesisyon mi nga dili na magdugay pa og hulat- hulat didto sa hospital. Maayo kay misugot sab ang inahan sa akong watcher nga didto na lang usa ko sa ilaha magpondo hangtod pagkaugma mentras magpaabot nga naay mabakanteng kuwarto. Mao nga gihatod na mi sa akong kompare sa balay sa akong watcher ug dayon gibilin na lang ko didto samtang siya milarga pauli sa ilaha nga medyo layolayo pod. Dako ang akong pasalamat sa akong kompare kay giunongan gyod ko niya sa paghulat- hulat ug pagbalhin- balhin og hospital nianang adlawa.

Pagkaugma sa buntag, nanawag mi sa ikaduhang hospital nga among giadtoan. Haskang lipaya nako dihang gisultihan mi nga naa nay bakanteng kuwarto. Mao nga wala na mi maglangan, nanawag dayon mi og taksi aron mohatod kanamo sa hospital. ( Nagtaksi na lang mi kay naikog na ko sa akong kompare nga pabalikon aron naa miy sakyanan.) Pag- abot sa hospital, giproseso dayon namo ang tanang gikinahanglan alang sa pagpaadmit.

Apan dihang igo na lang unta mi mohatag sa pasiunang balayranan aron maadmit na gyod, miabot ang doktor kinsa maoy mitabang namo nga makasulod didto. Giingnan mi niya nga dili modayon pagpaadmit didto kay ang makina didto para sa CT scan nga gikinahanglan sa akong pagpa- biopsy naguba ( nasunog ba to o mibuto) nianang niaging gabii. Sa ato pa, bisan pag duna na koy kuwarto, dili gihapon mahimo ang pag- biopsy kanako kay wala man ang importanteng himan para niini. Usa pa ka labad kon mingdayon mi og sulod mao nga gibalibaran ang akong kuyog nga watcher nga mosulod sa hospital tungod kuno sa iyang edad ( 19 anyos) ug dili pa gyod nako kadugo. Tungod niini, mapugos gyod ko sa pagpangita ug propesyonal nga watcher (PDN o private duty nurse ang tawag) nga dili gyod nako kaila ug tag- usa ka gatos ka pesos ang bayad kada oras.

Ingon sa nahugno na pod ko sa maong panghitabo.

Huyhoy ang abaga nga mibalik na pod ko uban sa akong watcher ngadto sa unang hospital aron manimpalad na sab nga makakuha og kuwarto. Apan pag- abot namo didto, sama ra gihapon kagahapon ang estorya— walay bakanteng kuwarto. Miingon ang akong doktor pinaagi sa teks nga iya kunong gisulayan pagpahiluna nga madawat ko didto bisan kon sa ward na lang ko ibutang. Apan mibalibad gyod ang hospital, dili kuno ko nila puyde ibutang sa ward.

Mao nga wala kamiy nabuhat kondili moadto na lang sa lain pa gyong hospital ( ikatulo na namo ning hospital nga giadtoan sulod sa duha lang ka adlaw), manimpalad na pod nga makakitag bakanteng kuwarto.

Samtang nagpadulong mi sa ikatulong hospital, naghunahuna na ko unsay posibleng laing opsiyon kon ugaling dili gihapon mi kakitag bakanteng kuwarto didto. Maingon nga medyo desperado ang maong opsiyon nga akong gihunahuna pinasikad pod sa gisulti kanako sa doktor: magpaadmit ko sa ikaduhang hospital nga among naadtoan pero ang pag- biopsy adto buhaton sa unang hospital kay naa didto ang kahimanang gikinahanglan ( buot ipasabot, gaandar nga makina sa CT scan). Mas dako og gasto ug mas dako ang hasol niini kay ihatod man ko og ambulansiya gikan sa ikaduha ngadto sa unang hospital ug dayon balik sa ikaduhang hospital human sa pag- biopsy. Gawas pa, magkuha pod ko og medyo mahal og bayad nga propesyonal nga watcher kay dili man dawaton ang akong dala nga watcher sa hospital diin iadmit ko.

Apan pag- abot namo sa ikatulong hospital, nahanaw ang tanan nakong kabalaka ug kahigwaos ug ingon sa naibtan ko og dakong tunok. Tungod kini kay gisultihan kami didto nga naay bakanteng kuwarto nga ilang kabutangan nako. Dugang pa, lahi sa ikaduhang hospital nga among giadtoan, walay daghang kiyaw- kiyaw bahin sa akong watcher: okey ra nga pasudlon siya uban kanako ug, sa ato pa, dili na ko mamroblema pa pagpangita ug pagsuhol og mahal sa propesyonal nga watcher nga dili gyod nako kaila. Mapasalamaton pod ako niining hitaboa kay sa kataposan nakasulod ra gyod kog hospital mentras wala pa mo- expire ang validity sa akong swab test.

Alang kanako, kining maong nahimo nakong kasinatian nagmatuod nga atubangan sa ingon sa lisod kaayo ug makapalusno nga mga sitwasyon dili gayod kita angay mamuhi sa atong pagtuo ug pagsalig, dili mohunong sa pagpangaliya, ug sa kaulahian ang Kahitas- an magahatag kanato og milagro. Ug angay usab natong hinumdoman ang pagpasalamat sa matag milagro, bisan unsa kagamay, nga atong matagamtaman.

(KATAPOSAN)