NAGLIKAY OG SAMOK
Paghuman sa interbyu sa usa ka aplikante pagka sekretarya, nag-estoryahay ang HR ug ang manedyer...
HR: Unsa man, Sir, dawaton nato tong atong bag-ong giinterbyu? Sa akong paminaw, kalipikado man to ug maayo sab og kinaiya.
Manedyer: Bitaw, uyon ko nimo nga puyde kaayo to siya para magsekretarya. Pero dili lang gyod ko komportable nga dawaton siya. Maglikay lang ko og samok unya sa balay.
HR: Ha? Ngano diay, Sir? Manedyer: Honey man god ngalan adtong aplikante. Kahinumdom ko nga naa koy amigo nga manedyer pod sa laing kompaniya nga ang iyang sekretarya Honey ang ngalan, ug maoy nahimong hinungdan nga napusposan siya sa iyang asawa.
HR: Unsa pod pagkahitaboa nga naingon man ana, Sir?
Manedyer: Kausa, mentras naa siya sa ilang balay, naa siyay gipaagpas og trabaho sa iyang sekretarya mao nga iya kining gitawgan sa telepono. Naatol pod nga dinha ra sa duol iyang asawa. Pagkadungog nga gitawag niyag Honey ang iyang kaestorya sa telepono, nagselos dayon kini ug walay pupangutana nga gipusposan siya.
HR: Ay, mao ba, Sir? Sus, selosa baya kaayo imong misis, no? Sakto gyod ka sa imong desisyon nga dili na lang dawaton to si Honey kay basig makulatahan pa unya ka.
ERIC S.B. LIBRE Davao del Sur