Boarding House
(Gula 3)
DILI ko gustong magdugay sa kuwarto ni Reuben tungod kay gibati ko ang tumang kabakikaw. Gipakisayran ko dayon siya unsay iyang tuyo nako. “Ngano bang gipaanhi man ko nimo?”
Gipangutana ko siya sa tingog nga maguwang lang og gamay sa hagawhaw.
“Gusto lang kong makigsulti nimo,” tubag ni Reuben. “Unya nganong anhi man gyod sa imong kuwarto?”
“Mas maayo dinhi kay safe. Mas kuyaw kon akoy manaog ug mosulod sa imong kuwarto. Tingalig dunay makakita nako ug magduda. Samtang ikaw, walay mahibulong nimo kon mosaka ka dinhi sa taas kay inyo man kining balay.”
Wala ko motingog.
“Lisod kaayo ning atong kahimtang, no?” pangutana ni Reuben.
“A-ang unsa?” Misumbalik kog pangutana niya.
“Kining atong pagtago sa atong relasyon.”
“Pasensiya ka na. Maglikay lang ta sa kagubot.”
“Pero hangtod kanus-a man kaha kutob ning atong pagtago sa atong relasyon?”
“Wala ko masayod. Basta kutob sa mahimo, tagoon ta kini.”
Mipatunga na usab namo ang kahilom.
“Nahigugma ka ba gyod nako, Kaycee?” Misukit si Reuben. “Nagduhaduha ka ba diay?” Gisumbalik ko siyag pangutana. “Dili mahitabong sugton ko ikaw kon wala pa ko mahigugma nimo. Gisupak ko ang pagbuot sa akong mga ginikanan tungod sa akong gugma nimo.”
“Kon mao kana, andam kang manalipod sa atong gugma kon magkinaunsa man?”
“S-sa pagkakaron dili pa ko andam. Mao man gani nga gihangyo ko ikaw nga itago lang una nato ang atong relasyon. Sagdi lang. Inig-abot sa hustong panahon, ako mismo ang mobutyag ngadto nila ni Papa ug Mama sa atong relasyon.”
Nakalitan ko sa dihang kalit nga migakos si Reuben nako. Unya giukoban niya ang akong mga ngabil.
Wala ko makatutol sa gibuhat ni Reuben nako. Bisan nakalitan apan wala ko mag- over react. Mao na lamay akong naamgohan nga nakigtigi na ako sa pagpakighinagkanay kang Reuben. Unang higayon nga natagamtaman ko ang katam-is sa halok sa usa ka lalaki. Nabatyagan ko ang dili mahubit sa pulong nga kalalim. Unya sa dihang milunga na siya…
Wala na gayod malilong ni Kaycee ug Reuben ang ilang gitagong relasyon. Gipalayas si Rueben sa boarding house...
“Nasuko ka ba nako, Kaycee?” Gipangutana ko niya.
“Wa man.”
“Salamat.”
Ug migawas ko sa kuwarto ni Reuben. Nanaog ko ug midiretso sa akong lawak.
Pagkasunod semana, mibalhin og puyo sa among balay si
Dina nga akong classmate. Siyay miabang sa nahibiling usa ka bakanteng kuwarto sa taas. Sukad nga nag- board si Dina sa among balay, kanunay na kong mosaka sa taas. Magtambayayong kami si Dina sa paghimo sa among assignment. Usahay, lawom nang gabii nga mogawas ko sa lawak ni Dina.
Usa ka higayon niana giatangan ko ni Reuben. Nakugang ko kay sa paggawas nako sa pultahan sa lawak ni Dina, mitagbo man nako si Reuben. Iya kong gibitad paingon sa iyang lawak. Sa sinugdan, nagdumili ko. Apan kay mapugsanon man kaayo siya, gipaundayonan ko na lang siya. Wala na lang ko magdaghan og langas kay basin may makadungog hinuon kanamo kon makamugna mig commotion.
“Ngano na man sab?” Gipangutana ko si Reuben sa dihang didto na kami sa sulod sa iyang kuwarto. “Naa baya sila si Papa ug Mama.”
“Nangatulog na sila niining orasa,” ni Reuben pa.
Ug sa kalit lang gigakos ko ni Reuben. Unya giukoban niya paghalok ang akong mga ngabil. Mora kog nabatobalani. Nakighagkanay na lang sab ko niya. Apan wala gyod ko magpakalimot sa akong kaugalingon kay mipatigbabaw gyod ang akong kahadlok nilang Papa Amado ug Mama Marlinda. Nanamilit ko niya. Nanaog ko ug misulod sa akong kuwarto.
Miabot ang panahon nga ingon sa inanay nang nakamatikod sila si Papa Amado ug Mama Marlinda nga may relasyon kami si Reuben. Usa ka higayon niana, nakit-an kami si Reuben ni Mama Marlinda nga nagkuptanay kami sa among mga kamot. Gipakigsultihan ko ni Mama. Iya kong gipatug-an sa tinuod. Apan wala gyod ko motug-an nga may relasyon na kami si Reuben.
Namatikdan nako nga ingon sa wala motuo si Mama Marlinda sa akong gisulti nga friend lang kami si Reuben. Nagtuo gyod siya nga kon dili man nako boyfriend si Reuben, may mutual understanding na kaming duha. Pero hugot gyod nakong gi- deny ang iyang gipanulti.
Usa ka hapon niana sa akong pagpauli gikan sa eskuylahan, naabtan ko sila si Papa Amado ug Reuben nga seryosong nagsultihay. Naniid lang ko nila. Human sa ilang panagsulti, nakita ko si Reuben nga misaka sa itaas sa balay nga masulub-on kaayo ang panagway.
Kay dili man ko makahigayon pagpakigsulti kang Reuben sa personal, mi- chat lang ko niya aron akong masayran kon unsay gipanagsultihan nila ni Papa Amado. Mi- reply dayon siya. Gipahibalo ko niya nga manghipos na siya sa iyang mga gamit kay gihinginlan siya sa akong amahan.
Nakugang ko sa kasayoran nga gitug-an ni Reuben nako. Mi- chat na pod kog usab niya aron akong masayran nganong kalit man kaayo ang desisyon ni Papa Amado sa pagpapahawa kaniya. Akong nasayran nga gusto diay ni Papa nga magkalagyo kami si Reuben. Nagduda na usab diay si Papa nga may relasyon kami si Reuben.
Nasubo ko sa maong kasayoran. Apan unsay akong mahimo? Dili mahimong pugngan ko si Papa Amado sa iyang paghingilin kang Reuben. Tingalig moulbo hinuon ang dakong kagubot kon buhaton ko kini.
Niana dayong pagkagabii, mibiya si Reuben sa among balay. Segun sa iyang message sa messenger, adto siya mobalhin og puyo sa boarding house nga giabangan sa iyang classmate.
Sukad sa pagbiya ni Reuben sa amo, wala gyod ko makighisgot sa akong mga ginikanan mahitungod kaniya. Wala ko magpakitag kahingawa ug pagpakabana bahin kang Reuben aron magtuo gayod sila si Papa ug Mama nga wala kamiy relasyon si Reuben.
Sa pagbiya ni Reuben sa balay, kanunay na kaming magkita sa gawas. Usahay adto mi sa IT Park mag-abot. Kinawat-kawat ang among panagkita. Nagbantay gyod mig maayo nga dili mi masakpan nila ni Papa Amado ug Mama Marlinda. Unya usa ka higayon niana mi- chat si Reuben nako nga magkita kami.
(SUMPAYAN PA)