DOKTOR DE PULPOL
Naay bag-ong gradweyt nga doktor nga miuban sa karaang doktor sa probinsiya. Mingbisita sila sa usa ka panimalay nga ang tag-iya misulti nga gasakit daw ang iyang tiyan. Nahulog sa tiguwang nga doktor ang iyang stethoscope ug miduko para puniton. Paghuman, misulti lang siya...
Doktor Ben: Nasobrahan lang kag kaon og mga prutas. Menosi lang imong kaon og prutas ug mamaayo na imong tiyan.
Pagbiya nila sa panimalay, nangutana ang batan-on nga doktor...
Dok Julius: Gitan-aw lang man nimo siya, Dok. Nganong nakahibalo man ka nga daghan siyag gikaon nga prutas?
Dok Ben: Pagpunit nako sa akong stethoscope, Dok, nakit-an nako sa ilalom sa iyang katre nga daghan og panit sa saging.
Dok Julius: Ah, mao ba, Dok? Buhaton na nako sa sunod na panimalay.
Sa sunod nga panimalay, naay usa ka angkay nga miingon nga pirme daw siyang gikapoy. Nahulog pod kunohay ang stethoscope ni Dok Julius ug gipunit niya. Human niini, misulti siya...
Dok Julius: Gikapoy ka kay sige man ka og serbisyo sa inyong simbahan. Menosi lang ang imong pagserbisyo sa simbahan ug mawala na ang imong pagpangapoy.
Sa pagbiya na nila sa panimalay... Dok Ben: Nganong nakahibalo man ka nga nasobrahan siya sa serbisyo sa ilang simbahan?
Dok Julius: Pagduko god nako, nakit-an man nako ang ilang pastor nga nagtago sa ilalom sa iyang katre. ANTHONY LOCSIN Davao City