Ang Pagkatawo Ni Celestine Louise Panahon sa Pandemya

SEPTIYEMBRE 27, alas 2:00 sa hapon. Miadto mi sa Dakbayan sa Mati diin nahimutang ang ob-gynecologist sa akong asawa. Mao na kini ang kinaulahiang higayon nga ma- test ang sitwasyon sa among anak sulod sa tiyan sa iyang inahan. Ang resulta, hapit na kuno mogawas ang bata. Layo ra ang Oktubre 5, matod pas doktor. Ang gilay-on: 1 cm gikan sa puwerta.

Pagkahuman namo og pakonsulta sa doktor, nangaon mis Idlings. Sus, pagkalami sa mga pagkaon didto. Nindot ug hamugaway ang ilang kan-anan. Dihay dagkong mga bulak samas philodendron, photos, black majesty, black cardinal ug uban pang mokatay nga mga buwak. Wa na ko kaila sa uban. Ang resulta:

Buot namong ilisdan ang iyang ngalan apan ang akong sulti sa akong asawa, ayaw, kay kining ngalana ang nakigharong sa bayrus. Isog kining bataa sa mga hagit sa kinabuhi. Ug kon mohamtong na siya, ako kining isugilon kaniya.

gipunga ko human og kaon tungod sa kabusog.

Mga alas 6:00 sa hapon, kilumkilom ming mingbiyahe pauli sa akong asawa. Hinay ra akong padagan, mga naas 60-70 kph sa among Toyota Vios. Lain ning sakyanana kay way tingog sa sulod kon modagan na. Mao nga gamit kaayo pirme ang side mirror. Pag-abot sa Badas, liko-liko na ang dalan— kining dalan nga morag bitin ang porma. Nagsugod og lain akong paminaw. Tingali resultas kabusog, nalipong ko samtang nagmaneho.

Ako rang giuyon-uyonan ang akong paminaw. Hangtod, pagabot namo sa View Deck, diin makit-an ang Sleeping Dinosaur, pagliko nako sa tuo, ang siko kaayo nga bahin sa dalan, dihay

10 wheelers nga akong gikasugat. Wa ko kabantay ug dili nako matantiyar ang distansiya sa sakyanan. Maayo na lang kay nakatamak dayon kos break, ug nahunong ang sakyanan tunga sa dalan. Ang elf nga nagsunod namo, hapit pod mabangga sa among likod dayong sirbato niya sa amo human mioberteyk. Mikusog ang pitik sa akong dughan. Nabalaka. Padayon ang akong kalipong. Akong gi- hazard ang sakyanan ug mipadaplin. Akong gihilam-osan ang akong dagway sa alkohol aron makamata. Dayon, misimhot sa Vicks nga gihatag sa akong asawa.

Nakauli ming safety sa balay. Wa na mi manihapon kay busog na man. Nag-estorya-estorya sa mi sa akong asawa sa nahitabo sa dalan. Wa daw siya mabalaka matod pa niya, aron di kuno pod ko maratol sa pagmaneho. Relax ra kuno siya samtang ako, tagbaw nag bawi sa manobela aron di mabangga sa dakong sakyanan.

Mga alas 8:00 sa gabii, misugod nag hapyod-hapyod ang akong asawa sa iyang bat-ang, sa may likoran niya nga bahin.

Ako siyang gipangutana kon naunsa siya. Mingisi siya nga mora kunog sakit na ang iyang tiyan. Pero mawala ra man pod kuno kon molakaw-lakaw siya. Mao nga nagngadto-nganhi siya sulod sa balay unya taudtaod milingkod. Misakit na pod. Balik-balik ang sakit dili moubos sa singko minutos.

Dali siyang nahinumdom sa iyang gitan-aw sa youtube sa mga kaagi sa mga nanganak kon unsay timailhan una manganak. Among gitaymeran kon kanus-a mosakit ug kanus-a moundang. Hangtod nga kadugayan namog taymer, di na man kuno niya makaya ang kasakit. Klaro sa iyang dagway nga maguba na gyod sa kasakit. Extreme na ang kasakit sa iyang likod mao nga iyang gipahapyod-hapyod kanako. Mao na kini, sa akong hunahuna, ang alantoson nga kasakit sa pagbati sa usa ka inahan.

Milurang ang sakit. Midesisyon ko nga mangadto na sa provincial hospital sa Mati. Mobalik na pod mig Mati, nga mao pay pag-abot namo gikan didto, diin hapit mi madisgrasya. Sa akong hunahuna, ang importante mahatod lang gyod sa ospital. Wa nay lain.

Gipaandar nako ang sakyanan. Wala nay warm-up, o painit pa sa makina. Minggawas mis garahean liko paingon sa national highway. Maayo na lang kay giandam na namo sulod sa trunk ang mga gamit sa pagpanganak usa ka buwan ang milabay.

Among gihapit ang inahan ug ang manghod sa akong asawa sa sunod nga barangay, aron adunay moalalay sa ospital. Alas 3:00 sa kaadlawon, miabot mis balay-tambalanan. Wala mi gipaderetso sa emergency room tungod kay dunay protocol nga agian. Gipanaog sa sakyanan ang pasyente ug giinterbiyu sa may booth. Nag-PPE ang personnel kinsa maoy mi- accommodate sa akong asawa.

Misugod ang akong kakulba. Misamot akong kabalaka. Nahinumdom kos kaagi namo sa Pantukan Davao de Oro baynte singko ka adlaw ang milabay. Didto sa ospital, diin unta ang among tuyo magpa- ultrasound kay dunay gibati ang akong asawa sama sa ubo ug lisod nga pagginhawa. Nagduda ang mga nurse ug doktor. Gi- rapid test siya. Ang resulta: pipila ka oras ang minglabay, positibo siya sa COVID. Gipasulod ang akong asawa