Mga Benepisyo Sa Pagbisikleta

(Unang Bahin)

TATAW man kaayo ang daghang kaayohan nga ikadalit niining pagbisikleta. Ug kining maong mga benepisyo mas naklaro dihang naghingusog ang paghugpa sa pademya sa milabayng mga bulan. Tungod sa kakuwang sa transportasyon, gipangtaktakan sa taya ug gipangdagpasan sa abog sa mga kawani nga walay kasakyan ang ilang mga bisikleta nga sulod sa dugay nang panahon gitagoan lamang sa bodega kuyog sa ubang biniyaan nga gamit. Sulod ning panahona, dili magamit ang mga sakyanan ug gipangtangkolan ang mga sakyanang pampubliko aron malimitahan ang lihok sa mga tawo. Sa ingon nga paagi, malimitahan usab ang virus sa paspas niining pagkuyanap.

Buyon niini, ang katilingbang trabahante nahibalik sa bicycle culture nga wala na untay nagkabana kay nahimo nang naandan ang paggabling sa manobela sa de gasolina nga mga kotse ug de pasaheroan nga mga bus. Sa wala pa ugod ang pandemya, ang pagsakay sa bisikleta giisip man lang nga kalingawan ug maihap lang sa tudlo ang migamit gayod og bisikleta alang sa transportasyon. Apan sa dihang naghinandas na ang pandemya ug wala nay mahinol ang mga tawo alang sa ilang mobility, hapit tanan nahibalik sa paggamit sa kaugalingong kusog aron himoong puhunan nga makasulod sa ilang mga buhatan.

Ug busa, kadtong mga bisikleta nga wala nay mga ligid, gipamalitan og ligid. Ang mga nangaotso na nga mga yantas, gipang-ilisdan og rayos. Ang nangaputol na mga mga kable sa preno gipangbag-ohan og kable. Ang mga kango nga crank ug head tube, gipanghugtan. Ang nangatursi na nga manobela gipangtul-id. Ang importante nga adunay kasakyan aron makasulod sa trabaho.

Matod sa nahinabi natong usa ka tig-atender sa usa ka baligyanan og bisikleta ingon man nga piyesa, pagsugod gyod sa lockdown, napilo-pilo sa kadaghan ang ilang halin. Ang kinitaan sa mga negosyante kansang patigayon may kalabotan sa industriya

sa bisikleta lupig pay nakakuykoy og tesoro nga linubong. Labihang kusoga sa ilang negosyo nga sila na mismo ang moisa sa mga kamot pagtimaan nga sila gusto nang mamahulay kay kuwang na lang mapugtas sa pag-atiman sa nanaglinya nga mga mamalitay og piyesa. Apan dili pabangbang ang mga kostumer. Kaadlawon pang dako, pukawon na sila sa daghang mamalitay kay gustong moima og bearing, kadena, ligid, pedal, manobela, o kaha espraket. Ug sa kahaponon, halos na lang bangilan ang pultahan sa tindahan aron dili katrangkahan kay naa pay gustong mopalit og piyesa. Tungod sab niini, atong nahibaw-an nga usa ka bantogan nga tighimoan og bike components ang naglisod na pag- supply og piyesa ngadto sa lainlaing bike manufacturer tungod sa kalit nga pagtaas sa panginahanglan. Sa ato pa, sila mismo nga naa sa sulod sa industriya wala makapangandam niining kalit nga pagkatuis sa dagan sa panginahanglan sa bisikleta.

Sa usa ka kilab, ang kultura sa pagbisikleta nabanhaw.

Sa mga ingon kanato nga nabata na sa bisikleta, pangitaon na man gyod sa lawas ang pasingot nga mugna niining maong imbensiyon. Mora man god og kining bisikleta tipik na pod sa atong lawas. Kay ultimo mopalit lag kape sa eskina, dayon mag takirong sa kagangkagang nga bisikleta o kaha kanang makighinabi sa mga estambay, dili man mawala ang bisikleta nga himong lingkoranan samtang makigkomedyahay sa uban pong estambay. Hinuon, maingon nga mapihigon kita sa pagpili sa pagbisikleta kay kini na man ang atong hilig taliwa sa daghan kaayong paugnat sa kusog nga anaa sa gawas. Tinuod nga makalingaw man pod ang pagduwa og basketbol o kaha balibol. Apan kining bisikleta may iya gayong tekstura sa kalingawan ug kalipay nga iyaha lamang.

Segun sa Cycling Weekly, adunay nag-unang mga benepisyo ang pagpili sa bisikleta isip kalingawan o kaha paagi sa transportasyon. Ato kining tagsa-tagsaon paghisgot:

Makapahimsog sa Panghunahuna

ADUNAY pagtuon nga nagpamatuod nga kadtong aktibong

Ug makatabang niini ang paglista sa mga pagkaon nga gipasulod sa lawas ug kuwentahon ang sulod niini nga calorie. Apilon sab sa pagkuwenta ang ubang kalihokan sanglit dili man lang bisikleta ang atong giatubang, aduna man sab tay laing buluhaton sama sa pagpanilhig, pagpanghugas sa plato, ug uban pa nga nagkinahanglan gihapon og enerhiya.

mga tawo (apil na niini ang mga nanagbisikleta) sa pisikal nilang paglihok adunay 32 porsento nga mas taas og well-being score tandi niadtong mao ray opisyo ang pagmika o kaha pagpundo sa lawas o kaha anaa tuoy trabaho apan dili kaayo mogamit sa kusog atol sa pagbansay sa ilang propesyon. Unsay ipasabot niini? Tataw nga maayo ang pangartiyo sa mga tawong nanagbisikleta kay hamugaway man kaayo ang ilang panabot sa mga suliran ug maayo ang panan-aw nila sa kalibotan. Ang mga dapit god nga suroyanan sa mga siklista o kaha mga ruta nga agian nila puno man sa makapahimuot nga kahimtang. Kini sa dili pa gani paghisgot sa pasiaw ug tistisay sa mga siklista. Wala man tingaliy gusto magbisikleta kay gustong mohilak. Tanan nga nakita nakong nagtungtong sa bisikleta sanag kaayog panagway. Ug kini nagpasabot sa kahimsog sa ilang panghunahuna.

Gawas pa niini, kon anaa kita sa paghinandas sa pag-ehersisyo, ang mga mahinungdanong kemikal sa atong lawas sama sa adrenaline ug endorphin makahatag kanatog maayong pamatyag. Ug motaas usab ang kompiyansa sa kaugalingon sa mga nanagbisikleta sanglit nahilambigit man sa pagsikad sa pedal ang tinguha kun goal nga moabot sa paingnan aron matapos na ang pagpasingot. Natural man god niadtong mga nanagbisikleta ang pagkab-ot sa kaugalingong goal sama sa pag-abot sa destinasyon nga mas sayo kay sa miaging pagbiyahe. Kining mga matanga sa motibasyon madala sa usa ka nagbisikleta ngadto na sa pagatiman niya sa trabaho. Sa ato pa, pirme siyang goal-oriented bisan sa ubang butang. Ug kon inaton nato ang argumento, mahimong ang usa ka siklista, inig-abot niya sa iyang buhatan, madala niya ang maong panghunahuna inighikay niya sa iyang obligasyon sa opisina diin siya kawani. Busa, dakog purohan nga molampos siya sa iyang trabaho tungod lang sa katawhay sa panghunahuna nga nakuha niya sa pagbisikleta.

Ang pagbisikleta man god naglangkob sa pag-ehersisyo ug sa pamatyag nga anaa ka sa gawas. Lahi kining pagbatia kon ikaw anaa lang sa sulod sa imong sakyanan nga bugnaw kaayo ang aircon. Sa pagbisikleta, mabatyagan nimo ang init sa Adlaw, ang hangin; ug madungog nimo ang mga tawo, ang mga timbaya sa mga higala o kaha dili kaila nga mowara-wara kanimo, ang mga kasikas, ang tingog sa kahayopan; ug masimhot nimo ang malabyan nga mga barbekyuhan, ang mahumot nga mga bulak; ug mabatyagan nimo ang kahagkot sa mga tungason ug ang kahayahay sa mga dulhogon— kining tanan mohatag kanimog pagbati nga dili masinati sulod sa pribadong sakyanan o kaha sa publikong transportasyon.

Dugang pa mao ang maayong mga sagabay sa mga samang mahiligon sa pagbisikleta. Sagad sa mga nanagbisikleta, sakop usab og mga grupo ug ang panaghinabi og inter-aksiyong sosyal makahatag natog katawhay sa pamatyag. Segun sa atong kasinatian, ang mga siklista atol sa ilang pagpahuway, walay hunong ang paghisgot sa umaabot nga mga biyahe o kaha ang mga tinguha sa laing proyekto sa gitibuok nga bag-ong bisikleta, o kaha sa upgrade sa piyesa nga buot paliton. Sa laing pagkasulti, ang tawhanong pakiglambigit niadtong sama kanato og hobby dakog ikatabang sa pagpahimsog sa atong panghunahuna.

Makapalig-on Sa Immune System

ADUNAY gipahigayon nga mga pagtuon nga ang pagbisikleta sa mga edaran— kadtong nanag-edad nag 85— nga lig-on gyod ang ilang immune system. Tungod niini, makalikay sila sa yanong mga sip-on o uban pang mga sakit sa upper respiratory system. Kini tungod kay samtang nagsikad sa bisikleta, lakip sa naehersisyo mao man ang atong sistema sa pagginhawa ug busa madasig kining parteha sa lawas nga moaktibo. Ug busa, makalikay sa sakit nga dala sa impeksiyon sa mga kagaw.

Kini mismo makita man nato niadtong mga nanagbisikleta nga lig-on gyod kaayo ang ilang lawas tungod kay wala man kanila ang tropikal nga mga sakit. Si Propesor Tim Noakes sa usa ka unibersidad sa South Africa nagkanayon nga bisan ang dili kaayo bug-at nga ehersisyo makapausbaw sa produksiyon sa protina ug makapapukaw niadtong mga “tapolan” nga white blood cells. Sa ato nang nahibaw-an, ang depensa sa atong lawas batok sa mga balatian anaa man sa atong white blood cells. Kon himsog kining maong mga selyula, himsog usab ang atong immune system.

Ug nganong mas maayo ang bisikleta batok sa sakit? Praktikal kaayo ang tubag. Makalikay ka sa pakiglahugay sa ubang tawo nga anaa sa naghuot nga mga sakyanan. Dinhi lang mismo sa ato, dili baya molarga ang usa ka dyip o bus kon dili pa magtagsok ang pasahero nga kuwang na lang gani nga magkabayloay ang nawong sa mga pasahero. Ang sulod sa bus, ilabi na kon serado, maoy perpektong dapit alang sa mga sakit partikular na sa virus nga maoy hinungdan sa impeksiyon. Mao man gani nga gipahunong una sa pagbiyahe ang mga publikong transportasyon sa paghingusog sa COVID-19 tungod kay ang maong matang sa espasyo haduol kaayo sa posibilidad nga mokatap ang gikalisangang balatian.

Makapaus-os sa Timbang

ATONG sayonon pagsubay: aron momenos ang ang timbang, ang calorie nga atong gisunog atong sa physical activities angay nga mas daghan kay sa calorie nga gipasulod pinaagi sa pagkaon. Tinuod nga nanginahanglan kitag calorie aron atong magamit isip “sugnod” sa atong lawas alang sa mga gimbuhaton. Apan kon menos ang atong pisikal nga paglihok, ang maong calorie mapundo lang sa atong lawas ug mahimong tambok, ug busa mousbaw ang atong gibug-aton. Busa ang solusyon, sunogon ang sobrang calorie. Ug niining paagiha, tataw nga momenos ang atong timbang.

Ang pagbisikleta makasunog sa atong calorie taliwa sa 400 ngadto sa 1,000 matag takna, depende kini sa kakusgon sa pagsikad ug sa timbang sa nagbisikleta. Dako gyod tuod ang gikinahanglan nga calorie sa pagbisikleta tungod kay dili man kini basta-basta nga matang sa pag-ehersisyo. Ang nakanindot lang pod sa pagbisikleta kay makausab ka sa imong pagsunog sa calorie pinaagi sa pag-usab sa gikusgon sa imong pagsikad o kaha sa matang sa pagtungas o sa kabug-aton sa imong karga samtang nagbisikleta.

Hinuon, dili man sad maingon nga komo nagbisikleta ka nga awtomatiko dayon nga mous-os imong timbang. Kay lami sab bayang ikaon human sa intense nga ehersisyo sama lagi niining pagbisikleta. Mao nga kon gusto gyod nga moniwang o mogaan, angay nga maglabi ang gisunog nga calorie kaysa gikarga nga calorie. Ug makatabang niini ang paglista sa mga pagkaon nga gipasulod sa lawas ug kuwentahon ang sulod niini nga calorie. Apilon sab sa pagkuwenta ang ubang kalihokan sanglit dili man lang bisikleta ang atong giatubang, aduna man sab tay laing buluhaton sama sa pagpanilhig, pagpanghugas sa plato, ug uban pa nga nagkinahanglan gihapon og enerhiya.

Ang nakanindot lang kon magbisikleta ta, mahimo ra kaayo nga dugangan ang atong diyeta og ubang pagkaon nga kaniadto atong gilikayan sanglit nasayod man ta nga kini sunogon ra pod sa lawas inigsugod na natog sikad sa atong mga bisikleta. Busa, kon maoy nahimong batasan ang pagbisikleta, dili ra kaayo ta makonsensiya kon may mga panahon nga imbitaron tag pista sanglit nasayod man ta nga tunawon ra ang pinistahan inigpauli na sakay sa bisikleta.

Makapahimsog sa Atong Baga

MORAG maingon tingali nga counterintuitive kining maong benepisyo. Kay kon sentido kumon maoy atong basehan, ang mga siklista mas dakog purohan nga makasingo sa polusyon sa gawas tandi niadtong nanagsakay og publikong transportasyon kay anaa baya sila sa gawas ug naduas sa tanang elemento.

Apan ang labing uwahing pagtuon nagpakita nga ang mga siklista mas gamay og risgo nga makahanggap og makadaot nga mga aso kaysa niadtong nanagsakay og mga kotse.

Ang usa ka pagtuon sa Air Health Campaign, Kings College London, ug Camden Council nagpakita nga ang air pollution detector nga gipatapot sa usa ka drayber, sa tigsakayan og bus, sa usa ka pedestriyan, ug sa usa ka siklista nga magagian sa masamok nga ruta sa London.

Ang resulta nagpakita nga ang drayber adunay lima ka pilo nga gitas-on sa lebel sa polusyon kaysa usa ka siklista, tulo ug tunga nga labaw ang naglakaw, ug duha ug tunga nga labaw ang nagsakay og bus. Sa laktod, mananaog niining maong pagtuon ang siklista.

(MAY SUMPAY)