Ang Pinaskohan Ni Budoy
NAADMIT sa usa ka isolation center sa Dakbayan sa Sugbo si Budoy tungod kay nag-positibo siya sa COVID19, ang pandemya nga milaygay sa minilyon ka tawo sa tibuok kalibotan. Traysikad drayber si Budoy. May asawa, si Mayang, ug duha ka anak, sila si Tupoy ug si Estoy. Duha na ka semana nga siya natanggong sa center sukad adtong kataposang semana sa Nobiyembre ug nabalaka siya sa iyang pamilya bahin sa ilang panginabuhian. Gagmay pa ang mga bata. Si Mayang nanglabada ug gamay ra ang kinitaan karon tungod sa usa ka laundry service nga natukod sa ilang dapit sa Tagunol. Ang ubang mga suki ni Mayang adto na magpalaba sa electric washing machine.
May pagmahay si Budoy sa langit kay Disyembre na karon, ang bulan sa Pasko.
Usa ka buntag, samtang naglingkod siya sa kama, nakita niya ang nars nga nagpaingon sa iyang nahimutangan. Nagsul-ob kinig protective personal equipment ug morag astronot tan-awon. Sa iyang bahin, nagsul-ob siyag face mask ug face shield. Sa iyang hunahuna, mora sab siyag piloto.
Ang nars may dalang trey. Gibutang niya kini sa kama ni Budoy. Giindiyeksiyonan niya si Budoy ug gipatomar og tabletas.
“Nagsingabot na ang Pasko. Makagawas na kaha ko, Ma’m?” matod ni Budoy.
“Di pa, Sir. Basig inigkatapos sa Disyembre pa ka makagawas. Luya pa ka. Wa pa mawala ang virus sa imong lawas.”
Nianang pagkagabii, wa dayon mahikatulog si Budoy. Gusto niya nga ikauban ang iyang pamilya sa adlaw sa Pasko, sama sa nangaging katuigan. Bisan sila kabos, malipayon silang nagsaulog sa sumad sa pagkatawo sa Balaang Bata nga si Hesus, bisag ang ilang pang- noche buena mao lamang ang sliced bread ug pansit
kanton. Unya, mikidlap sa iyang hunahuna ang rebulto ni Senyor Santo Niño sa altar sa ilang pinuy-anan. Nakapahiyom siya. Miluhod siya atubangan sa iyang kama ug nag-ampo.
“Senyor Santo Nino, bug-os ang akong pagtuo Kanimo ug sa mga milagro nga Imong nahimo. Kaluy-a intawon ako! Wad-a na ang kagaw nga nag-ulipon sa akong balatian. Hatagi kog kabaskog aron makapauli na ko sa amo. Gusto ko nga ang ihatag mong Pinaskohan nako mao nga sa sumad sa adlaw sa Imong Pagkatawo atua ako sa kiliran sa akong pamilya!” Hugot ang pagpangaliya ni Budoy sa Balaang Bata. Nakahilak gani siya.
Paglabay sa tulo ka adlaw, ang nars nga nag-atiman kang Budoy kuyog ang usa doktor, miduol sa kama ni Budoy.
“Okey ka na, Sir. Makagawas ka na ugma. Speedy ang imong recovery!” matod sa doktor nga nagpahiyom. “Kahibulongan ang nahitabo kanimo!”
“Bitaw, Sir!” sagbat sa nars.
BISPERAS sa Pasko. Disyembre 24. Sa barungbarong nga gipuyan sa pamilya ni Budoy nag-andam na si Mayang alang sa noche buena. Gawas sa linung-ag nga kan-ong humay, dihay sliced bread ug pansit kanton sahi sa ilang naandan. Apan may nahidugang nga lamiang sud-an sa lamesa, usa ka buok inasal nga manok.
Pagkataudtaod, mibagting ang alas dose sa kagabhion. Dili kaayo alingisig ang palibot kay gidili ang mga pabuto tungod sa pandemya. May mabati gihapong buto-buto sa rebentador.
“Sa kaluoy sa Batang Diyos nga natawo karon, Mayang, dakodako ang akong kita sa pamasadag traysikad karon,” matod ni Budoy. “Pasalamatan nato Siya.”
“Angay gyod, Budoy, uy!” ni Mayang.
“Hala, tawga na ang mga bata aron mangaon na ta,” ni Budoy nga mitan-aw sa rebulto ni Senyor Santo Niño ibabaw sa altar. Nanguros siya ug nagpasalamat nga gidungog sa Balaang Bata ang iyang pag-ampo. (KATAPOSAN)
Dako ang pagsalig ni Budoy sa Kahitasan. Ug kini naghatag kaniyag paglaom taliwa sa mga pagsulay…