Bisaya

KANHI BOKSIDOR UG ANG IYANG ANINO

- Ni KEVIN A. LAGUNDA

SA iyang kapungot tungod sa gabalik-balik nga mga leksiyon ug sa pagtuo nga siya na ang labing ngilngig sa tanan, ang anino miaperkat sa retiradong boksidor* nga mao ang iyang maestro. Ug mianunsiyo ang anino nga siya ang naginusara­ng kampeyon sa kalibotan. Ug milalin ngadto sa laing dapit ang mabudhiong anino.

SA wala pa siya makadesisy­on nga bansayon iyang anino, kanunayng handomon sa boksidor ang iyang nasignit nga kalibotano­ng mga titulo sa dugoong teritoryo sa pamoksing diin ubay-ubay ang iyang gipang-ihaw nga mga kaaway, mga baboyng sama niya nga kinaham ang lamaw sa himaya.

Sa iyang kinumong karera, lima ka higayon niyang nakuptan ang bakos sa kabantog, ug adunay punto nga kanapulo niya madepensah­i ang iyang usa ka titulo sa dibisyong pederweyt diin gipangkila­w niya ang iyang tuloy nga mga kontra.

Ang dailos sa boksidor paingon sa lunangan sa biaybiay nagsugod dekada na ang nakalabay sa dihang nanghambog siya sa kasilingan­an nga iyang mapatumba ang wala hiilhing kontra ug mialiglig pa kini nga aporan nila siya og balato inig-uli niya.

(Segun pa niya atol sa interbiyu uban kang Quinito Henson: “Bayani ang usa ka boksidor sa mutaong mata sa katawhan kon modugo siyag tagsa ka libo alang kanila. Ang pag-ula sa kaugalingo­ng salapi bulahaton sa patriyota.”).

Atol sa adlaw sa bahog-bahog ibabaw sa kuwadradon­g panggubata­n, wala makapatugd­on bisag usa ka kumong pinutos sa Cleto Reyes ang boksidor batok sa iyang kontra— segundos lang sukad sa pagbagting sa kampana, ang bag-ong subol nga walhong kaliwat daw sa sicario sa Ciudad Juárez miasdang ug milabay sa iyang mga kumo nga mingtugdon sa apapangig ug nawong sa boksidor. Kalit nga nawad-an og panuhod ang boksidor.

Nalup-og kini ug wala na makabangon sa ihap sa reperi. Sa pagbalik sa boksidor sa iyang lugar, sanglahon na siya sa panan-aw sa iyang mga silingan, bisan ang iyang suod nga mga higala ug kaparyente­han wala na makaila sa iyang tinuod nga ngan ug angga sa pamoksing.

Milalin sa laing lungsod ang boksidor ug gamit ang iyang natigom nga salapi, nagtukod siyag pasilidad alang sa mga umaabot nga boksidor. Apan unsa bang pagkaunsaa nga ang iyang hambog sa iyang kanhi nga mga silingan miabot man sa iyang gibalhinan. Gilangaw ang gym sa boksidor. Kadose ka higayon mibalhin-balhin si Bomba, apan walay ni bisan usa ka bata ang magpatudlo niya.

Nakahukom siya sa kataposan: Bansayon niya ang iyang anino sa pamasin nga kiniy molangkat pagbalik sa iyang kalibotano­ng kabantog ug mopatapot balik sa nakagay nga dungog atubangan sa iyang kasilingan­an ug kaparyente­han.

Sa ikadose ka gabii sa pagbansay-bansay, pasado alas otso sulod sa plasa ubos sa hayag nga Buwan ug mga dagitab, gibalikbal­ik niya ang pagtudlo ang anino kon unsa ang saktong pustora sa de kalidad nga boksidor ug ang tukmang mga anggulo sa pagsukmag. Ug sa wala damha, mitraydor ang anino kaniya.

*Asukal ang angga sa maestro sa iyang kaugalingo­ng anino sa dihang siya pa gikahadlok­ang boksidor sa tibuok kalibotan, ug dugokan sa mga tsiks, politiko ug sugarol. Mihangyo ang kanhi boksidor ning tagsulat nga dili ibutyag ang iyang tinuod nga ngan. Buot daw niyang panalipdan iyang kaugalingo­n nga wala nay anino. (KATAPOSAN)

Bisan ang kaugalingo­ng anino, may panahon nga motraydor usab kanato. Sama sa nahitabo niining boksidor.

 ?? ??
 ?? ?? Sa ikadose ka gabii sa pagbansay-bansay, pasado alas otso sulod sa plasa ubos sa hayag nga Buwan ug mga dagitab, gibalik-balik niya ang pagtudlo ang anino kon unsa ang saktong pustora sa de kalidad nga boksidor ug ang tukmang mga anggulo sa pagsukmag...
Sa ikadose ka gabii sa pagbansay-bansay, pasado alas otso sulod sa plasa ubos sa hayag nga Buwan ug mga dagitab, gibalik-balik niya ang pagtudlo ang anino kon unsa ang saktong pustora sa de kalidad nga boksidor ug ang tukmang mga anggulo sa pagsukmag...

Newspapers in Cebuano

Newspapers from Philippines