Mirror Of Fortune
(ANG INYONG KAPALARAN SA DISYEMBRE 2021)
SAGITTARIUS – (Nobiyembre 22 – Disyembre 21) – Makapadasig sa imong mga manghod ang makab-ot mong kalamposan. Tumanon mo gayod ang imong gisaad nga tabangan mo sila sa ilang pag-eskuyla. Dako kag ikatabang nga motunhay ang pamilya. Mabulokon ang imong lovelife. Biyernes ang suwerte mong adlaw ug 5, 3, 8 ang palaran mong numero.
CAPRICORN – (Disyembre 22 – Enero 19) – Niining bulana may mosulay sa imong kaligdong. Di mapiog ang imong prinsipyo ug baroganan. Magpabilin kang mapaubsanon bisan dunay magsamok-samok kanimo. Lugwayan pa ang imong pasensiya. Dugosnon ang romansa. Suwerte mong adlaw ang Domingo ug palaran mong numero ang 9, 2, 7.
AQUARIUS – (Enero 20 – Pebrero 18) – Makabaton kag kalinaw sa kaisipan human mabayri ang imong mga utang. Makamao ka nang magbadyet sa imong suweldo. Mangita kag diskarte aron makalingkawas ka sa mga obligasyon. Pahinuntan mo ang kablit sa pasiplat. Sabado ang suwerte mong adlaw ug 4, 6, 1 ang palaran mong numero.
PISCES – (Pebrero 19 – Marso 20) – Niining bulana adunay mobutho sa pagbisita kanimo. Magdala kinig makapahimuot nga balita. Mangandam ka kay dako ang purohan nga mahinayon kang magtrabaho sa abroad. Magmasaligon ka. Makapiyong ka sa lahing kalalim. Suwerte mong adlaw ang Huybes ug palaran mong numero ang 2, 5, 3.
ARIES – (Marso 21 – Abril 19) – Magnuod ang imong pangagpas bahin sa posibleng mahitabo sa umaabot. Pangandaman ang kalisod nga modangat sa pamilya. Molihok ang tanan sa pagtambayayong. Mangaliya sa Kahitas-an nga makalikay sa katalagman. Mainit ang romansa. Lunes ang suwerte mong adlaw ug 1, 2, 6 ang palaran mong numero.
TAURUS – (Abril 20 – Mayo 20) – Niining bulana moluwat kag desisyon nga makapausab sa dagan sa panginabuhi. Nuntan lamang kini sa makugihong pagpanglimbasog. Pasaligan ka sa imong suod nga higala bahin sa imong gihangyo. Madani kas agni sa pahiyom. Suwerte mong adlaw ang Biyernes ug palaran mong numero ang 9, 2, 8.
GEMINI – (Mayo 21 – Hunyo 20) – Makombinser mo ang imong igsoon bahin sa giplano mong tukorong negosyo. Pahulamon ka niyag kuwarta nga idugang sa imong puhunan. Magmalamposon ka kay daghang kostumer nga mahimo mong suki. Magmalungtaron ang imong relasyon. Domingo ang suwerte mong adlaw ug 5, 4, 2 ang palaran mong numero.
CANCER – (Hunyo 21 – Hulyo 22) – Niining bulana desidido ka nang mobiya sa imong mga bisyo. Hugot ka nang motuman sa imong gisaad nga magbag-o ka na sa imong batasan. Moapil ka na sa kalihokan sa simbahan. Magpabilin ang kamainiton sa salohang romansa. Suwerte mong adlaw ang Sabado ug palaran mong numero ang 1, 9, 3.
LEO – (Hulyo 23 – Agosto 22) – Kawilihan ang imong serbisyo. Apan ipadayon ang imong pagtrabaho sa abroad bisan og umentohan ka sa imong suweldo. Di kadispaser ang imong kinitaan kay dako ang galastohan sa pamilya. Makapagilok ang lahing dalit sa hapuhap. Martes ang suwerte mong adlaw ug 8, 7, 6 ang palaran mong numero.
VIRGO – (Agosto 23 – Septiyembre 22) – Niining bulana di makawang ang imong pagampo. Madawat na nimo ang insentibo nga imong gipaabot. Masulbad na ang imong suliran. Sangpit kanunay sa Ginoo. Di ka pasagdan sa imong panginahanglan. Kusog kag karisma. Suwerte mong adlaw ang Huybes ug palaran mong numero ang 6, 5, 8.
LIBRA – (Septiyembre 23 – Oktubre 22) – Makalikay ka sa katalagman kon kanunay kang mag-ampo. Kinahanglan nga magpaduol gayod sa Ginoo. Makigdait ka sa imong isigkaingon. Daghan kang matapos nga trabaho. Magpabilin kang madasigon. Matagbawon ang salohang romansa. Martes ang suwerte mong adlaw ug 7, 5, 3 ang palaran mong numero.
SCORPIO – (Oktubre 23 – Nobiyembre 21) – Niining bulana madasig kang motuman sa imong mga asaynment. Panglimbasogan mong mahimuot ang imong boss aron maapil ka sa promosyon. Di ka angayng molaktaw sa pagsimba. Magmalipayon ang sudlan mong relasyon. Suwerte mong adlaw ang Miyerkoles ug 3, 4, 6 ang palaran mong numero.