Halandomong Panagtigom Sa Panimalay Ni Anhing Senate President Nene Pimentel, Jr.
NAKAIPSOT nas akong panumdoman ang eksaktong petsa apan morag Oktubre 2007 kadto nga nadawat ko ang tawag sa telepono ni G. Edgar S. Godin kon gusto ba akong mokuyog nilang duha ni Richel nga moadto sa balay ni kanhi Senate Pres. Nene Pimentel, Jr. sa Marikina City. Way duhaduha akong mitando. Gibiyaan ko ang akong gisulat niadtong higayona ug nagdali-dali akog kaligo. Dayon miadto akos buhatan sa Bisaya Magazine diin didto naghulat sila si Edgar ug Richel. Nasayran ko nga si Atty. Manuel Lino Faelnar maoy nagpahibalo nga may panagtigom sa Kadugong Bisaya didtos balay ni kanhi Senate President Nene Pimentel, Jr. kay nangimbitar kini alang sa pagpakighimamatay. Ang gitamdan ni Edgar mao lamang ang direksiyon nga gihatag ni Atty. Faelner kay pareho ra man kaming walay kasayoran sa adres sa balay ni kanhi Sen. Nene Pimentel, Jr.
Pag-abot namo sa Marikina, misakay mig traysikol ug nagpahatod sa Monterey Street. Kilumkilom na dihang mikawas mis traysikol. Nangutana si Edgar sa nagtindag sigarilyo ug gitudloan mi sa balay ni Sen. Nene Pimentel, Jr. nga di lang diay layo sa among gikawasang traysikol. Pagsulod namo sa gate, mitagbo kanamo ang luag nga hawanan ug diha si Sen. Nene Pimentel, Jr. uban kang Madam Lourdes (Bing), iyang asawa, nga miabiabi kanamo ug miagda sa pagsulod sa balay. Didto na diay si Atty. Manuel Lino Faelnar, ang presidente sa Defenders of Indigenous Languages (DILA), nauna na sa pag-abot namo. Dugay na kong nakaila kang Atty. Faelnar kay kalingaw man kining mahisgotan nilang Edgar ug Richel. Ug dako ang gibati kong kalipay kay personal ko na siyang gikakita. Apan wala lamang kami magkaestoryahay.
Mainiton ang paghangop ug pakighinabi kanamo ni Sen. Nene Pimentel, Jr. Sa akong tantiyar, di siya katahaan kay mahigalaon ug maabiabihon man ang iyang pahiyom nga mitimbaya kanamo. Nagpanagana gani ako kay abi kog dili kaayo makighinabi kanamo tungod kay una pa lang namong panagkita. Apan nakighinabi siya kanamo nga samag dugay nang gikahinasa ug gikaila. Talagsaon ang iyang batasan. Di man diay siya katahaan bisan sa iyang kahalangdon og estado. Kaswal ug natural lang siyang miasikaso kanamo.
Ug miagda siya nga mangaon na sa giandam nga pagkaon diha sa lamesa. Samtang nangaon, padayong nakighinabi kanamo si Sen. Nene Pimentel, Jr. Nahisgotan niya nga dugay na silang nagpuyo ning lugara. Niadto pang 1964 nga napanagiya nila ang maong propedad. Dili eksklusibo kining maong subdibisyon, kasagaran ug ordinayo lang ang mga namuyo ning maong lugar, matod niya. Apan buotan ug maayohon ang mga residente sa maong dapit ug suod na sa ilang pamilya ang mga silingan. Maong wala na sila mobalhin pag laing kapuyan. Gani, si kanhi Presidente Erap Estrada mitanyag kaniya sa pagbalhin ngadto sa Forbes Park Subdivision sa Makati City dihang mibisita sa iyang gipuy-an apan iyang gibalibaran kay nawili na sila sa maong lugar, dugtong pa niya.
Nagsunod nang nangabot ang uban pang mga bisita. Diha si Gen. Ramon Montaño, ang kanhi hepe sa Metrocom sa administrasyon ni kanhi Presidente Ferdinand Marcos. Nakita ko usab si Prof. Ernesto Pernia nga propesor sa University of
the Philippines-Diliman, Quezon City ug nahimong NEDA secretary sa administrasyon ni Presidente Duterte. Ug usa man diay kini ka Bol-anon nga taga Tagbilaran City. Miabot usab si Dr. Francisco Nemenzo, Jr., ang nahimong ika-18 nga presidente sa University of the Philippines niadtong 1999-2005, kauban ang iyang pinanggang kapikas.
Samtang nag-aginod ang mga takna sa kagabhion, nagkalami ug labaw pang nagmadasigon ang pagkulukabildo sa nagkatigom. Nalakbitan na ang lainlaing hilisgotan, naapil na ang bahin sa isyung politikanhon. Nahinubay man gani ni Sen. Nene Pimentel, Jr. niadtong nanumpa si kanhi Presidente Gloria Macapagal-Arroyo nga siya ang naghawid sa Bibliya nga gibasa sa pangulo. Sa una, misuportar siya kang Pres. Arroyo nga mipuli kang kanhi Pres. Erap Estrada dihang gipalagpot kini tungod sa gikalambigitang dakong kontrobersiya. Apan midistansiya na usab siya kang Pres. Arroyo dihang kini na usab ang nag-atubang sa dili matagong kahiwian sa iyang pangatungdanan isip pangulo sa atong nasod.
Sa matag karon ug unya, mosibaw ang mga katawa nga mipatigbabaw taliwala sa mga pulong nga namutawi sa baba sa mga bisita. Di kapugngan ang pagkatawa ilabi nag maghisgot nas makalingaw ug makapahimuot nga mga kasinatian. Ilabi na kadtong pagdakop kang Sen. Nene Pimentel, Jr. niadtong panahon sa Martial Law nga gipangulohan ni Gen. Ramon Montaño ang mga sundalo nga maoy mingsikop. Kusog ang mga katawa sa duha nga naghinubay sa maong kasinatian. Kaniadto pa diayng managhigala ang duha sa dihang gimandoan ni kanhi Diktador Ferdinand Marcos si Gen. Ramon Montaño nga dakpon si Sen. Nene Pimentel, Jr. nga maoy mayor sa Cagayan de Oro City niadtong panahona. Ug walay nahimo ang heneral gawas sa pagtuman sa sugo ni kanhi Pres. Marcos.
Bisan sa ka- busy ni Sen. Nene Pimentel, Jr., nga nakighinabi sa iyang mga bisita, nakahigayon ako sa paghunghong kaniya bahin sa akong hangyo nga unta adunay suweldo ang mga opisyales sa barangay dihang nagkaduol kami. Dali niya akong gitubag nga dugay nang may giduso siyang bill sa Senado mahitungod niini apan wa makalusot kay hinay ang suporta sa mga kauban niyang senador. Ug natulog na lang ang naasoyng balaodon. Nahisgotan ko usab ang health center sa matag barangay apan nag-ingon siya nga anugon lang kini kon walay doktor nga mobisita sa matag barangay. Naputol ang among panaghinabi kay may laing mga bisita na usang nangabot.
Naputol og kadiyot ang panaghinabi kay miagda ang kapikas ni Sen. Nene Pimentel, Jr. sa pagpangaon sa gihat-ad nga mga prutas diha sa lamesa. Namarog kamis gilingkoran ug mikuha sa among masima-sima. Samtang nangaon sa prutas, gipadayon ang panagsultihay nga mao ang lamas sa kagabhion ning okasyon nga gisaw-an sa mga Kadugong Bisaya. Ug nahiabot si Senador Koko Pimentel nga mainitong mihimamat ug mitimbaya sa mga bisita. Wala madugay, miabot na usab ang iyang maguwang nga igsoon nga si Gwendolyn. Naghinangopay. Naghimamatay sa usag usa. Kaming tulo, si Edgar, Richel ug ako, midungan na lang usab sa pagpakigpahiyomay nila nga maabiabihon ug mahigalaon ang mga dagway.
Miabot na ang yugto nga wa ko damha. Miagni nas Sen. Nene Pimentel, Jr. nga modalit ang matag usa og lumadnong awit— lunsayng Bisaya. Hingantahon ang senador. Mao diay ang hilig niya ang kinantahay, matod ni Atty. Faelnar. Mihunghong si Edgar kanako, may bawon ka bang kanta? Aysus! Di ra ba ko kamao mokanta. Sintunawo. Tulibag ang tingog. Kon wa kay kanta, balak na lang, dugtong ni Edgar. Samot! Wa pa ko makasulay sa pagbalak. Nagdibal hinuon ang akong kahiladman. Gitugyan ko na lang sa mga gutling ang akong kahingawa.
Tuod man, malipayon ug nalingawng mikanta si Senador Nene Pimentel, Jr. sa paborito niyang mga awit. Ug ang gabii nakig-unong sa kasadya sa mga takna nga gisalohan sa mga bisita. Ug ang mga awit nakigduyog sa way salimbong nga kasadya ug kalipay niadtong gabhiona.
Wa ako magdahom nga tunolan akog tulo ka complimentary ticket ni Ma’m Bing Pimentel alang sa uska musical revue nga nag-ulohag “Nasaan Si Hesus?” ubos sa direksiyon kini ni Nestor U. Torre ug siya mismo ang nagtagik sa musika ug lyrics. Kini ipasundayag sa GSIS Financial Center, Roxas Blvd., Pasay City sa Nobiyembre 13, 2007.
Ug sa hapit na kami manguli, nanghatag si Sen. Nene Pimentel, Jr. sa iyang sinulat nga libro nga gipatabanan niyag dedikasyon ug sa iyang signature.
Sa dihang di na gyod kapugngan ang pag-aginod sa mga takna sa kagabhion ug kini nagkalawom na, nagpanamilitay na ang usag usa. Kaming tulo, si Edgar, Richel, ug ako, nga walay sakyanan, gitanyagan ni Dr. Francisco Nemenzo, Jr. nga manakay sa iyang kotse kay silang duha ra man sa iyang asawa ang sakay niini. Ug wala na kami maikog nga mobalibad kay okasyon na man usab kini. Lisod na usab kaming makasakay kay lawom na ang kagabhion.
Mikawas ako sa kotse sa may Tandang Sora kay sa Barangay Holy Spirit, Quezon City man ako mopauli ug silas Edgar ug Richel sa Philcoa na sila mingkawas kay mopauli na man silas Dr. Nemenzo ug ang iyang asawa sa UP Compound.
Mipauli akong naghambin sa kalalim sa halandomong kasinatian ug nakatulog ako niadtong gabhiona nga giduyan sa madamgohong mga gutling sa akong paghinanok. na Tipik sa halandomong kasinatian nga di malimtan! —
Ug ang gabii nakig- unong sa kasadya sa mga takna nga gisalohan sa mga bisita. Ug ang mga awit nakigduyog sa way salimbong nga kasadya ug kalipay niadtong gabhiona.