Ang Gahom sa Bayrus, Mipaubos Kanato
NGANONG magpabakuna man kuno ko nga ang gobyerno wa man mag-ingon nga ilang luwason ang panginahanglan sa pamilya kon pananglit mamatay ang gibakunahan? Ang bakuna dili ikagarantiya nga dili na matakdan sa bayrus ang tawo; 98% sa gitakboyan sa bayrus, makarekober ra sa iyang gibati; walay kasegurohan kon unsay mahitabo sa gibakunahan gikan lima hangtod napulo ka tuig; ang mga eksperto pirmeng masorpresa sa kinaiya sa bayrus, hinungdan nga posibleng dili epektibo ang bakuna; ug milahutay ang akong kaugalingon gikan sa tuig nga mingkatag ang bayrus, 2019 hangtod karon, puyra buyag.
Kining mga butanga maoy akong pirmeng itubag kon dunay mangutana nako kon nagpabakuna na ba ko. Nahimo kong tawo sa daghang personal nga prinsipyo base sa kaugalingong panabot sa pandemya.
Duna poy moingon nga bitaw, Sir, no, mahadlok gyod ko magpabakuna, uy! Wa ta kabalo unsay
mahitabo gyod. Paminaw nako, daghang hunahuna nga ming-uyon sa akong kaugalingong panabot. Wala ko mag-inusara niining klase sa baroganan nga inato— layo sa panlantaw sa mga eksperto sa siyensiya.
Sa unibersidad nga akong gitudloan, tingali ako na lang ang wa pa gyod magpabakuna. Diha pa koy gikahinabing amigo nako sa trabaho ug nabakunahan na sab siya. Ako siyang gipangutana unsay iyang rason nganong nagpabakuna siya. Matod niya, kinahanglanon niyang magpabakuna tungod kay usa siya ka nurse. Ug sa dihang ako siyang giingnan sa mga posibilidad matod pa niya, sakto pod nang imoha, Sir da, wa ko kahunahuna anang mga butanga. Kay lagi siya naobligar lang ang kaugalingon ubos sa mando sa kagamhanan.
Daghang rason kon dili nato gustong buhaton. Ang pagpabakuna usa ka hamtong nga desisyon sa imong kaugalingon. Dili malalis nga inubanan kinig kahadlok tungod kay lubog ang dalan sa ugma, kon unsay mahitabo human sa pagbakuna.
Septiyembre 9, 2021, nagpositibo kos bayrus. Ang resulta migawas human nagpositibo ang akong asawa kinsa nagmabdos sa among unang anak nga babaye. Kinsa may akong basolon sa among sitwasyon? Wala. Nagtuo ko nga ako ang unang gitakboyan sa maong bayrus dayon ang akong asawa. Ako man maoy maggawas-gawas sa panimalay, nga bisan pag pila ka doble ang imong facemask ug bisan pag kinabag-an nga faceshield ang gamiton, duna gyoy agianan ang bayrus sa imong lawas. Naingon kinig bitin, nga kon masigo na gani ang ulo sa gamayng lungag, haom na sab ang iyang tibuok lawas. Sa laktod nga estorya, wa gyod kitay dag-anan ning klase sa pakigharong.
Human sa katorse ka adlaw nga quarantine sulod sa among panimalay, ang mga mosunod maoy akong naamgohan:
1. Kon ang bayrus gimugna man sa tawo o balos sa kinaiyahan, kini nabuhi sama kanato. Nan, kon kinsay isog, siya ang magpabiling mobarog sa kalibotan.
2. Ang bayrus di makita ug ang tawo way gahom nga panalipdan ang iyang kaugalingon gawas sa mga tambag gikan sa mga eksperto.
3. Ang pinilosopong rason dili intelihente panahon sa pandemya ug sukwahi kini sa siyensiya sa medisina.
4. Ang pakighinabi sa labawng makagagahom, tinubdan sa kusog og grasya sa kinabuhi.
5. Ang kinabuhi sa tawo, madato man o pobre, managsama ray paingnan— ang kamatayon.
Ipaubos ang kaugalingon ug ihatag sa mga eksperto ang sulbad sa pandemya.
Kining klase sa desisyon nga naingon kitag gibiyaan sa ngitngit nga langob. Dagan hapit tulo na ka tuig kitang nakigharong sa maong bayrus, ug kini mopadayon hangtod kitang tawo masupilon. Kon walay pagpaubos, dili kita molampos. (KATAPOSAN)
Ang pagpabakuna usa ka hamtong nga desisyon sa imong kaugalingon. Dili malalis nga inubanan kinig kahadlok tungod kay lubog ang dalan sa ugma, kon unsay mahitabo human sa pagbakuna.