(ANG INYONG KAPALARAN SA ABRIL 2021)
SAGITTARIUS – (Nobiyembre 22 – Disyembre 21) – Niining bulana makabayad ka na sa nataligam-an mong utang. Makat-on ka nang magbadyet sa imong kinitaan. Hatagan mog prayoridad ang mahinungdanong butang nga angayng asikasohon. Masum-ok kag bag-ong abentura sa gugma. Suwerte mong adlaw ang Martes ug palaran mong numero ang 5, 8, 2.
CAPRICORN – (Disyembre 22 – Enero 19) – Niining bulana mobutho pagduaw ang suod mong higala. Magdala siyag maayong balita. Mahinayon na ang imong tinguha nga makatukod og kaugalingong negosyo. Madungog na ang imong pag-ampo. Matagbawon ang salohang romansa. Suwerte mong adlaw ang Lunes ug palaran mong numero ang 4, 2, 7.
AQUARIUS – (Enero 20 – Pebrero 18) – Mohatag kag suporta sa nagkalisod-lisod mong manghod. Di mo pasagdan siya segun sa imong gisaad. Makakita kag ekstrang trabaho nga makadugang sa imong income. Maka- adjust ka na sa bag-o mong asaynment. Miyerkoles ang suwerte mong adlaw ug 3, 6, 1 ang palaran mong numero.
PISCES – (Pebrero 19 – Marso 20) – Niining bulana makahukom ka na kon ipadayon ang imong plano nga magtrabaho sa abroad. Makapahulay kag maayo human sa masakong buluhaton. Matuman na ang imong pangandoy nga maharuhay ang kahimtang. Dugosnon ang romansa. Suwerte mong adlaw ang Martes ug palaran mong numero ang 5, 4, 8.
ARIES – (Marso 21 – Abril 19) – Mobalik ang kapiskay sa imong panglawas human sa tukmang pagpahulay. Sundon mo lang ang pahimangno sa doktor. Likayan mo nga mastress ka sa kaguliyang sa pamilya. Morelaks ka. Masabtan mo ang kablit sa kapikas. Biyernes ang suwerte mong adlaw ug 9, 3, 6 ang palaran mong numero.
TAURUS – (Abril 20 – Mayo 20) – Niining bulana makahukom ka nang seryosohon ang imong pagtrabaho. Itingob na ang imong panahon sa pag-asikaso sa imong mga anak. Pangandaman mo ang ilang kaugmaon. Di ka malimot sa pag-ampo. Makawiwili ang romansa. Suwerte mong adlaw ang Domingo ug palaran mong numero ang 4, 8, 2.
GEMINI – (Mayo 21 – Hunyo 20) – Di mo makalimtan ang imong kaakohan sa simbahan. Makapadasig ang imong pag-agnis kabataan nga aktibong mosalmot sa kalihokan sa simbahan. Lahing awra sa personalidad ang imong ipakita. Makapadani ang talagsaon mong katahom. Lunes ang suwerte mong adlaw ug 6, 1, 5 ang palaran mong numero.
CANCER – (Hunyo 21 – Hulyo 22) – Niining bulana mahinamon mong dawaton ang bagong asaynment sa trabaho. Daghan kag makatonan alang sa imong pag-asenso. Itingob na ang imong panahon alang sa masanag nga kaugmaon. Salabtonon ang kusi sa kilid. Suwerte mong adlaw ang Huybes ug palaran mong numero ang 8, 3, 7.
LEO – (Hulyo 23 – Agosto 22) – Matikad mog maayo ang malalangon mong imahinasyon. Mogahin ka nag panahon sa nahiligan mong buluhaton. Mabatonan mo ang kamakiangayon sa mga kabos. Di mo kalimtan ang pagtabang sa mga alaot. Talagsaong kalalim ang masinati. Sabado ang suwerte mong adlaw ug 7, 4, 6 ang palaran mong numero.
VIRGO – (Agosto 23 – Septiyembre 22) – Niining bulana makadawat kag insentibo sa maayo mong perpormans sa trabaho. Mahinayon na ang nag-ung-ong mong promosyon. Makaluagluag ka na sa imong kahimtang sa panginabuhi. Makasinati kag lahing dalit sa romansa. Suwerte mong adlaw ang Domingo ug palaran mong numero ang 9, 3, 8.
LIBRA – (Septiyembre 23 – Oktubre 22) – Molakdop sa imong handurawan ang masadyaong kagahapon. Madasigon kang maglihok-lihok. Walay makabalda sa dako mong tinguha nga magmalamposon. Ipadayon mo ang pagmatngon aron way kabilinggang modangat. Mainit ang romansa. Huybes ang suwerte mong adlaw ug 2, 5, 4 ang palaran mong numero.
SCORPIO – (Oktubre 23 – Nobiyembre 21) – Mapalit mo na ang dugay nimong gipangandoy nga kabtangan. Mangandam ka sa umaabot nga panahon. Dako ang tsansa nga mapili ang imong gisalmot nga obra. Mogahin kag panahon alang sa simbahan. Maagni kas tental sa pahiyom. Biyernes ang suwerte mong adlaw ug 6, 1, 9 ang palaran mong numero.