Dr. Mel M. Allego: Umpil Awardee 2022
Sitio Panaghiusa, Basak-San Nicolas, Cebu City
MELQUIADITO Maambong Allego, Jr. mao ang tibuok niyang ngalan. June iyang angga sa iyang pamilya, kahigalaan ug sa mga magsusulat, ilabi na sa mga sakop sa Bathalan-ong Halad sa Dagang, Inc. (Bathalad-Sugbo) nga iyang gitukod niadtong Agosto 19, 1969 ug gihatagan og Pedro Bukaneg Award sa tuig 2019, pasidungog sa Unyon ng mga Manunulat sa Pilipinas (UMPIL), tungod sa paglungtad ning kapunongan sa mga magsusulat og singkuwenta ka tuig.
Ning tuig 2022 si Mel maoy napilian sa UMPIL nga hatagan sa pasidungog nga Gawad Pambansang Alagad Ni Balagtas Sa Tulang Sebwano tungod sa iyang Sinugboanong-Binisaya nga mga balak nga nangapatik sa lainlaing mantalaan dinhi sa Sugbo kaniadto ug karon, sama sa Bisaya, Alimyon, Silaw, Bag-ong Suga, ubp. May mga balak usab siya nga nahilakip sa antolohiya sa mga balak, sama sa Kaliring, Kawit Sa Buntagon, ubp. Sa tuig 2010 nakapagawas siyag libro, antolohiya sa iyang mga balak: Albicalarivi Bathalad Mananambalak nga ang editor mao si
Richel G. Dorotan, literary editor sa Bisaya Magasin. Nakasulat sab siyag ubay-ubay nga mga balak nga Iningles kay usa man siya ka bilingual writer. Sa Amerika, nadawat niya ang Golden Poet Award of 1985 sa World Poetry Press.
Niadtong Agosto 10, 2012, gipasidunggan siya isip Garbo sa Sugbo alang sa Katitikang Sugboanon sa panahon ni kanhi Gob. Gwen Garcia.
Sa tuig 1972, usa siya sa napulo ka batan-ong gipasidunggan sa YMCA-Cebu gikan sa lainlaing natad. Gidawat niya ang pasidungog alang sa natad sa Katitikang Bisaya. Kahinumdoman nga sa tuig 1964, ang iyang balak nga nag-ulohan og “Ang Taknaan
sa Bungbong” maoy nakadaog sa unang ganti sa tigi sa balak sa Lubas sa Dagang Bisaya, Inc. (LUDABI). Ug sa tuig 1969, siya ang unang writing fellow sa Silliman National Writers Workshop nga gidawatan og mga balak nga Binisaya aron hukngayon sa mga panelist, nga gipangulohan nilang anhing Dr. Edilberto K. Tiempo ug anhing Dr. Edith L. Tiempo.
Si Mel nagsugod pagbaid sa iyang dagang dihang nahimo siyang editor sa Clarion Newsletter sa Cebu North Provincial High School, Tuburan, Cebu. Sa kolehiyo, siya ang managing editor sa The Quill, school organ sa Southwestern University, Cebu. Dayon napili siyang associate editor sa The Pulse, organo sa SWU College of Medicine.
Mabulokon siyang tinun-an. Sa elementarya, balidektoryan siya sa Putat Elementary School sa tuig 1956. Ingon man nga balediktoryan sab siya sa 1960 sa CNPHS diin siya presidente sa Supreme Student Council ug corps commander sa PMT
Unit. Sa kolehiyo, sa 1962 nahimo siyang Most Outstanding ROTC Cadet; migradwar nga summa cum laude sa College of Liberal Arts sa Marso, 1963; ug nahimong Most Outstanding Medical Intern sa 1967-1968.
Si Mel natawo sa Apalan, Tuburan, Cebu, niadtong Marso 21, 1944 apan didto nagdako sa
Putat, Tuburan, Cebu. Duna siyay pito ka igsoon nga naglakip kang Antonio ‘Tony’ Allego, usa sab ka magsusulat nga nahimong pamuno sa Bathalad-Sugbo.
Iyang ginikanan mao sila si Melquiades Allego ug Emiliana Maambong Allego. Naminyo siya kang Maria Thelma Desquitado Allego, R.N. May tulo sila ka anak: si Carmel, usa ka graphic arts designer; Meljun,
AB major in English; Melanee, BS major in Biology.
Sa pagkakaron, si Mel usa ka nuclear medicine specialist and radiologist sa Florida ug sa ubang estado sa Amerika. —
Sa tuig 1972, usa siya sa napulo ka batanong gipasidunggan sa YMCA- Cebu gikan sa lainlaing natad. Gidawat niya ang pasidungog alang sa natad sa Katitikang Bisaya.