Sadya Ug Halandomon Ang Reyunyon Sa MSU Pioneers Sa Iloilo City
Apan nagbulag mi nga naghambin og dakong paglaom nga makatambong sa umaabot nga mga reyunyon. Sa among edad nga anaa na sa “departure area” dakong grasya kon tugotan sa Ginoo ang kahigayonan nga makighugoy-hugoy sa mga MSU Trailblazers o sa mga nahabilin
ADUNAY 282 ka estudyante sa Mindanao State University sa pagbukas sa unang klase niini niadtong SY 1962-63. Gikan sila sa mga dapit sa Mindanao, Sulu ug Palawan ug nagtungha nga mga full o partial scholar. Sila ang mga payoner sa MSU nga nagdagnay sa ilang kaugalingon nga “MSU Trailblazers”. Sulod sa minglabayng 60 ka tuig naghimo silag panagtapok nga gipahigayon sa lainglaing dapit sa Pilipinas. Ang ubang mga reyunyon didto himoa sa Amerika diin ubay-ubay sa mga payoner ang didto na nanimuyo.
Ang reyunyon karong tuiga gihimo Iloilo City sa Hunyo 11-13. Miabot ra og 16 ang nakatambong sa reyunyon kay ang pipila nga unang nagpahibalo nga motambong wala mahinayon tungod sa kakulian sa panglawas ug ubang mga hinungdan. Apil sa wala mahinayon pagtambong si Datumanong A. Sarangani, ang presidente sa MSU Trailbazers.
Si Pastor Torres, Jr. nga taga Tigbauan, Iloilo maoy nahimong host sa reyunyon. Siya ang nangita sa hotel ug benyu, nagpatahi sa reunion t-shirt, nagpaprinta sa tarpulin ug nag-andam sa program ug aytineraryo. Kaabag niya ang iyang asawa nga si Celia. Ug wala namo siya pasagdi kay ang MSU Trailblazers group chat sa messenger napuno sa among mga sugyot o suhestiyon.
Ayroplano ang among gisakyan gawas sa usa nga taga Cebu City nga nagbarko.
Didto mis akong asawa nanukad sa Davao City kay may biyahe sa ayroplano nga deretso sa Iloilo International Airport. Mao to ang una namong sakay og ayroplano sukad sa pag-abot sa pandemya sa COVID-19 sa hinapos sa 2019. Sukad milurang ang COVID-19 bag-ohay lang, daghan na ang nagbiyahe ug puno ang among na- book nga Cebu Pacific Flight 5J720.
Kini sila ang suwerteng nakatambong sa reyunyon ug ang ilang mga pinuy-anan niadtong nagtungha pa silas MSU: Rosalinda Calipusan-Balacuit (Oroquieta City), Cirila Sescon-Botor (Isabela, Basilan City), Francisco S. Calmita (Banga, South Cotabato), Exsuan T. Dagbusan (Siasi, Sulu), Rizalinda Chee-de Jong (Cabadbaran, Agusan del Norte), Glenda Elape-Fortez (Surigao City), Marlene Deluao-Ignacio (Digos, Davao del Sur), Evelyn MontesinoJimenez (Isabela, Basilan), Aurora de la Torre-Kintana (Cotabato City), Rubina Bohos-Kwan (Kapatagan, Lanao del Norte), Jane Sindao-Lim (Cotabato City), Virginia TalabocSulit (Oroquieta City ), Venus Tan (Butuan City), Pastor Torres, Jr. (Ozamis City), Emeterio S. Sumagang (Maigo, Lanao del Norte) ug Lolita Daral-Ungui (Oroquieta City).
Ang mga bana ug asawa nga nangapil sa reyunyon mao sila si Elsie Joy O. Dagbusan, Rufino Ignacio,
Romeo Kwan, Cleopatra “Pat” Sumagang ug Celia R. Torres. Nakatungha sad si Rogelio Gaki Gacutan sa unang gabii nga kanhi propesor sa MSU.
Ang Days Hotel sa The Atrium sa General Luna St. mao ang katulganan ug benyu sa reyunyon diin gihimo ang programa sa pagbukas ug pagtapos sa panagtapok. Tagsa-tagsa ang pagbayad sa hotel room samtang ang panihapon ug pack lunch gikan sa registration fee nga P3,500 matag partisipante. Sa hotel ang panihapon gawas sa ikaduhang gabii nga didtos Tatoy’s Atria.
Ang kalihokan sa unang adlaw mao ang registration, panihapon ( buffet) ug programa sulod sa resto bar sa Days Hotel. Ang opening program naglakip welcome address ni Pastor Torres, Jr. pasiunang pagampo ug pag-ampo sa mingtaliwan na nga mga payoner. Gisunod ang ethnic attire contest, talent presentation, ballroom dancing ug parlor games. Sa talent presentation, gibasa ni Frank Calmita ang iyang balak nga nagulohag “Seventy”. Gipakita ni Marlene Ignacio unsaon pagsul-ob sa malong base sa mga katuyoan sa paggamit niini. Ang parlor game nga
“sabong” gipasiugdahan ni Ruffy Ignacio.
Ang ikaduhang adlaw gisugdan sa zumba didto sa Esplanade by the Iloilo River. Apan anugon kay daghan ang wala makatambong tungod sa “sakit sa tuhod”. Human sa pamahaw, gihimo ang usa ka adlaw nga suroy sa Guimaras
sakay sa service bus sa SEAFDEC. Ang among unang hunong didto sa Jordan diin namalit ug mitilaw mis “sweetest mango sa kalibotan”. Dayon nanulod mis Trappist Monastery Shop diin namalit mig local delicacies ug souvenir items.
Hapit na tingpaniudto sa pagsulod namo sa SEAFDEC Igang Marine Station sa Nueva Valencia sakay sa mitagbo nga bangka sa IMS. Ang IMS naglangkob sa upat ka gagmayng isla ug lumpong sa mga floating fish cage nga konektado sa naglutaw nga mga laktanan nga gama sa mga plastic drum ug mga bulos sa kawayan.
Sa among pag-abot sa guest house, gidalitan mig suman, ibos, mangga, tsa ug kape.
Dasig ang among pagkuhag mga hulagway sa maanindot nga palibot. Ug siyempre, ang pagkuhag mga group picture.
Wala mahurot ang among dalang packed lunch kay giandamam mig makabuhong nga tinula ug sinugba nga pumpano.
Human sa paniudto, gisuroy mis marine cages nga gipatuboan og bangus, pumpano ug lapulapu.
Nadugangan ang kabibo sa among pagbisita sa IMS dihang nabulasot ang usa ka tiil ni Rose Balacuit sa kawayang laktanan nga, pasiaw pas mga kauban, suwerte nga wala paaka sa pumpano ang iyang lapalapa.
Ang among kasinatian ug nakat-onan sa IMS nakadugang sa among kaikag nga makabisita sa SEAFDEC/AQD sa Tigbauan diin didto gikan ang mga bunwag ( fingerling) sa mga isda nga gipatubo sa IMS.
Sa among pagbalik, mihapit mis nagusbat nga Gisi Lighthouse ug nagparetrato sa tiilan sa usa sa 27 ka mga windmill sa San Lorenzo.
Wala makauban si
Pat sa Guimaras kay gisakitan sa tiyan. Gibati kog kabalaka kon unsa na ang iyang kahimtang kay dili matawgan ang iyang selpon ug wala mogana ang messenger sa akong selpon. Mao nga sa nagsakay na mis roro balik sa Iloilo City, nagpatabang kos akong anak nga si Charity sa Iligan City nga motsat sa iyang mama. Gitawgan sad nako ang front desk sa hotel ug mihangyo
nga tawgan si Pat sa Room 555. Nalipay ko nga naayo na siya ug nakaapas siya sa Tatoy’s.
Kilumkilom na sa among pagtabok sa Iloilo City. Mideretso mis Tatoy’s Atria sa among panihapon. Gana ang among kaon sa giorder ni Nene Kwan nga letson manok bisaya, fried boneless bangus, Nylon shell soup, tinulang lapulapu ug sautéed kangkong.
Among gitapos ang ikaduhang adlaw sa group singing ug karaoke ballroom dancing sa resto bar sa Days Hotel. Serenading attire ang among gisul-ob sa ikaduhang gabii.
Natandog ang akong kasingkasing sa endearing nga harana ni Ruffy Ignacio sa iyang asawa. Maayo diay mokanta ang akong propesor sa physics sa MSU.
Sa ikatulong adlaw, ang mga lig-on pag tuhod nag- zumba gihapon sa wala pa mamahaw.
Kining adlawa gigahin sa hamubo nga pagsuroy sa dakbayan ug hataas nga biyahe paingon Tigbauan. Mihapit mis mga tourist spot nga maagian. Una namong gihunongan ang Molo Church, usa ka neo-gothic colonial church nga natukod niadtong 1831 ug nabantog sa iyang white-coral façade ug mga estatuwa sa babayeng mga santos.
Ang St. Anne’s Church nga mas naila nga Molo Church usa sa mga giilang maanindot nga simbahan sa Pilipinas.
Mga 40 kilometro gikan sa Iloilo City, miabot mis Lungsod sa Miagao diin mibisita mis Santo Tomas de Villanueva Church. Nahuman pagtukod niadtong 1797, ang bastion-church nagsilbing kuta nga depensa sa ronda ug pag-atake sa mga Muslim. Ang simbahan nga nagtindog sa habog nga dapit ug nag-atubang sa dagat adunay tulo ka level nga mga bantawan. Ang mga bantawan gigamit aron makaabiso sa mga parokyano nga mangandam kon may umabotay nga mga pirata gikan sa amihanan ug habagatan. Ang baga nga batong bungbong ug lig-on nga buttress panalipod sa mga linog. Ang Miagao Church usa sa upat ka mga simbahan
sa Pilipinas nga naapil sa UNESCO World Heritage Site.
Nanghapit sad mis UP-Visayas apan taman ra mis pagparetrato sa atubangan sa oblation kay ang COVID-19 protocol sa unibersidad nagdili sa mga visita pagsulod sa kampus.
Ang Southeast Asian Fisheries Development Center (SEAFDEC)) usa ka intergovernmental nga kapunongan nga natukod niadtong Disyembre 1967 kansang katuyoan mao ang pagpausbaw sa sustainable fisheries development sa rehiyon. Ang Seafdec Aquaculture Department (SEAFDEC/AQD) sa Tigbauan nga natukod niadtong 1973 naghimog mga paniksik ( research), pagmantala sa bag-ong mga teknolohiya ug pagbansay sa mga tawo unsaon pagbuhi og mga isda, crustacean, kinhason ug lato para sa pagkaon ug panginabuhian sa paagi nga malungtaron.
Udtong tutok na sa among pag-abot sa SEAFDEC/AQD. Ang hepe ( chief) nga si Dan Baliao ang nanguna sa iyang bahan ( team) sa pag-abi-abi kanamo. Naka- wow mis reception, sa dining hall décor ug sa makabuhong nga pagkaon ( buffet). Human sa briefing ni Dan Baliao, gikuyogan mis pipila ka technical staff sa pagsuroy sa mga hatchery ug breeding tank.
Taliwala sa kainit sa Adlaw, nalingaw mig balhin-balhin ug pagkuhag hulagway sa gagmay ug dagkong mga tangke sa tubig diin gipaitlog, gipapusa ug gipatubo ang mga fingerling, juvenile o semilya sa bangus, pansat, pumpano, lapulapu, kasili, balat, kinhason ug lato. Didto ko unang nakakita og mga bangus nga nag-ead og 40 anyos.
Dako ang kalambigitan sa MSU ug SEAFDEC/AQD. Busa, dili katingalahan ang mainitong pag-abiabi kanamo. Ang unang chief sa SEAFDEC/AQD mao si Domiciano Villaluz (1973
79), Dean sa College of Fisheries sa MSU. Si Dr. Quiterio F. Miravite, propesor ug vice president sa MSU, dakog natabang sa pagpangitag pundo ug pagpalambo sa SEAFDEC/AQD sa siya pa ang deputy chief for general affairs sa SEAFDEC. Si Rufino Ignaco nakatabang usab og pangitag pundo niadtong vice president pa siya sa MSU. Daghang gradwado sa MSU ang nakatrabaho sa SEAFDEC/AQD apil na si Rolando Platon nga nahimong hepe sa SEAFDEC/AQD sulod sa napulo ka tuig (1996-2006). Si Platon payoner sa MSU ug nakatapos sa kurong Chemical Engineering. Si Pastor Torres, Jr ug ang iyang asawa nga si Celia kanhi dagkog katungdanan sa SEAFDEC/AQD.
Ang reyunyon pormal nga gitapos nianang pagkagabii sa resto bar sa Days Hotel. Human sa panihapon, gihimo ang puno sa kasadya nga parlor game, dugang mga group picture taking, tsika-tsika ug pagplano sa umaabot nga reyunyon.
Gihimo sad ang rapol sa pipila ka souvenir item lakip ang siyam ka coffee cup nga nga gipahimo ug gipadala ni Elizabeth Gabriel-Barbaso ug lima ka kopya sa “Looking Back, Memoir” nga akong bag-ong napatik nga libro. Girapol usab ni Frank Calmita ang iyang gipalit nga mga food delicacies pinaagi sa question-and-answer.
Nasabotan nga adto pagahimoon sa Iligan City ang sunod nga reyunyon nga gitakda sugod sa Hunyo 13, 2023 ug si Rose Balacuit ang napiling organizer o host. (Sa mga reyunyon sa MSU pioneers, kanunayng nasulod ang petsang June 13 tungod kay ang unang klase sa University of Mindanao (ang unang ngalan sa Mindanao State University) gihimo niadtong Hunyo 13, 1962).
Nasabotan usab nga magpabilin si Nene Kwan nga treasurer ug si Glenda Fortez ang bag-ong secretary.
Ang reyunyon sa
MSU Trailblazers sa Iloilo gisugdan sa mahinangpon nga panagkita sa unang gabii ug gitapos sa masulubon nga “till we meet again” sa kataposang gabii. Apan nagbulag mi nga naghambin og dakong paglaom nga makatambong sa umaabot nga mga reyunyon. Sa among edad nga anaa na sa “departure area” dakong grasya kon tugotan sa Ginoo ang kahigayonan nga makighugoy-hugoy sa mga MSU Trailblazers o sa mga nahabilin kanamo sa umaabot nga mga panagtapok. —
SAMTANG hinay-hinay kitang mobalik sa naandang paghimo sa mga kalihokan nga linawas dungan sa pagdagmay sa atong mga kinabuhi ngadto sa bag-ong normal nga atong nakat-onan sa paghasi sa pandemya, mahinungdanon usab nga mahibalik ang atong bantang, ilabi na sa mga alagad sa arte ug mga mahiligon sa arte.
Sa pagpaluyo niini, ang Sunday Club abli na alang sa pagsumiter sa matag sumusubang nga magsusulat gikan sa lainlaing dapit sa Pilipinas, ilabi na kadtong adunay gamot gikan sa Kabisay-an ug Kamindanawan, nga mamahimong tipik niining Ikaduhang Nasodnong Pasinati sa mga Magsusulat sa Sunday Club.
Kining maong pasinati sa mga magsusulat walay gahin gikan sa kagamhanan. Kini giplanohang ipahigayon sa Guinacot, Dakbayan sa Danao, Sugbo ug ipahigayon karong Nobiyembre 25-26, 2022.
Adunay siyam (9) ka gigahin nga luna ( slots) alang sa sumusubang nga mga magsusulat nga limitado lang niadtong wala pa makasuway og nasodnong pasinati sa mga magsusulat. Sama sa unang pasinati sa Sunday Club, kini gituyo gihapon aron pagduso sa katikaran sa mga magsusulat nga nagtinguhang mouswag ug makabaton og kompiyansa sa pagpresentar sa ilang mga kaugalingon diha sa nasodnong bantawan.
Ang mga aplikante nga nagpuyo gawas sa Sugbo kinahanglan andam moabaga sa mga galastohan sa pagbiyahe paingon sa dapit-pasinatian. Aduna usay itanyag nga hatod-kuha nga transportasyon gikan sa Dakbayan sa Sugbo paingon-balik sa dapitpasinatian. Libre ang pagkaon atol sa mga adlaw sa pasinati.
Ang pasinati himoon sa pamaagi nga estilo sa kamping (ipahigayon sa gawas) nga masadya, maartehon, ug puno sa akademyanhong kalihokan gikan sa buntag hangtod sa gabii sa maong mga adlaw. Higpit usab nga ipatuman ang mga batakan sa kahimsog, kaluwasan, ug seguridad.
Ang pinasidunggang mamumuong ug mga panelista ianunsiyo lang unya karong umaabot Septiyembre ning tuiga.
Ang hatagag konsiderasyon, mao ang mga manuskrito sa bisan unsang Pilipinhong pinulongan:
Balak: han-ay sa tulo (3) ka balak;
Piksiyon: usa (1) ka sugilanon; kun duha (2) ka sinulat nga sugikiblat;
Malalangong Di-Piksiyon: usa (1) ka malalangong di-piksiyon (mas maayo kon personal ug dili mga obra nga gikan sa panukiduki)
Ang mga obra nga sinulat sa mga pinulongan nga dili Binisayang Sinugboanon, Iningles, kun Tinagalog kinahanglan nga maglakip og hubad sa Iningles kun Tinagalog. Kon hubaron man ang mga salmot nga Binisayang Sinugboanon, kini kabubuton lamang sa sumasalmot. Timan-an usab nga ang pinulongan nga gamiton atol sa pasinati mao ang Binisayang Sinugboanon.
Dawaton namo ang karaan ug bag-ong sinulat, napatik o wala mapatik, apan kinahanglan nga kini wala pa makadawat og pag-ila gikan sa mga establisadong tighatagan og mga pasidungog sa mga buhat nga katitikanon. Ang komite sa tig-ag-ag sa Sunday Club nakahukom nga dili moimposar og tema o hilisgotan alang sa mga salmot ning tuiga.
Ang buot mosalmot nga mga magsusulat gikinahanglang motubag sa mosunod nga Google Form:
https://docs.google.com/forms/d/e/1FAIpQLSdoPejEm mTQip9YSHsG8Qy2nyTAM0ozPJg7-6Pp8zNAXApVtg/ viewform?usp=sf_link
Ang mga salmot dawaton pinasikad ning mosunod nga batakan: (1) manuskrito sa MS Word Document (tipo: Arial kun Times New Roman, sukod 12, doble nga giblang (gawas sa Balak) diha sa Sulat-gidak-on nga papel), (2) talaan sa mga nahimo ( curriculum vitae) uban ang mubong asoy sa kaugalingon.
Ang matag aplikante mahimong mopadala sa lainlaing kategoriya (Balak, Piksiyon, o Malalangong Di-Piksiyon), apan limitado lang sa usa ka salmot sa matag kategoriya.
Ipadala ang inyong mga salmot pinaagi sa link nga gihatag sa ibabaw. Ang kataposang petsa sa pagpanawat karong Septiyembre 1, 2022.
Ang dugang nga mga pakisayod ipangutana lang kang John Danté, ang Direktor sa Pasinati, o kaha sa pahina sa Facebook sa Sunday Club o kaha sa pagpadala og dagitsulat sa scnww2022@ gmail.com.
Padayon. Dayon. Magmabungahon.
TAWAG SA PAGSUMITER SA IKADUHANG NASODNONG PASINATI SA MGA MAGSUSULAT SA SUNDAY CLUB