Ang Naghulat
GITAPTAPAN niya sa palad ang iyang baba aron dili masulip sa mga nanglabay ang iyang tilaok ug lingagngag sa iyang pagpanghuy-ab. Sa iyang paminaw, morag hapit na tingali siya tugkig mga gamot dinha sa iyang gilingkorang bangko sa daplin adtong sementong dalan-dalan nga galikos sa plasa. Namuti na sab tingali ang iyang kalimutaw nga kaganiha rag sigeng liraw-liraw.
“Ingon nila wala kunoy forever,” pasiaw niya sa kaugalingon, “pero ngano lagi nga morag forever na man ko aning naghulat bi?”
Dala panghupaw siya nga mitindog gikan sa gilingkoran. Gipuli-puli niyag alsa gamay ang iyang mga tiil ug gikiwil-kiwil kini aron pagpabalik sa sirkulasyon sa ingon-sa-hapit-na-makatulog nga dugo. Dayon, ang iyang mga kamot na pod ang iyang giwilik-wilik. Unya, gihiko-hiko niya ang iyang ulo aron pag-inat sa ingon sa mingkulo nang kaugatan sa kilid nga bahin sa iyang liog.
Dihang medyo nawagtang na ang gibating kaduka, nagpadayon siya sa pagnanaw sa palibot sa plasa. Pero sama kaganina, wala niya igkita ang iyang gipangita, wala gyod gihapon miabot ang iyang gipaabot.
“Marga, Marga, asa ka na? Marga, Marga, palihog abot na! Pakita na tawon, Marga!” balik-balik niyang sangpit dinha sa iyang hunahuna daw usa ka orasyon o pangadye. Hilom niya kining giyamyam, daw nagtuo nga maghatag kini sa maong mga pulong og gahom nga mamahimong tinuod ug sa ingon mobutho dinha sa iyang atubangan si Marga. Apan bisag giunsa niyag pangadye, wala gyod mitunga ang iyang teksmeyt.
Si Marga maoy iyang kinaunhang teksmeyt sukad masukad. Ug kausa pa lang pod sila nagkita. Dinhing dapita gihapon sila adto nagsabot nga mag-abot. Bata pa si Marga kon itandi kaniya, mga kinse ka tuig ang gintang sa ilang edad. Apan sa ilang panaghimamat, ingon sa wala ra panumbalinga ni Marga ang maong gintang busa nahiluna ra pod ang iyang kalag. Gawas nga lingaw sud-ongon, lingaw sab ikaestorya si Marga mao nga gaan kaayo ang iyang buot niini.
Samtang sila nagmeryenda (siyay bangka, natural), nagpadungogdungog si Marga nga nagkinahanglan kinig kuwarta— pangbayad kuno sa taudtaod nang nadelatar nga abang sa ilang gipuy-an nga kon dili hibayran anang bulana papahawaon na sila sa tag-iya sa balay. Ang iyang pagduhaduha dali rang napapha sa paraygong tingog ug hapyod ni Marga. Human sa ilang meryenda, nangadto silag ATM ug nagkuha siyag unom ka libo— ang lima ka libo iyang gitunol kang Marga aron ibayad sa nadelatar nga abang. Ang nahibilin nga usa ka libo maoy iyang gikuhaan sa gasto sa ilang pagsuroy ug pagpanan-awg sine (mosugot man unta si Marga nga makigtsek-in kon wala lang maatol nga dinha kuno ang binulan niini adtong higayona).
Karong adlawa maoy ilang nasabotan nga magkitag usab ug ingon pa ni Marga puyde na silang motsek-in kon gusto siya. Apan naunsa man nga nahaponan na lang ug nakahurot na siyag usa ka kahang sigarilyo, wala pa gyod gihapon kini moabot?
Mibalik siyag lingkod. Nanghuy-ab pag-usab. Gipagawas ang iyang dual SIM nga selpon. Gipaandar niya kini aron makateks kang Marga. Mikisdom ang iyang nawong.
“Unsa god ning demalasa?” Nakasukna siya sa kaugalingon dihang nakita nga pareho gyong walay signal ang duha ka network sa iyang selpon. Giuyog-uyog niya ug gipikpik ang selpon sa pamasin nga mobalik ang signal bisan sa usa lang ka network, apan wala kini magsilbi. Mao nga
iya kining gipalong kadiyot. Pero mao lang gihapon dihang gibalik niya kinig paandar, walay signal. Gitangtang niya ang taklob sa luyo ug ang bateriya ug giduot-duot ang mga SIM card niini. Kawang lang gihapon kay nagpabiling wala gyoy signal ang iyang selpon.
Nakalingi siya sa pikas nga lingkoranan ug nakita ang duha ka batanong babaye nga nag-iyahay og tuplok sa ilang mga selpon paghimog mensaheng teks. Ug nakahunahuna siya nga basin og dead spot ang iyang nahimutangan, kanang puwesto nga wala gyoy signal.
Mao nga mitindog siya aron mopaduol sa gipuwestohan sa duha ka batan-ong babaye. Pag-aksiyon niyag tikang padulong sa pikas lingkoranan, mao gyoy paghaguros og agi sa duha ka batan-ong lalaki nga nagdulag skateboard. Ingon sa wala ray nakitang tawo ang duha mao nga siya na lang ang milihay og gamay para dili madam-agan o masaghiran. Pero morag natapsingan gyod siya sa misiwil nga siko sa usa sa mga nag- skateboard; hinuon, wala ra man pod siya matandog.
“Pastilan gyod ning mga batan-on karon, walay pakabana sa isigkatawo ug patuyang ra sa kaugalingon,” bagutbot niya.
“Hi-hi-hi! Tan-awa ra god ning teks sa amew, o!” Miagik-ik ang usa sa mga batan-ong babaye nga nagpakita sa iyang selpon ngadto sa katapad. Dinha na siya sa may luyo sa duha ka babaye pero wala ra sila manumbaling kaniya bisan dihang miagi siya sa ilang kilid. Mitingog ang selpon sa usa nila, abiso nga naay misulod nga teks. Gitan-aw niya ang iyang selpon. Wala lang gihapoy signal! Iya kining giisa ug nagtuyoktuyok siya aron pagpangitag signal pero bisag giunsa pa, wala gyod siya kadakop bisan na lang daklit nga signal. Samtang ang duha ka batan-ong babaye dinha sa lingkoranan puwerteng lingaha sa padayong pakigteks sa ilang tagsa-tagsang teksmeyt.
Nangagho siya aron pagpahungaw sa nagsagol nga kapungot, kahimangod ug kapuol. Diha pa niya himatikdi nga misugod na diay pagsakdop ang kilumkilom. Busa nakahukom siya nga moundang nag hulat kang Marga. Huyhoy ang mga abaga, ingon sa hubog ug wala sa buot siyang mibaklay pagawas sa plasa.
Dihang nakagawas na sa plasa, mipaturatoy siya pagtabok sa karsada samtang nagsigeg hunahuna kon unsa gyod kahay hinungdan nga wala makatunga ang iyang teksmeyt. Gibati gyod siyag kahinugon sa pagkapakyas sa ilang gikasabotang panagtagbo kay miingon baya to si Marga nga mosugot na siyang magtsek-in sila. Tungod tingali sa maong pagkalinga sa iyang hunahuna mao nga wala siya makaalinggat (o wala manumbaling) sa nagsingabot nga awto nga kusog ang dagan nga mioberteyk sa usa ka trak de karga.
Kalit siyang nakadungog og lagubo dungan sa pagkabati sa kusog nga pagdumbol sa iyang kilid. Misapaw dayon niini ang ingon sa hilabihang kakurat nga siyagit sa mga tawo, samtang ingon sa milutaw siya. Unya, nahilom ang tanan sa palibot ug gibukotan siya sa kangitngit nga mas dagtom pa sa kagabhion…
GITAPTAPAN niya sa palad ang iyang baba aron dili masul-ip sa mga nanglabay ang iyang tilaok ug lingagngag sa iyang pagpanghuy-ab. Sa iyang paminaw, morag hapit na tingali siya tugkig mga gamot dinha sa iyang gilingkorang bangko sa daplin adtong sementong dalan-dalan nga galikos sa plasa. Namuti na sab tingali ang iyang kalimutaw nga kaganiha rag sigeng liraw-liraw.
“Ingon nila wala kunoy forever,” pasiaw niya sa kaugalingon, “pero ngano lagi nga morag forever na man ko aning naghulat bi?”
(KATAPOSAN)
Naghuro-huro ang iyang galamhan sa kahinam niining subli nilang panagtagbo ni Marga. Apan...