Hydroponics: Ang Pagpananom sa Tubig
Sa akong kaagi, ang labing lisod niining klaseha sa teknolohiya sa pagpanguma mao ang pagsugod. Wala man kini gitudlo sa akong gieskuylahan ilabi na nga dili man sab ko agriculturist. Gamit ang social media, gamayng panukiduki sa google bahin sa mga resea
DAGHAN ang pangutana mahitungod sa hydroponics. Mao kining klase sa pagpananom nga anha patuboon ang mga buwak, utanon ug fruit bearing plants sa tubig. Ang hydroponics dunay dakong tabang ilabi na adtong gustong manguma nga walay dakong luna nga gipanag-iya. Kini tungod kay dili kinahanglan sa hydroponics ang dakong espasyo, gawas na lang tingali kon mangambisyon og commercial scale. Pero kon hilig lang gyod ang pagpananom, nindot ang hydroponics gamiton. Makalingaw kaayo kini nga hobby.
Gani daghan pod kog pangutana mahitungod ining teknolohiyaa tungod kay naandan man nato nga ang yuta gyod ang gamiton isip medium sa pagpananom. Kon itandi kining pamaagiha sa tradisyonal o bisan sa indigenous nga mga pamaagi sa pagpananom, layo ra gyod kaayo.
Taas ang diskusyon mahitungod sa hydroponics. Apan sugdan tas ginagmayng mga pangutana kon unsang klaseha sa mga tanom ang motubo sa hydroponics— ang kamatis, petsay, lettuce, pipino ug melon. Kini ang pipila lang sa mga tanom nga puyde natong i- hydroponics.
Sa akong kaagi, ang labing lisod niining klaseha sa teknolohiya sa pagpanguma mao ang pagsugod. Wala man kini gitudlo sa akong gieskuylahan ilabi na nga dili man sab ko agriculturist. Gamit ang social media, gamayng panukiduki sa google bahin sa mga research sa hydroponics ug ilabi na diha sa youtube nga puno sa mga tutorial, nakahimo ko pagsugod og tanom sa lettuce.
Gamit ang mga tindahan sa online, nakasugod kog pamalit sa mga kinahanglanon. Sama pananglit sa mga semilya sa lettuce nga naa ra sa Shopee o Lazada ba kaha. Apil na dinhi ang mga nutrient solution nga gamiton sa pagtempla sa tubig nga maoy mahimong kinabuhi sa tanom. Ang butangan sa tinemplang tubig gitawag og grow box kun tuna box nga mapalit
ra sab diha sa mga palengke. Gamit ang cocopeat nga gisulod sa styrocup, makahimo ka nang makasugod sa pagtanom sa hydroponics.
Konsiderasyon sa Pag-hydroponics
DIHAY mga konsidersasyon sa pagpatubo sa tanom sa hydroponics. Sama pananglit sa volume o kadaghanon sa cocopeat nga naa sa cup, Ph level kun acidity sa tubig, TDS (Total Dissolved Solids) sa tubig, pag-ihap sa adlaw adesir mag- transplant sa tanom sa grow box, ug ang pagmentenar sa mga tanom matag adlaw.
Sa akong kaagi, ang kadaghanon sa cocopeat nga ibutang sa styrocup naa ras mga 25 percent sa gidaghanon nga masulod
sa baso. Kini tungod kinahanglanon sa lettuce nga mogawas ang iyang mga gamot sa mga buslot sa styrocup. Ug kon makagawas na, makaginhawa na ang tanom (gitawag kinig aeration) ug mopadayon ang iyang pagtubo diha sa grow box. Gamit ang Ph pen meter, human matempla ang nutrient solution sa tubig, kinahanglang mosulod sa range nga 5.5-6.5. Kini aron dili masunog ang tanom kun mag- leggy ba kaha ang mga dahon. Ang TDS pen meter sad ang gamiton aron masukod ang solids nga natunaw diha sa tubig. Kay mogamit man kitag nutrient solution, natural nga dunay mga dissolved solid sa tubig human sa pagtempla. Ang sukdanan adto nato tan-awon sa PPM ( parts per million), nga kon lettuce ang imong itanom, mohagbong lang tas range nga 650-850
ppm. Kini ra ang makaya nga solids, gikan sa nutrient solution nga ma- absorb sa lettuce. Atong hibaw-an nga ang matag tanom, dunay lainlaing requirements aron motubo sila sa atong hydroponics set-up.
Dali ra baya motubo ang lettuce sa hydroponics. Gani, gikan sa akong pagsabod (kon imong isabod ang pagpaturok kay duna man poy uban sa seedling tray), moturok na ang liso sulod sa 24 oras. Gikan sa pagpaturok, moihap ka lang og pito ka adlaw o di ba kaha hangtod moupat ang dahon sa semilya, puyde na siyang i- transplant.
Ang hydroponics, usa ka plant and forget method. Kini tungod kay gamay lang ang oras nga imong igahin sa monitoring. Pag-abot sa 30-35 ka adlaw, depende sa variety, puyde nang mag- harvest. Ug sa naandang presyo sa merkado, ang usa ka cup mokantidad og 25 pesos.
Kon negosyo ang hisgotan, potential ang hydroponics. Kon lettuce ang imong produkto, mahalin gyod siya sa merkado. Bisan gani diha lang sa kasilinganan, maagni gyod silang mopalit sa imong lettuce para sa sal salad, ilabi na kadtong mahiligon sa green vegetables. —