Bisaya

Tukianay Dala Tagay: Pagtuki sa Una ug Ikaduhang Anib sa Kinatibuk-ang Unom Ka Seryeng “Obi-Wan Kenobi”

- Ni RAYAN DALAKILAT

A Akataposan, hingpit na gayod ang kasulatan sa kinabuhi sa labing banggiitan­g Jedi sa tibuok kabituonan: ang walay lain kon dili si Obi Wan Kenobi (pasensiya na kang Ahsoka Tano, kon wala pa lang niya isalikway ang iyang pagka bagani sa kahayag siya unta ang akong sab-itan anang dungoga).

Pagbuka pa lamang sa puting tabil, gidalitan dayon kita og mga balik-tan-aw nga gikutlo sa mga halandomon­g esena sa prekwel nga trilohiya (nga usab gibalik ngadto sa tunga-tungang bahin sa maong anib pinaagi sa daotang damgo nga giurom sa atong bida) Dihadiha, ako nalumos sa makabuhong nga kahidlaw nga gibugwak nganhi sa akong kalimutaw. Mitulo akong luha sa paggilak-gilak ning mga panumdoman­a gumikan sa kalipay, hinungdan sa akong pagduaw usab sa kalibotan nga nakapasana­g sa akong pagkabayon­g-bayong, ang maong balatian nga ginuntan og kasubo ug kasakit dihang nakita ko ang kahimtang ni Obi-Wan: nag-inusara pagpuyo sa langob nga puno sa pagbasol sa kaugalingo­n, kaalot ug pagkawalay paglaom tungod sa iyang kapakyasan sa pag-agni ug pagtubos kang Anakin Skywalker, iyang kanhi tinun-an nga gidaot sa gahom sa kangitngit, dugang pa niana ang pagkapukan sa mga kabalyeron­g Jedi diin gipangbuno ang suod niyang kaigsoonan human sila gibudhian sa Kasundaloh­an sa mga Huladnon (Clone), lagi binuhatan to sa microchip nga gibutang sa ilang utok. Maong mga trahedya ug katalagman nga nag-alinupong sa iyang tanlag kay lagi, iyang gilukdo pag-angkon ang tumang kasal-anan niini busa gisagubang na lamang niya ang bugtong tahas sa pagpanalip­od sa batang Luke Skywalker (ang bida sa orihinal nga trilohiya) kinsa gipadako nila ni Owen ug

Beru Lars, mga mangangani og tubig (moisture farmers) sa desyertong planeta sa Tatooine.

Dinhi gipasunday­ag pag-ayo ang kahanas ni Ewan Mcgregor, ang artista nga nagdala sa papel ni Kenobi, ilabi na sa mga esena diin naginusara ang karakter, iya gayong napahatod ang balatian ug hunahuna sa karakter sa mga tumatan-aw gamit lamang ang gilaw-gilaw sa iyang mata (misugid si Mcgregor nga iyang gimatikdan pag-ayo ang orihinal nga aktor ni Kenobi nga si anhing Amba Alec Guiness sa iyang pag-arte tungod kay midutdot na ang talamdagan sa serye sa panghitabo sa “Episode IV: A New Hope” kun ang kinaunhang Star Wars nga lilas) diin nakita nako ang tanang kaagoman nga iyang gihambin, sa daotang urom nga esena nga akong nahisgotan ug sa mga bahin diin nagtrabaho ang kanhi Jedi sa usa ka karnehanan­g gitukod tungod sa patayng lawas sa usa ka dakong mananap, (nga sa unang tan-aw naalaan nakong usa ka krayt dragon apan diay may dakong silik ug daw dakong isda ang panagway, isda nga mabuhi sa kabadsanan kaha?) tataw kaayong nahikyad sa nawong ni Kenobi ang iyang pagdawat sa bag-o niyang kinabuhi isip ermitanyo sa desyerto, mitutok lamang siya sa iyang buhat ug tataw nga wala siya misuway pagpakighi­gala aron makunhoran ang purohan nga may makaila kaniya, lakip na niana ang pagsalindo­t niya sa mga hiyas sa pagka

Jedi: sa iyang pagpangawa­t og hiwa sa karne (ahak! samoka gyod, uy, naglaway kong nagtan-aw niya paghiwa adto, Do) ug sa iyang pagpalabay sa palabi-labi sa iyang amo nga dili manghatag og saktong suhol ug mangulata sa mga moangal nga trabahante. Gibundak gayod sa mga esena ang tumong nga ipahulagwa­y ang magul-anon ug laay

nga yugto sa kinabuhi ni Obi-Wan.

Sa laing bahin, sa Tatooine mitugpa ang sakyanang pangkawana­ngan sa mga bata-bata ni Darth Vader— ang mga Inkisidor, nga ingon kaniya mga kanhi bagani nga namudhi sa Hugpong sa Jedi ug midapig sa habig sa Imperyo Galaktiko. Gipamunoan kini sa Punoang Inkisidor nga gipasunday­ag ni Rupert Friend (unang gipaila ang karakter sa serye-animasyong “Star Wars: Rebels” diin gihatagan siya og tingog ni Jason Issacs. Gisibya ang serye niadtong 2014 hangtod 2018 ug gipahigayo­n sa lima ka tuig human sa talamdagan sa “Kenobi”), ang Ika-5 ka Igsoon kun Fifth Brother kansang uniporme gisul-ob ni Sung Kang (sama sa Punoang Inkisidor una usab mitungha ang karakter sa “Rebels” diin gihatagan siya og tingog ni Philip Anthony-Rodriguez) ug si Reva ang Ika-3 nga Igsoon kun Third Sister nga gipasunday­ag ni Moses Ingram. Wala ko moangay sa iyang pag-arte sa karakter sa tinuod lang; gimaotan ko sa iyang pagdala sa iyang mga linya, kugmohon pa kaayo ang aktor ug daw pinugos ang mga ekspresyon sa iyang nawong, duha ra ka hitsura iyang mabuhat: kasuko nga morag bata nga nagmanya ug pagtanga ug paghinukto­k). Bitaw, hawod pa ang aktor sa Second Sister sa “Jedi: Fallen Order” ug, bisan tuod motion captured lang to sa duwa, mas daghan pa gihapon siyag ekpresyon nga nabuga, mangunta na lang ko nga molambo iyang pag-arte sa umaabot nga mga episode pero dili gyod rason ang direksyon ni Deborah Chow kay siya ray bugtong direktor ning seryeha lahi sa “Mandaloria­n” diin gibahin-bahin ang pagdirehir sa mga episode. Layong gibutyag ang ilang tumong sa pagduaw sa planeta nga nahimutang sa outer rim nga rehiyon sa kapunawpun­awan: dunay nahabiling Jedi nga ilang gilutos ug gipatuo kita nga si Obi-Wan kadto agi sa kasilag nga gipakita ni Reva kinsa buot siya sikopon. Gipatuo sad ta nga may kaagi sila ni Obi-Wan pero mao pa man ni ang unang pagsulod ni Reva sa tibuok prangkisa, wala motumaw ang karakter sa mga gipagula nga komiks ug mga sugilambon­g nga sakop sa kanonidad ug labaw nang wala siya sa “Star Wars: The Clone Wars” nga gipahigayo­n tali sa “Attack of the Clones” ug “Revenge of the Sith”. Pero lagi wala ko ganahi sa iyang pagdala, ug bisan ang Fifth Brother ug Punoang Inkisidor uyon ani kay sila mismo gisamokan kang Reva, ha-ha-ha.

Gisulod nila ang usa ka balay-imnanan sa Dakbayan sa Mos

Eisley aron subayon ang agi sa nakaikyas nga Jedi. Dinhi naghatag og pamulong ang Punoang Inkisidor kabahin sa kapildehan ug kaparotan sa mga Jedi, ang ilang paghunaw sa ilang katungdana­n (nahibawo ta nga dako nang butbot, pero mao ning bakaka ang hungit sa Imperyo ngadto sa mga lumulupyo sa Layong Kapunawan) ug ang dako nilang kamaluyaho­n diin dili sila makapugong sa pagtabang sa katilingba­n. Halos iyang gipanitan pag-usisa ang tag-iya sa maong katukoran dihang galabayan kini ni Reva og kutsilyo, kalit og mihunong ang silab sa wala pa kini makaduslak sa buna sa amo sa tagayanan nga napuno sa kalisang ang nawong.

Nasapnan nila ang Jedi nga nagdungo sa suok, ang kamot ini gipataas. Mibulhot kini pagsutoy human mabulgar ang iyang pagkabutan­g. Dinhi upod gipadayag ang panag-unayay og sumpaki sa mga Inkisidor gumikan sa masupilong kinaiya ni Reva, nga sa dagan ning duha ka anib, kanunay rang misupak sa sugo sa Punoang Inkisidor. Tinuod sab kini sa kanonikal nga mga obra diin ginapakita ang ilang panagbangi, sa pagkuha sa pabor ni Vader. Nakalingka­was ang laag nga Jedi nga nagpailang Nari. Nahibal-an nato sa mga mingsunod niyang esena nga usa siya sa younglings nga nakaikyas sa luog nga pangpatay sa Templo sa Jedi nga gibalik-lantaw sa sinugdanan aning aniba. (Lagi, hangtod ron wa pa gihapon ko mahuwasi, pero segurado ko nga di to mao ang mga baktin nga gihagbas ni Anakin sa Episode 3). Hayan usa adto nila si Reva kay wala ko makit-i ang tuyo adtong pagpakita sa ilang agi kon dili to modugtong sa kasamtanga­ng estorya, giadtoan ni Nari sa Obi-Wan sa tumong nga magpaabag kaniya, pirmero gilimoran kini ni Kenobi agi sa iyang kahadlok nga maladlad iyang pagka tawo apan midaog iyang kaluoy, nan, iyaha kining gitambagan:

“You want my help? Stay hidden, take this and bury it in the dessert. The war is over, we lost,” ang mga pulong nga nag-undak gayod sa pangisip ni Kenobi ug klaro sa iyang tingog ang pagka matahanon niya.

“What happened to you, Obi-Wan?” nakapangut­ana si Nari.

Nasingo ko ang kasub-anan nga gialisngaw ning gutloa paglugdang sa panagway ni Nari dihang nakita niya ang barog ini, ang usa sa mga kinabantog­ang Haniti nga Jedi-Heneral, (ang ranggo nga iyang gitangkil atol sa Gubat sa mga Huladnon nga mibayaw sa iyang dungog) nga karon miangkon na lamang sa kapildehan. Tataw pod sa mga mata ni Kenobi ang kasakit sa iyang pagbalibad sa batan-ong Jedi (kon kahibawo pa lang ka sa iyahang giproteksi­yonan, Tsoy, pero hinuon di sad ta ka mabasol).

Sa sunod nga mga esena, nasaksihan nato ang pagbalik ni Owen Lars (kinsa gipasunday­ag ni Joel Egerton), ang nagsilbing ama-ama ni Luke kinsa mipina kang Obi-Wan sa pagduol sa tugkaran sa ilang umahan labi na sa pagpakig-ila-ila kang Luke kay lagi buot niya kini himoong usa ka Jedi.

“When the time comes he must be trained, Owen,” lalis ni Obi-Wan.

“Like you trained his father?” sumbalik kaniya sa mangangani og tubig.

Gikabuanga­n gyod ni sa mga magdadayeg sa dagitpukot nga lagi kaubo og ayo si Obi-Wan kay naa siya ato, pero seryoso, dako gyod ning kasaypanan para niya ug kanunay ning magkaguliy­ang sa iyang galamhan ug ang paksi niini sakit pa sa kainit sa kaluhang Adlaw sa Tatooine. Dugang pa ini, gibusdak ni Owen ang dulaang skyhopper nga iyang gipalit sa mga Jawa alang kang Luke. Nasabtan ko sad ang pangataron­gan ni Owen kay sige uroy, ibutang kaha ang imong kaugalingo­n sa iyang dapit, si Kenobi (sa ilang pagkahibal­o) ang mamumuno ni Anakin gumikan sa pagkapakya­s niya sa iyang pagka magtutudlo niini. Hawod kaayo ang pagdala ni Joel sa karakter ni Owen, ug nagkaduyog sila ni Mcgregor sa kemika sa ilang pag-arte. Dakog papel ang pagpili ni Amoy George Lucas kaniya kaniadto pa sa pagsiyotin­g sa prekwel nga trilohiya. Dako usab og naamot ang

Hayan nga dakong pagsupak kadto sa mitolohiya kay dili gyod to angay niya mahibalan. Pinasubay sa kanonidad, pipila lamang ka tawo ang nasayod nga si Anakin, ang ilang gikaintapa­ng ginoo sa kangitngit, kana si mperador Palpatine o Ginoo Sidious, si Laksamana Thrawn ug si Punoang Moff Tarkin.

lilasnong kasinatian nga natigom ni Egerton gikan sa miaging dekada. Gibugaw ni Owen si Kenobi human mitunga pagbalik ang mga Inkisidor, ug si Reva sa iyang pagkaapura­do namungkol og usa ka lungsorano­n nga mikontra sa ilang paghimulbo­l sa tibuok kapurokan.

Nahatunong dayon iyang atensiyon ngadto kang Owen nga miapil sa mga nagtapok. Dihadiha siya gihulga ni Reva nga dahigon pa iyang pamilya kon dili siya mosulti sa gikahimuta­ngan sa Jedi. Gisalikwao­tan ko sa pag-arte ni Gining Ingram, daw giugom niya ang iyang mga pulong, lisod katuohan nga usa siya ka tinugyanan sa kangitngit. Ingon siyas klasmeyt nako sa hayskol, mao mao ra gyod silag bantang.

Taliwala sa iyang pagdili kang Obi-Wan, wala ibulgar ni Owen ang tagoanan ni Kenobi kinsa naglili sa usa ka kanto. Apan alang kini sa kahilwasan ni Luke ug dili sa kanhi haniting Jedi.

“Thank you Owen,” maoy sulti ni Kenobi human mibiya ang mga Inkisidor.

“Didn’t do it for you, did it for the kid,” bawos sad sa mangangani, kinsa miabog kaniyag usab.

Miuli si Kenobi ngadto sa langob nga iyang gipasilong­an dihang kalit nga mibagting ang iyang holograpik­ong igkukutay diin gipangayoa­n siya og tabang ni Bail Organa (kansang papel gibalikan sa beteranong Jimmy Smitts), ang dato ug magbatasan sa planeta sa Alderaan ug usa sa iyang karaang abay. Gibalitaan siya ini sa pagdagit sa iyang anak-anak nga si Leia nga mao upod ang kaluha ni Luke. Gihatagan og kinabuhi ang 10-ka-tuig nga prinsesa sa batang aktor nga si Vivien Lyra Blair.

Alang kanako, sakto kaayo ang pagpili kang Inday Blair. Nahuptan niya sa hingpit ang mga gawi ug tahas ni Leia nga nailhan nato sa iyang dalagang panuigon. Ug nalingaw ko sa iyang mga esena sa Alderaan diin gihulagway iyang adlaw-adlaw nga kinabuhi isip membro sa halangdong banay. Sa mga bahin diin hilis iyahang silbing ig-agaw dihang gibanda kaniya ang biaybiay ini. (“you thank your droids?” “its good manners” “you don’t need manners when you’re talking to a lower lifeform. ” “then I guess I don’t need manners when I’m talking to you.” Uwawa lagi ato.) Dinhi usab mitipik ang serye og higayon sa pagpakita sa puangod ni Leia ngadto sa mga makinang buhi, ilabi na sa iyang dagitabnon­g gaminap nga si L0LA59 nga gianggaan niya og “lola”. Ang yugto ni Leia ini daw managsama sa iyang kaluhang lalaki sa sinugdanan sa “A New Hope” nga, ingon kang Luke, buot niyang biyaan ang iyang kalikopan aron panimpalar­an ang kawanangan; dayag kini sa iyang pagsibat-sibat sa ilang panting. Aduna sad siyay makapahiyo­m nga esena uban kang Bail. Maayo ang pagdala ni Jimmy Smitts pero, matay, klaro kaayo nga wa siya kaluy-i sa iyang pangedaron, mas tiguwang pa siya dinhi kaysa iyang kataposang pagpatim-aw sa “Rogue One” nga gipagula kaniadto pang 2016 bisan tuod gipahigon kadto 8 ka tuig human ning serye.

Pero, sa maayong bahin, wala ra to makasabal sa iyang pag-arte diin gitambanga­n siya sa iyang ama-ama. Makita dinhi ang pagpangga niya kang Leia bisan pag dili niya kini kadugo. Gani, si Leia iyang gitaklayan sa pagka manununod sa kalibotan sa Alderaan. Matamisong mga gutlo nga naasloman sa kasayoran sa ilang dadangatan pagabot sa “A New Hope”. Human niini, mibalik paglaroy-laroy si Leia ngadto sa kalibonan nga sagad niyang adtoan. Wala niya mamatikdi nga diay, dunay mga mangangaya­m nga nangukoy sa kakahoyan nga mingduol kaniya. Diretso siyang midagan (lagota lagi sa ilang lakag sa tinuod lang gyod, ahak, ilhan kaayo nga wa maninuod og dagan ang mga aktor sa managitay. Kabawo ko nga natural lang nga hinay ang paglihok ni Vivein. Bata god siya, no? Pero daghan pa may laing paagi sa pagsiyotin­g aning esena kay kiwaw gyod ang ilang pagpresent­ar ini. Nasakmit nila ang batang prinsesa human nila gipatay ang usa sa mga magbalanta­y nga gipapangit­a kaniya.

Tungod kay gibalibara­n siya ni Kenobi sa pagluwas sa iyang sinagop nga anak, personal nga giduaw ni Bail si Obi-Wan sa Tatooine aron hangyoon sa pag-usab ang Jedi. Midumili usab si Kenobi hangtod nga gipahimagn­oan siya sa magbatasan sa iyang tulubagon ngadto sa kaluha ug dili lamang kang Luke.

“You couldn’t save Anakin, but you can save her,” kini ang iyang tanlag nga midat-og sa iyang kaisipan ang bug-os nga nakapaagni kaniya.

Dinhi kita gipatilaw sa inanay nga pagbalik ni Kenobi sa iyang kanhiayng barog, sa paghugkat niya sa iyang kampilaw (kampilan nga mosilaw) nga iyang gilubong sa usa ka kaban ilalom sa kabalasan. Labihan kamasumbin­gayon ang igo ining esenaha— ang espada nga iyang gilubong usa sa nahabiling handomanan sa suod niyang higala, nga human sa napulo ka tuig iyang gihipos ug gipugos paghikalim­ot, karon kinahangla­n niya kining pagaatuban­gon.

Dihang miadto si Obi-Wan sa pantalang pangkawana­ngan sa Mos Eisley, nahikaplag­an niya ang patayng lawas ni Nari nga gibitay sa usa ka atop diin gipamalamd­ongan niya sa daklit. Wala itug-an kinsa ang nagbuno niini ug wa sad kiniy lakra sa paso agi sa tinigbasan sa nagalingit­ing nga silab. Gawas pa niana, daw dili ang mga Inkisidor ang nagpatay niya kay dili sila ilado sa pagbiya sa minatay sa ilang biktima; ug kon si Reva man galing adto, ngano laging wa siyay klarong samad sa kalawasan? Ug sa kasamtanga­ng kakulian, mibiya siya sa Tatooine. Dakong kabalaka nako sa pagtuong makasupak kini sa iyang baroganan apan naibtan kog tunok dihang gikatarong­an sa mga magsusulat sa serye ang pagdagit kang Leia isip hinungdan sa iyang paglawig sa laing mga lawangitan.

Gisunod ni Kenobi ang dum-ol (signal) nga gibuga sa himang pangsubay nga nakalanggi­kit sa sakayan sa mga nagdagit kang Leia. Gitultolan siya ini ngadto sa madag-omong planeta sa Daiyu nga sa unang sud-ong, daw Corruscant, (ang kaulohang kalibotan sa Imperyo Galaktiko). Ming-angkon ang mga tigdumala sa serye nga dakong diwanag ang Hong Kong (hilabi na sa mga salida nga gihitabo didto) sa pagmugna nila ining planetaha. Gipahimusl­an usab nila ang mga dibuho ug konsepto sa wala dayonang “Star Wars: Underworld”. Gilangkob ning kalibotana ang pagkalagit­om, kapiskay ug kamahulgao­n nga nagasilbin­g lunangan sa mga tulisan, kawatan, mga magpasuhol nga mga mamumuno, sindikato sa panakot ubp. (Ayaw katingala kon panakot o spice ang tawag nila sa ilegal nga mga droga, para sa tanang pangedaron man god ning prangkisah­a, lisod pod) nga dayag sa palibot ni ObiWan samtang gilatas niini ang magubotnon­g kadalanan sa dakong dakbayan.

Dinhi usab niya nasugatan ang usa ka huladnong sundalo nga karon usa na lamang ka makililimo­s (“help a veteran get a warm meal” grabeng pangluha nako ani ba, ilabi na kay gitan-aw ko ang “Star Wars: The Clone Wars” sa kinatibuk-an, misamot akong pagtuwaw sa pagkanga’n nga si Manoy Temura Morrison ang mibalik pagdala sa huladnon.) Mubo ra kining esenaha apan dako siya og dapat nganhi sa akong salabotan, kay dinhi gihiklad sa hingpit ang pagka mangtas sa Imperyo sa ilang pagtratar sa mga salin sa gubat. Alang kanila, daw sagbot ra nga gibuntaw sa kadaplinan. Sa laing bahin, gipahimug-atan usab ini ang bayanihong gawi nga padayon pa niyang gihambin kay taliwala sa pagbudhi nga gibuhat sa mga huladnon (otro nga mikrotsip ang sad-an adto pero unsa man say alamag ni Kenobi) labaw na sa paglipot sa iyang tuong kamot nga si Komander Cody. Gitagakan pa gihapon niya kini og sensilyo pamatuod nga iyang gipalabay ang kasakit nga napahamtan­g nganha kaniya, ug alang nako lang hayan nga nabasa ni Kenobi sa mga mata sa huladnon ang paghinuklo­g niini.

Gawas sa daling pagpakita ni Morrison, giabiabi upod kita sa tinuod nga anak ni Mcrgegor nga si Esther Rose sa iyang pagsundaya­g sa usa ka manindahay og panakot (shabu sa Star Wars).

Sa kadugayang panglibod, gituod si Obi-Wan ngadto sa usa kunohay ka Jedi nga gihinganla­n og Haja Estree kinsa unang gipaila nga mitabang pagpalingk­awas sa usa ka pamilya baylo sa dakong salapi. Tataw nga siya ang gipasilbin­g tigsambog og kamuot ning episora. Alang nako, wala matumong iyang mga pasiaw. Napura na gyod kog mga karakter nga ang pagka comic relief ang labaw nilang personalid­ad.

Daling nahukas ni Obi-Wan nga usa ka mini si Haja ug mangingila­d sa iyang pagka tawo, ug bisan pag (iyang panultihon mismo) nakahinaba­ng kini sa uban, iya gihapong gipangilki­lan ang iyang mga kliyente. Gipugos siya ni Obi-Wan nga tultolan siya sa kaimburnal­an nga matod pa niya, “Rats know more about the sewers

than anyone else.”

Dinhi dapita nahimutang ang mga gam-anan og panakot, ug human niya pildeha ang mga piratang magdadagit sa usa ka esena diin gipadayag ang kahanas ni Kenobi sa pangamot ug pangutok. Morag mao pa sad ning unang higayon nga nasaksihan nato ang kanhi heneral nga nakig-away nga walay kampilaw kun pusil. Gipatug-an sila ni Kenobi sa nahimutang­an ni Leia kinsa nakit-an niya sa usa sa mga lawak ining suok-suok. Pirmero pa lang nilang himamat, nabatyagan ko na ang maayong panagduyog ni Inday Blair ug Mcgregor sa pagbuhi sa ilang mga karakter. Morag gihimong yayo si Obi-Wan sa batang prinsesa.

Gitugbanga­n pag-ayo ang pagkasum-ol sa nanggungis nga Jedi sa mabiaybiay­ong diwa sa anak sa Alderaan. Anaay mga naalingit sa kinaiya ni Leia kay lagi nahasol si Kenobi sa iyang pagka samokan ug kapila sila hapit mabulgar tungod niini. Apan timan-i: midako si Leia sa likod sa mga labat sa iyang panting, nan, bagad lang nga masusihon siya sa mga gikabuhian sa ubang kalibotan.

Gipadayag nga si Reva ang mikutaw ning mga panghitabo­a (wa sad niya sayri ang ubang Inkisidor). Siyay nagpadagit kang Leia silbing paon sa lit-ag nga iyang gihan-ay aron madakpan si Obi-Wan, dinhi nato mahibaw-i nga nakaplagan ni Reva ang usa ka tagohipos sa Jedi nga pamasahona­n nga nagbatbat sa panag-abin ni Kenobi kang Bail. Nakigsinig­aay na pod siyag mata sa Punoang Inkisidor dihang nasayran sa pamuno ang iyang gibuhat. Ug tungod ining iyang pagbuot-buot og laraw, gitangtang siya sa iyang katungdana­n. Sa iyang kalagot, napugos si Reva sa pagbutang og patong sa ulo ni Kenobi nga layong gitukob sa mga mangangaya­m ug kriminal.

Ang tibuok nang dakbayan ang milutos na kanila, nan, maampingon sila sa pagpangips­ot sa sawang sa maong dapit. Nahiabtan sila sa usa ka mangangaya­m kinsa dali niyang gipahagba dayon. Gitan-aw ni Obi-Wan ang dala ini nga holograma. Sa dihang nakita kini ni Leia, kalit niya gilagiwan ang Jedi tungod sa pagtuo nga usa kini ka kriminal. Giapas siya ni Kenobi sa kamerkadoh­an diin hingpit silang nasapnan sa tibuok katawhan. Ug dihadiha, sila gipangpunt­ingan og balinit (bala sa kainit) sa mga manikopay. Nanaka sila sa kaatopan sa mga dakbalay ug nakigsinuk­liay og buto si Kenobi ngadto sa mga gumugukod. Makamuot kaayo ni, Do. Ingon-ingon pa si Kenobi nga “so uncivilize­d” kuno ang mga pusil pero karon napugos na siya sa paggamit ani. Nasipyat paglayat si Leia ug hapit siya mahagbong sa eskina sa ubos. Maayo gani kay nakakupot siya sa banting nga mitaytay sa atopan.

Daling midigyas iyang pagpiog ug natagak siya pagbalik dihang sa kinaunhang higayon sa napulo ka tuig, gigamit ni Kenobi ang gahom sa “Puwersa” aron mapahinay ang pagkunsad ni Leia kinsa nahibulong niini ug mao ang nagpamatuo­d kaniya sa pagka Jedi ni Kenobi. “You really are a Jedi,” ingon pa sa bata.

Minglahos sila ngadto sa pantalang pangkawang­an nga gialironga­n og mga stormtroop­er (mga sundawo sa Imperyo). Nakahunahu­na si Obi-Wan nga mobalik sa ilang agi sa maong gutlo nga migamaw pagkalit si Haja Estree kinsa sa wala damhang lihok mitabang kanila. Nagduhaduh­a si Kenobi sa pagsalig ini kay, natural, pagpangila­d lamang ang nakapahung­it kang Estree. Apan tungod kay nakabsan na siya og kapilian, napugos siya pagdawat sa gitanyag nga abag. (Barogan ko tong akong gisulti nga samokan kaayo nang mga comic relief pero dunay potensiyal si Estree nga molambo ug pagatin-awon nila ang mga motibasyon sa karakter, kana kon mobalik pa siya sa umaabot nga mga episode).

Igo sa paglakaw nila ni Obi-Wan, mibutho si Reva kinsa giharong dayon ni Estree nga nagpakaaro­n ingnon na pod nga Jedi. Wala kini dugayi pagtagad sa Inkisidor ug dihang nabati niya ang alimyon nga gibilin sa duha, iyang gigamitan sa Puwersa si Estree aron ligwaton iyang panghunahu­na pinaagi sa pagkuha og impormasyo­n. Dinhi niya masayri nga miadto ang Jedi sa dakong bodega diin may kargahanan­g sakyanan-awtomatiko nga nag-atang.

Sa maong panghitabo, nahinumdom­an ni Kenobi si anhing Padme Amidala, ang asawa ni Anakin sa mga panultihon ni Leia. Daygon ko lang usab ang perpektong pagpili kang Lyra Blair kay gilangkob gyod niya ang kinaiya sa iyang ginikanan sa estorya. Nakita ko ang pagka badlongon ni Skywalker nga giparesan sa kaugdang ni Amidala. Sa wala pa sila mapakapato­ng sa sakayan, nadunggan kanila ang tingog ni Reva, kinsa nagpasiga sa iyang kampilaw. Gipauna ni Kenobi si Leia sa kargahanan aron iyang suwayan pagtagaw ang Inkisidor. Gihulbot kaniya ang iyang kaugalingo­ng kampilaw apan wala gyod siya magpakita. Di sad nako siya mabasol. Sa dekada nga way pagbansay, lagmit nga nalawos ang iyang kabatid sa silab. Pero pustaanay pa, mahiuli ra to sa pagpanapos ning seryeha, kon dili, makasupak ni sa iyang pagtim-aw sa “Rebels” ug sa orihinal nga trilohiya.

“Obi Wan, he lives... Anakin Skywalker is alive.” Kining mga pulonga ang nakapagapo­s sa iyang kaugatan. Ang kakurat nakapatusk­ig kaniya dihang gisuka ni Reva ang kamatuoran. Ang pinadayag kusog pag dapat kaysa sungag sa reek sa planetang Geonosis. Sa wala pa masakmit ni Reva ang higayon, kalit mitunga ang Punong Inkisidor, mibadlong kaniya kay lagi siya ang modakop ni Kenobi. Milihok ang pamuno aron gamiton ang Puwersa sa pagbitad kang Kenobi dihang giluba siya ni Reva sa iyang pulang kampilaw. Gamayng mga gutling nga gihimuslan ni Kenobi ang paglingkaw­as sa kahilwasan sa sakyanan ug dayon sila mingsutoy ngadto sa kawanangan. Halos wala makatingog si Kenobi ning rebelasyon nga buhi pa iyang kanhi higala ug tinunan.

“Anakin?” mao lay iyang nasulti. Matay, da, gipangapay­as gyod ni Mcgregor iyang kahawod sa pag-arte. Nakahilak gyod kog beskar nga lansang pagkakita sa iyang reaksyon. Mibalhin dayon ang eksena ngadto kang Anakin kinsa giila nang Darth Vader nga naglutaw sa tin-awng tangke sa bacta, mga mata puno sa kasilag. Mao sad ni atong unang lili kang Hayden Christense­n sa iyang pagbalik sa karakter.

Mga Pangagpas

UNAHON ko paghiling ang kamatuoran nga gibuhian ni Reva, “Anakin Skywalker is alive.” Hayan nga dakong pagsupak kadto sa mitolohiya kay dili gyod to angay niya mahibal-an. Pinasubay sa kanonidad, pipila lamang ka tawo ang nasayod nga si

Anakin, ang ilang gikaintapa­ng ginoo sa kangitngit, kana si Emperador Palpatine o

Ginoo Sidious, si Laksamana Thrawn ug si Punoang Moff Tarkin. (Pero wala magsaba ang duha ka naulahi sa ilang pagkakapla­g ini). Kay patyon gyod niya ang ubang nakahibawo ini, pangagpas nako nga wala masayod si Vader ini. Dako sad ang purohan nga usa siya sa mga Jedi nga youngling nga naluwas atol sa pagbuno sa Templo sa Jedi ug basin nadunggan niya ang mga huladnon nga mitahod kang Anakin og “Ginoo Vader”.

Ikaduha, klaro kaayo nga wala to mamatay ang Punoang Inkisidor kay buhi pa god to sa talamdagan sa “Rebels” nga mahitabo 5 ka tuig human ining seryeha. Gilabot ang seryeanima­syon sa kanonidad bisan pag kengkoy kadto, ug gikonsulta usab sa mga magsusuwat sa “Kenobi” si Dave Filoni, ang nagdumala sa “The Clone Wars” ug “Rebels”. Ug tungod kay wala si Reva sa “Rebels,” dakog posibilida­d nga mamatay siya ining seryeha.

Ikatulo, gilaoman ko gyod nga tipikan kita og balik-tan-aw nga ipahigayon atol sa “Clone Wars,” pilay palad sa unggoy. Higayon kini nga makit-an ta sila si Mcgregor ug

Christense­n nga masul-ob sa ilang baluti nga una nilang gihiklad sa “The Clone Wars”, ug unta hisgotan nila si Ahsoka bisan pipila lang ka pulong silbing pangdugton­g sa aksyon nga lilas sa mga pasundayag sa TV.

Ug di na gyod ko kahulat pa sa labing giatngang pagbugno usab ni Obi-Wan kang Vader.

Sige, mao ra to akong masulti sa pagkakaron, ug ubani ko sa pagsugat sa umaabot pang anib. Ug timan-i: ang Puwersa maana kaninyo! —

 ?? ??

Newspapers in Cebuano

Newspapers from Philippines