Ang Langgam nga Mibatog sa Dalag nga Dahon
Pagsalop sa Adlaw,
Naingon siyag abohong kinumo Sa masuso nga misakdop sa pal-ak. Gikahibulngan ko nganong
Ang dalag nga dahon iyang gipili Sa kadaghang lunhaw
Nga puyde pa niyang kahulpan.
Wala uroy siya maanugni sa pahulay Kon ugaling mahigmata siya Sa tungang gabii.
Apan himutang ang iyang pagpiyong Human sa pamagdoy ug pangabudlay, Nahinanok siyang daw bata. Nahinanok— ug kon haing langit Iyang gisuhid sa mga pako
Nga mao day makakab-ot,
Wala na ko masayod;
Nagpabiling malig-on ang pal-ak Sa lagmit nga pagkapulak.
Gilukdo niya ang kalibotan sa kusi Sa ulahi niyang mga takna.
Kahilom day saksi
Sa hamili nga paghalad...
Mosubang na unya ang Adlaw, Molupad na kini nga langgam ug Mahulog na unya ang dahon.