Usa ka Panahon sa Kinabuhi ni Deuteronomeo Lazarus
To everything there is a season… --Ecclesiastes 3:1 (Anib 6)
NAGDALING miabot ang duha ka six-by-six sa balay ni Senyora Pasya. Nanganaog ang mga sundalo ug tapos mosusi makadiyot sa palibot, mipuwesto sila gawas sa koral nga puthaw nga naglibot sa harianong balay: ang mga armas cocked and ready. Ang ilang tanang mga lihok yano, dali ug precise.
Tulo ka sundalo ang mingduol sa duha ka guwardiya ug ang duha ilang gidis-armahan dayon. Nagtan-aw sa mga armas sa gubat sa mga sundalo, ang duha ka security guard mitahan sa ilang paltik ug tayaon nga mga armas. Giingnan hinuon sila ni Tenyente Abelardo, ang platoon leader sa mga sundalo, nga maayong dili na lang sila maglangas aron way mahitabo kanila.
Ang .30 kalibre nga machine-gun gimontar sa unipormadong mga sundalo atbang sa dakong dalan nga nag-ubay sa dakong balay. Kini nagtangag ug binakos nga mga bala nga hilabihang taasa.
Unya miabot ang mga polis…
Gisugat ni Lt. Abelardo ang hepe sa kapolisan nga nagkaang-kaang intawon nga naglakaw tungod sa kadako sa tiyan. Laing unipormadong mga sundalo ang ming-secure dayon sa duha ka jeep nga gisakyan sa mga polis.
‘Unsang hitaboa man ni, Lieutenant… Nganong naingon man ni ini…’ pakisayod sa hepe, dayong saphig sa singot sa iyang agtang. Nangimbig ang iyang kaunoran nga nagtan-aw sa machine-pistol nga Uzi nga gisablay sa tenyente sa iyang abagahan. May bayoneta usab nga nagbitay sa hawakan sa tenyente.
‘May buhaton lang mi dinhi kadiyot, Sir. Kini man god si Senyora Bonifacia Quijano-Tavera… Kangil-ad bayag batasan…’ Ug milingo-lingo ang tenyente. ‘Kaila mo siya, Sir, di ba?’
‘Aw, oo… Kaila siya sa tanang mga tawo dinhi…’ Miyango-yango pag-usab ang tenyente.
‘Unsaon man diay ninyo ang senyora, Sir?’ sukna sa hepe nga sige gihapong gipaningot bisan bugnaw ang huyuhoy kay sayo pa man.
Miginhawag dako ang tenyente. ‘Amo lang siyang hinginlan sa Mindanao, Sir… Pastilan, kasamok nga babaye… dili siya maayong pasanayon… Dili siya maayong papuy-on sa Mindanao. Mao nga amo na lang siyang hinginlan.’
‘Un-unsa to, Sir?’ suna sa hepe nga gikuyawan. ‘Unsa to?’