Ars Powetika: Bohemyong Rapsodiya
(alang sa tanang membro sa Bathalad ug Sunday Club)
Ang aghop nga mga aninong nagbuntaog sa kadulom sulod sa kasingkasing sa patayng planeta, nagturayog nga mga edipisyo sa mga pulong nga nanggamot sulod sa tagoangkan sa buhilaman nga gihuwat sa tanang buhi dinhi sa yuta aron hubaron isip usa ka pobreng balak. Ang usa ka halawom nga tingog nga naglitok sa leyenda sa kamugnaan, madunggan nga giasoy sa dugdog aron molanog sulod sa talibundak nga damgo taliwala sa gabunok nga uwan nga bino. Ang liriko sa awit nga madunggan gikan sa awaaw nga lugot nga wailhi, gihinubay sa hinapos nga mga berso sa epiko sa usa ka magbabalak nga natakdan sa mino nga kinutlo gikan sa lilo sa mapuwa nga rosas. Ang mga balak nga gipangsuwat sa gikunis-kunis nga papel mao ang kataposang testamento sa mga tonto kabahin kon kinsa ang naghiwa sa ilang mga kasingkasing. Ania na kita karon sa panahon diin nihit ang atong kalipay ug nagmasulub-on ang tanang nanurok nga mga buwak. Kadtong dakong ulbo sa itom nga kalayo nga midilaab sulod sa damgo nga naghablon sa kainiton sa gugma sa mga Bathala alang sa ilang mga musa, nagsugyot sa tanang gitipigang sekreto nga nahipatik sa badlis sa palad sa wala mahimugsong masuso. Babaye si Shakespeare ug dili tinuod nga buta si Homer. Bayot si Cavafy ug tinuod nga nabasahan na ni Mallarme ang tanang libro sa kalibotan lakip na kadtong wala mahitagik, segun sa iyang kaugalingong pagarpar. Ug ang tanang tigmong way tubag sulod sa tagak nga bituon milugdang isip kuyamoy ug ikog sa gikalisangan nga demonyo ug ang iyang gipangsuwat nga mga balak giisip nga sagradong pagampo nga gigamit aron matugkan og mga pako ang mga anghel. Peligroso ang literatura panahon sa mga ungo. Ug walay laing makasabot niining balaka gawas sa usa ka buang.