Mga Abo Sa Gugma
LAWOM na ang gabii. Si Ellen wala pa mahikatulog sa gihigdaan niyang kama sa CCMC. Naadmit siya sa ospital ning miaging tulo ka adlaw tungod sa iyang sakit sa kasingkasing. Setentay isingko na iyang edad ug naghigda sa kama nga naghandom. Nahinumdom siya kang Treb, ang unang lalaki nga iyang gihigugma.
“Mahal, bisan tua na ko sa Amerika, magpadayon gihapon ang atong gugma. Magsinuwatay ta aron mahibawo ta sa dagan sa atong kinabuhi hangtod mahibalik ko dinhi sa ato human sa tulo ka tuig nakong pagtrabaho didto sa usa ka kompaniya isip electrical engineer. Inig-uli nako dinhi, magpakasal ta. Makahuwat kaha ka, Len?” Nahinumdom si Ellen sa mga pulong ni Treb niadtong kataposan nilang panagkita sulod sa Fort San Pedro nga nahimutang sa Plaza Independencia, Dakbayan sa Sugbo. Diha sila sa sulod sa usa ka kapehan sa kota.
“Huwaton ko ikaw, Treb. Isaad ko nimo nga way makapuli nimo sa akong kinabuhi!” tubag ni Ellen nga mitutok kang Treb. Nagkinuptanay sila sa ilang mga kamot. Ang dinagaang mikuyanap sa tibuok nilang galamhan.
Sama sa ilang gikasabotan, nagsinuwatay sila. Hapit kada semana may madawat nga sulat si Ellen gikan kang Treb nga naghisgot sa tiunay niyang gugma kang Ellen. Mobawos pod si Ellen nga ang iyang gugma ug kasingkasing alang da gayod kang Treb.
Apan sa pagpanglabay sa daghang adlaw, semana, bulan ug usa ka tuig, kalit lang nga wala nay nadawat nga sulat si Ellen gikan kang Treb. Nagsuwat siya ug nangutana unsay nahitabo. Apan wala mobawos si Treb. Nagmagul-anon si Ellen.
Usa ka hapon niana, didto sa ospital si Ellen aron pagbisita kang Marlyn, iyang kauban nga accountant sa kompaniya nga iyang gitrabahoan, nga gioperahan sa apendiks. Nagkita sila si Katrina, ig-agaw ni Treb nga nars. Nasayran ni Ellen gikan kang Katrina nga naminyo na si Treb sa usa ka ka enhinyerang Amerkana nianang miaging tuig. Giluom lang niya sulod sa iyang dughan ang kaguol nga gibati niya niadtong higayona. Sa pagpanglabay sa mga adlaw, nakaton ra siya sa pagnaya-naya sa iyang kaugalingon aron mahikalimtan niya sa Treb.
Usa ka buntag samtang nag-post sa general ledger sa mga total sa mga account gikan sa cash disbursement journal, mitunog ang iyang selpon. Mitawag si Daniela, iyang klasmeyt sa hayiskol.
“Len, nagmiting ang mga officer sa atong batch sa Sugbo National School. Mag-reyunyon ta sa atong batch ten years ago. Mo-attend ta, ha!” matod ni Daniela nga mikatawa.
“Nus-a man na, Yads?” ni Ellen nga nahimuot sa balita.
“Sunod buwan, Yads. Mo-attend ra ba si Kevin nga inlab kaayo nimo kaniadto pero wa nimo sugta,” ni Daniela. “Ulitawo pa siya ug basig padayonon niya ang tuyo niya kanimo. Okey ra man kay daga pa man pod ka, di ba?”
“Ay, wa na siyay paglaom, Yads. May uyab na man ko, tua sa Amerika. Inig-uli niya dinhi sa ato, magpakasal mi.” Gihimo ni Ellen nga katarongan ang saad ni Treb. “Motambong ko sa atong reyunyon. Gimingaw sab ko sa atong mga klasmeyt.”
“Kita-kitakits, Yads!” ni Daniela.
Ang ilang reyunyon didto ipahigayon sa Fort San Pedro. Daghan ang nanambong uban sa mga kapikas sa ilang kinabuhi. Sila Ellen ug Daniela nanglingkod sa usa ka lamesa dili layo sa entrada sa kota. Pagkakita ni Kevin kanila midiretso kinig duol sa lamesa.
“Puyde molingkod dinhi, mga guwaps?” ni Kevin nga nagngisi nga nagtindog.
“Puyde kaayo, guwapo,” ni Daniela nga matistison.
Milingkod si Kevin atbang kang Ellen nga nagpahiyom. “Komosta, Len?”
“Okey ra man. Ikaw, komosta pod?” ni Ellen.
“Okey ra pod, pero sigeg handom nimo,” ni Kevin nga matiawon. “Wa lagi nimo dad-a imong wifey?” ni Ellen.
“Single pa ko, uy, Len,” ni Kevin. “Ikaw, where’s your hubby?” “Naghuwat na siya sa iyang uyab nga mopauli gikan sa Amerika aron sila magpakasal,” si Daniela maoy mitubag kang Kevin.
“Mao ba?” ni Kevin. “But meantime, puyde ko makabisita nimo, Len… isip higala?”
“Of course, our house is open to friends!” ni Ellen nga nagpahiyom. Nagpadayon ang panaghimamatay pag-usab sa batch nilang Ellen. Dihang gipahibalo ang usa ka dance number, misayaw si Ellen nga giparesan ni Kevin. Soft music ang gitokar sa banda.
“Len, padayonon ko ang paghalad sa akong gugma nimo kay wa pa man ka makasal sa imong uyab,” hunghong ni Kevin samtang naggakos kang Ellen. “Kon di gyod ko nimo sugton, magpakatiguwang ulitawo na lang ko. I love you so much then and now!”
Wala motingog si Ellen. Buot gani niyang sultihan si Kevin nga si Treb minyo na sa Amerika. Igo lang niyang gipahiyoman si Kevin. Unya, human sa dance number, gipahibalo ang romantic pair of the night. Ug sila si Ellen ug Kevin ang mingdaog. Masipang pakpak gihatag kanila.
Dihang natapos na ang class reunion, gihatod ni Kevin sila si
Ellen ug Daniela sa ilang mga pinuy-anan sakay sa iyang awto. Una nga nahatod si Daniela. Paghiabot sa ilaha ni Ellen, gipadayon niini si Kevin aron mangape. Gipaila-ila ni Ellen kang Mama Ester niya si Kevin. Nanglingkod sila sa sala samtang naghuwat kang Ester nga misulod sa kosina aron pagkuhag kape.
Samtang sila naghigop, karon ug unya, sa ilang kape, nagpadayon ang estorya nilang Ellen ug Kevin sa ilang kinabuhi. Mitug-an si Ellen nga usa siya ka CPA. Mitug-an pod si Kevin nga usa siya ka chemical engineer nga nag-alagad sa sanga sa San Gabriel Corp., kompaniya nga tighimog beer ug softdrink, dinhi sa Sugbo. Mao kadtoy sinugdanan nga kanunay nang nagbisitahan si Kevin sa ilang Ellen. Kanunay sab silang manuroy basta Sabado ug Domingo, kanus-a wa silay trabaho. Tungod niini, nahikalimtan ni Ellen si Treb. Gibati na niya nga gawasnon diay siya nga mahigugma pag-usab.
“Nus-a diay, mouli si Treb aron magpakasal mo?” matod ni Kevin usa ka gabii dihang nanihapon sila sulod sa Seawall Mall.
Hapit masud-ipi si Ellen sa giinom niyang juice kay wa man siya magdahom sa pangutana ni Kevin. Nakahukom siya nga higayon na nga sultihan niya si Kevin sa matuod.
“Wa mi magkadayon, Kev. Naminyo siya og Amerikana sa miaging tuig didto sa Amerika,” tug-an ni Ellen.
“Kon mao na, makadawat ka na sa akong gugma, Len?”
“Yes, Kev. I’m free to love again!” ni Ellen nga mitutok kang Kevin. Human sa ilang panihapon nanulod sila sa sinehan. Ug didto natagamtaman niya ang unang halok ni Kevin: malumo, mapinanggaon. Lahi sa hinagkan ni Treb nga mapugsanon, maakoakohon.
Sa wala pa sila makasal si Ellen ug Kevin, may gibuhat si Ellen usa ka buntag niana. Gikuha niya ang usa ka karton sa sapatos gikan sa iyang gitagoan niini. Gidala sa likod sa ilang balay ug gisunog ang mga sobre nga sulod niini. Human, gipupho niya ang mga abo ug gisulod sa usa ka gamayng urna nga pinalit niya nianang miaging adlaw.
Malipayon si Ellen sa panagtiayon nilang Kevin. Mapinanggaon ug manggihunahunaon kaniya. Gitugahan silag duha ka anak-babaye nga karon pulos na may kaugalingong pamilya. Siya na lang ug si Kevin ang nahibilin sa ilang balay.
SAMTANG padayon nga naghandom kang Treb nga maoy iyang first love, kalit misugmat ang iyang sakit. Mihuot ang iyang dughan ug lugos siya makaginhawa.
“Kevin!” nakatawag siya sa iyang bana nga diha maghigda sa sopa sampig sa bungbong sa lawak kay maoy nag-atong kaniya sa ospital. Mitimbakuwas si Kevin ug miduol kang Ellen.
“Kev, mo-morag d-di n-na ko magdu-dugay…” putol-putol nga namulong si Ellen. “Du-duna k-koy ihangyo ni-nimo. T-Tua sa akong to-tokador ang u-usa ka u-urna. Palihog ibu-butang ni un-ya sa a-akonng lu-lungon…!” Ug kalit miutong si Ellen ug nabugtoan sa iyang gininhawa.
“Ellen…!” mao day nalibkas sa mga ngabil ni Kevin samtang mihuot pod ang iyang dughan. Mihalang ang iyang mga mata ug unya may mga lusok sa luha nga nabiaw didto.
Gituman ni Kevin ang tugon ni Ellen kaniya. Sa wala pa itunod sa lubnganan ang lungon ni Ellen, iyang gisulod ang urna sa lungon. Wala siyay hanaw nga ang sulod sa urna mga abo sa mga sulat sa gugma ni Treb ngadto kang Ellen.
(KATAPOSAN)