LOCKDOWN NA NAMAN!
Hindi na nagpatumpik-tumpik pa ang gobyerno dahil sa hindi maawat na pagtaas ng kaso ng coronavirus disease (COVID-19) sa bansa at inanunsyo na nito ang pagpapatupad ng modified enhanced community quarantine (MECQ) sa Metro Manila at iba pang lugar.
Inaprubahan ni Pangulong Rodrigo Duterte ang pagsasailalim sa Metro Manila, Bulacan, Cavite, Laguna at Rizal sa MECQ simula ngayong araw hanggang Agosto 18 batay na rin sa pahayag ni Presidential spokesman Harry Roque.
Ang pagpapatupad ng MECQ sa mga nasabing lugar ay kasunod ng panawagan ng mga grupo ng health care workers na muling isailalim sa ECQ ang Metro Manila para makahinga umano ang mga ospital dahil sa dami ng mga pasyente ng COVID-19.
“I have heard of different groups from the medical community for a two-week ECQ in Mega Manila. I fully understand why your health workers would like to ask for such a time out,” sabi ng Pangulo sa kanyang taped speech noong Linggo.
Sinabi naman ni Roque sa isang panayam na bawal na naman ang operasyon ng mga pampublikong transportasyon tulad ng mga bus, tren, jeepney, taxi, ride-hailing service, at tricycle.
“Balik po tayo sa shuttle muna at saka motorsiklo, sa bisikleta, mga pribadong sasakyan,” sabi ni Roque.
Samantala, papayagan naman ang public shuttles ng Department of Transportation (DoTr) para sa frontline workers at ibang nagtatrabaho sa mga industriyang pinapayagan mag-operate sa ilalim ng MECQ.
Dagdag pa ni Roque, kabilang naman sa mga mga maaaring manatiling bukas ang mga supermarket, botika, bangko, at business process outsourcing firms.
Sa kaugnay na balita, inihayag naman ni Joint Task Force COVID Shield Commander Lt. Gen. Guillermo Eleazar na maghihigpit ang mga awtoridad sa mga checkpoint sa mga lugar na nasa ilalim ng MECQ.