MAGANDANG KICK-OFF PARA KAY OBIENA
Eksplosibong sinimulan ni 30th Southeast Asian Games gold medalist EJ Obiena ang kanyang kampanya para sa Olympics nang makopo niya ang medalyang pilak sa men’s pole vault event sa ginanap na 13th Trivento International Meeting sa Trieste, Italy.
Si Obiena – na siyang kaunaunahang qualifier s a Tokyo Olympics, ay umiktad sa 5.45 meters na siya ring nagpanalo sa kanya sa 30th SEAG noong Disyembre.
Samantala, si Rio de Janeiro Olympics champion Thiago Braz de Silva ng Brazil ang nakakopo ng ginto sa kanyang 5.50 meter-performance habang si Italian star Max Mandusic ang sumungkit ng tanso para sa kanyang 5.35 meterperformance.
Ito rin ang unang sabak ni Obiena sa torneo sa Italya matapos ang nationwide lockdown na ipinatupad sa bansa dahil sa coronavirus outbreak. Ikinatuwa naman ni Philippine Athletic Track and Field Association president Philip Ella Juico ang performance ni Obiena, na nagkaroon ng back injury noong nakaraang buwan. “That was his first competition since the pandemic, so it is understandable. I think he was really targeting around 5.50 meters,” sabi ni Juico. “He just came off an injury so that is really a good performance.” Makikipagtunggali naman si Obiena sa prestihiyosong Diamond League sa Agosto 14 at isang virtual tournament sa Agosto 17.