CRIME OF THE YEAR
Tinaguriang “crime of the year” ni resigned Philippine Health Insurance Corporation (PhilHealth) anti-fraud officer Thorrson Montes Keith ang nangyayari umanong katiwalian sa ahensya kung saan isiniwalat niya na nagbulsa umano ng ilang opisyal ng aabot sa P15 bilyon.
Sa pagdinig sa Senado kaugnay sa mga umano’y nangyayaring anomalya sa PhilHealth, ikinuwento ni Keith na inuutusan umano ni PhilHealth president Ricardo Morales ang kanyang mga tauhan upang makipag-negosasyon umano sa isang anti-corruption agency na nag-iimbestiga sa umano’y overpricing ng ahensya sa mga coronavirus disease (COVID-19) test kits.
Ayon pa sa kanya, inutusan umano siya ni Morales na kausapin ang isang opisyal ng Presidential Anti-Corruption Commission (PACC) para “hilutin” umano ang imbestigasyon nito.
“May pagkakataon na inutusan pa ako ni Brig. Gen. Ricardo Morales na puntahan ko si Commissioner Greco Belgica para hilutin ang kaso ng PhilHealth sa overpriced testing kits,” saad ni Keith.
“Inayawan ko po ang kaso at sinabi ko po... na ano na lang po tingin sakin ni Greco Belgica ‘pag papakiusapan ko siya hinggil sa kaso?” dagdag niya. “Namula si Brig. Gen. Morales nung sinabi ko ‘yun.”
Ang imbestigasyon sa Senado ay bunsod sa obserbasyon ng ilang senador na ang package ng PhilHealth para sa COVID test kits at nasa P8,150, mas mataas kumpara sa mga nabibili ng ilang private firms sa halagang P750.
Samantala, pinabulaanan naman ni Morales ang mga paratang at sinabing hindi siya coddler ng mga tiwaling opisyal sa ahensya.
“I deny that I am the coddler of the wrongdoers in PhilHealth and I manifested earlier that if I could have an executive session to be able to explain my side,” saad ni Morales sa Senate hearing.