HALUKAYIN ANG KORAPSYON SA PHILHEALTH

Sa kabila ng nararanasang krisis ng coronavirus disease (COVID-19) pandemic sa bansa, hindi pa rin nawawala ang kaliwa’t kanang alegasyon ng korapsyon na talaga namang nagpapahirap lalo sa nararanasan ng mga mamamayan.

At pinakamaugong ngayon ang alegasyon sa Philippine Health Insurance Corporation (PhilHealth) batay na rin sa whistleblower na si dating PhilHealth anti-fraud legal officer Thorrsson Montes Keith kung saan isiniwalat niya na halos P15 bilyon ang naibulsa umano ng mga opisyal ng ahensya.

Hindi man niya pinangalanan ang mga ito, nakababahala pa rin ang nangyayaring ito dahil kung iisipin niyong mabuti, ang PhilHealth ang siyang umaalalay sa mga kababayan natin sa pagbabayad sa pagpapa-ospital lalo na ngayong inaprubahan na ang Universal Health Care law.

Isiniwalat ni Keith ang mga diumano’y korapsyon sa ahensya na siya namang nagbunsod sa Senado upang imbestigahan ang mga nasabing alegasyon laban sa PhilHealth at sa presidente nitong si Ricardo Morales.

Bagama’t pinabulaan ni Morales ang mga paratang, hindi naman nawala sa obserbasyon ng mga senador na paiba-iba na ang sinasabi ni Morales noong dumalo siya sa Senate hearing kamakailan.

Ang Malacanang naman, sinabing bagama’t naroon pa rin ang “trust and confidence” ni Pangulong Rodrigo Duterte kay Morales, kailangang magkaroon muna ng matibay na ebidensya laban sa PhilHealth chief bago ito mapatalsik sa puwesto.

Pero si Presidential spokesman Harry Roque, sinabing “convincing” umano ang pahayag ni Keith na mayroon talagang sindikato sa loob ng PhilHealth dahil makailang-ulit na rin naman niyang tinuligsa ang ahensya dahil sa katiwalian.

“As someone who is familiar with pattern of fraud perpetrated in the PhilHealth, I would say that’s convincing because I had another source, more or less, that’s how much money being lost annually,” sabi ni Roque.

Sa ganang amin, tama ang tagapagsalita ng Palasyo. Ang PhilHealth ang kaagapay ng mga mamamayan na salat sa salapi upang makapagpagamot ng maayos at kung sasalihan ito ng sindikato at korapsyon, lalo lamang mababaon sa hirap ang mga mamamayan.

Kailangan nang halukayin ng gobyerno ang mga umano’y katiwalian sa PhilHealth dahil nakadadagdag lamang ito sa mga pinoproblema ng bansa lalo pa ngayon na humaharap tayo sa krisis ng COVID-19.

Hindi maaring palampasin ito.