BALIK ISANG METRO!
PHYSICAL DISTANCING SA PUBLIC TRANSPO, NADESISYUNAN
Napagdesisyunan ni Pangulong Duterte na panatilihin ang isang metrong distansya ng mga pasahero sa mga pampublikong transportasyon habang patuloy pa ring nananalasa ang coronavirus disease (COVID-19) sa bansa.
Ayon kay Presidential spokesperson Harry Roque, Biyernes pa lang ay may desisyon na ang Pangulo matapos mapag-aralan ang mga rekomendasyon ng iba’t ibang ahensya ng gobyerno.
Dagdag pa niya, napaaga pa ang pagdedesisyon dahil nauna nang sinabi ni Duterte na sa Lunes niya ilalabas ang desisyon kaugnay sa pinagtatalunang distansya ng mga pasahero sa mga pampublikong transportasyon.
“Matapos pong pag-aralan ni Presidente ang rekomendasyon ng parehong panig na nagsasabi na dapat manatili sa one meter ang physical distancing sa pampublikong transportasyon at ‘yung mga nagsasabi na pupuwede naman itong pababain basta may face shield, mask, walang salita,” sabi ni Roque.
Nagdesisyon na po ang Presidente kahapon. Ang desisyon, mananatili po ang one-meter social distancing sa pampublikong transportasyon,” dagdag niya.
Paalala rin ni Roque, dapat sumunod ang mga pasahero sa inilatag na health at safety measures ng pamahalaan kung sasakay sa mga pampublikong sasakyan.
“In addition to this physical distancing, the commuting public must adhere to health protocols, such as wearing of mask and face shield and no talking and no eating inside the public mode of transport,” saad ni Roque.
Kung matatandaan, ipinatupad ng pamahalaan ang mas pinaluwag na physical distancing sa mga pampublikong sasakyan mula isang metro papunta sa 0.75 metro dahil umano sa daing ng mga tsuper at mga mananakay.
Ayon naman sa pamunuan ng Metro Rail Transit 3, nasa 153 na pasahero lamang ang maaaring makasakay sa bawat tren o 51 pasahero lamang bawat bagon.
Pero idiniin ng MRT3 na patuloy pa rin nilang ipatutupad ang istriktong health at safety protocols sa mga istasyon at sa loob mismo ng tren – kasama na rito ang pagsusuot ng mask, face shields, regular disinfection at ang pagbabawal sa pagsagot sa telepono, pagkain at pakikipag-usap sa loob ng mga tren.