TUPARIN ANG PANGAKO

Mukhang nagkakalabasan na ng baraha ang kanya-kanyang alyaduhan sa House of Representatives.

Malapit na kasing mapatupad ang tinatawag na “term-sharing” na pinasimuno ni incumbent House Speaker Alan Peter Cayetano.

Ang siste, sa Oktubre ay obligado nang magpalit ng liderato ang Kamara, kung saan ang hahalili kay Cayetano ay si Marinduque Representative Lord Allan Velasco. Parte ito ng kasunduan na ginawa bago naupo si Cayetano bilang Speaker sa Kamara.

Pero habang lumalapit ang araw ng pagpapatupad ng term-sharing, lalo namang umuugong ang mga bali-balitang wala umanong balak tuparin ni Cayetano ang napagkasunduang term-sharing.

At heto na nga, may mga lumabas na ulat na nagtatalo-talo na ang mga kaalyado ni Cayetano at Velasco at ang mga alingasngas pa ay halos magsuntukan na at naghahamunan na ng duwelo.

Duwelo? Yung parang sa Wild West na mga pelikula noong araw?

Oo. Ganun nga.

At ang pinag-uugatan umano ng mga ganitong klaseng iringan sa Kamara ay dahil umano sa hindi pantay-pantay na pagtingin sa mga bibigyan ng malalaking budget para sa mga proyekto ng mga kongresista.

May mga nagsasabing mas malalaki ang pondong nakukuha ng mga kaalyado ni Cayetano sa Kamara, habang kakarampot naman ang napupunta sa mga kongresistang piktyuradong kaalyado ni Velaso.

Unang isiniwalat ang mga umano’y hindi pantay na pagtingin ni Negros Oriental 3rd District Representative Arnolfo “Arnie” Teves Jr. sa ginaganap na House hearing para sa budget ng Department of Public Works and Highways (DPWH) sa susunod na taon.

Ayon kay Teves, ang dalawang distrito sa Taguig – na hawak ng mag-asawang Alan at Lani Cayetano – ay nakakuha ng P8 bilyon mula sa budget ng DPWH, habang P11.8 bilyon naman ang mapupunta sa infrastructure funds sa Camarines Sur.

Ang Camarines Sur ay may dalawang legislative districts – ang District 2 ay hawak ni Deputy Speaker Luis Raymund “LRay” Villafuerte na kilalang kaalyado ni Cayetano, habang ang District 1 naman ay hawak ni Cayetano bilang “caretaker congressman” dahil sa pagkamatay ng representate nitong si Marissa Lourdes M. Andaya ngayong taon dahil sa cancer.

Iba na ang pakiramdam sa Kamara. Perapera pa rin pala ang labanan.

Pero sana naman, kung ano ang napagkasunduan, tuparin na lang dapat. Nakakahiya naman kung patuloy pa rin ang pagkapit sa puwesto kahit mayroon nang napag-usapan.

Ang mahirap niyan, baka mamaya sabihin na lang na “Nangako na nga, gusto tutuparin pa?” Patay tayo diyan.