2-0 NA ANG LAKERS!

Pinangunahan ni Anthony Davis ang ratsada ng Los Angeles Lakers upang itumba ang Denver Nuggets, 105-103 sa Game 2 ng kanilang NBA Western Conference finals series.

Umiskor ng 31 puntos si Davis at kumamada ng siyam na rebounds, habang nagdagdag si LeBron James ng 11 rebounds upang manguna sa kanilang serye na may 2-0 na kartada.

Kumana ng pamatay na buzzer-beater na tres si Davis upang maipanalo ang laban matapos umiskor ni Nuggets star Nikola Jokic sa isang drive na may 20.8 segundo pang nalalabi sa laro.

“People talk about I’ve never been in this moment before, pressure, am I ready for it,” sabi ni Davis. “I want to take those shots.”

Handa naman ang Lakers na ibaon pa sa serye ang Nuggets ngayong Martes.

Nagpakita ng umaatikabong opensa ang Lakers sa simula ng laro at humirit ng 18-3 run kung saan umabante ng may 16 na puntos na lamang ang Lakers sa second quarter.

“We put the effort, we put the fight,” sabi naman ni Jokic. “Maybe we lost the game, but I think we played well.”

“Most of the game, we were down, but we came back again, so we’re going to keep our heads up and (go) on to the next one,” dagdag niya. Si Davis naman, pinapurihan ni James. “Special moment for a special player,” saad ni James. “It’s not about making the shot, it’s about having the belief of just taking it, and living with the result.”

“You’re not going to make them all. Tonight was his moment -- Rondo was able to find him and he knocked it down -- big-time play,” dagdag niya.