PLAYING SAFE?
Sa isang kagulat-gulat na pangyayari, nagsuspinde ng sesyon ang House of Representatives nitong Lunes – na halos wala pang beinte minutos nagsisimula – dahil umano sa mga alingasngas na tatanggalin sa puwesto si House Speaker Alan Peter Cayetano at ang iba pang lider sa Kamara.
Kung matatandaan, kumalat ang mga bali-balitang marami na umanong “disgruntled” na kongresista ngayon dahil sa umano’y hindi pantay na pagtingin sa mga representate sa Kamara pagdating sa pagbibigay ng budget para sa kanilang mga proyekto.
Hindi nga ba may naghamunan na umano ng suntukan at “duwelo” sa mga kongresistang kaalyado ni Cayetano at ni Marinduque Representative Lord Allan Velasco – na siyang napipintong pumalit sa Speaker dahil sa termsharing?
At dahil mukhang hindi tutuparin ni Cayetano ang napag-usapang termsharing, marami na ang umaalma sa Kamara.
Kasama na dito si Davao Representative at Deputy Speaker Paolo Duterte sa mga nadidismaya na sa mga nangyayari at pagkatapos noon ay kumalat na ang balita na hinihimok niya ang Mindanao bloc upang ideklarang bakante ang posisyon ng House Speaker at iba pang liderato sa House.
Tungkol umano sa isyu ng budgetary allocations para sa mga legislative districts ng ilang kongresista ang ikinadidismaya ni Duterte at inamin nitong nagpadala siya ng mensahe sa isang kongresista ukol dito.
Pero siyempre, may pakpak ang balita, at nakaikot na agad ang nasabing mensahe sa mga kongresista.
At dahil umano sa pangyayari kaya idineklara ni Deputy Speaker Raneo Abu na suspendido ang sesyon ng Kamara hanggang alas tres ng Martes.
Para naman yatang itinataon na mayroon nang mga panawagan na tuparin na ni Cayetano ang kanyang pangako sa term-sharing dahil ayaw umano niyang bitawan ang Speakership kaya nagkakaroon ng ganitong insidente.
Lalo tuloy napaghahalataan na may mga mas malalim pang rason ang mga pangyayari sa Kamara dahil sa mga ganitong aksyon.
Pero ang tanong, playing safe nga ba sina Cayetano at mga kaalyado nito kaya nagsuspinde ng sesyon?
Abangan ang susunod na kabanata.