HEALTH WORKERS’ DEPLOYMENT BAN, HINDI MADALI

Sa kabila ng pagpayag ni Pangulong Rodrigo Duterte na alisin ang deployment ban para sa mga health workers na nakapagproseso na ng kanilang mga dokumento noong Agosto 31, sinabi ng Malakanyang na magiging mahirap para sa gobyerno na tuluyan nang alisin ang deployment ban.

Ayon kay Presidential spokesperson harry Roque, mahihirapan ang gobyerno na payagan ang lahat ng health workers na maghanap ng trabaho sa ibang bansa dahil hindi pa rin nasasawata ang coronavirus disease (COVID-19).

Dagdag niya, nasa state of calamity pa rin ang Pilipinas na kamakailan lang ay pinalawig ng Pangulo hanggang Setyembre ng 2021.

“Malinaw po ang Presidente, habang mayroon po tayong state of calamity dahil sa COVID-19, mahihirapan pong i-lift iyang ban na iyan,” sabi ni Roque.

Kung matatandaan, sinuspinde ng Philippine Overseas Employment Administration (POEA) ang deployment ng mga doktor, nurses at healthcare workers papuntang abroad.

“Habang ang mga nurses po ay papunta sa mga bansa na mas maraming kaso kaysa sa Pilipinas eh pangangalagaan pa rin po ng Presidente ang kalusugan ng ating mga frontliners,” dagdag pa ni Roque.