OMBUDSMAN, WALA SA HULOG
Makapangyarihan ang Office of the Ombudsman dahil may motu propio power ito na imbestigahan ang sinuman sa pamahalaan kahit walang complainant. Lahat ng may kinalaman sa performance ng mga nasa pamahalaan, pati na ang government projects at contracts ay p’wede sawsawan ng Ombudsman.
Ang mandato ng Ombudsman ay napakahalaga bilang taga-usig ng mga kurap at magnanakaw sa pamahalaan kung saan ang tunggalian ay nangyayari sa isang espesyal na korte, ang Sandiganbayan.
Kahapon ay marami ang nagulat nang aminin ni Ombudsman Samuel Martires sa budget hearing ng House of Representatives na ipinatigil niya ang pagsasagawa ng lifestyle check sa mga opisyal at kawani ng pamahalaan.
Aniya, hindi komo bagsak ang isang opisyal sa lifestyle check ay kurap na ito at dapat ihabla sa Sandiganbayan. Inamin din niya na inutos niya na i-restrict ng public access sa statements of assets, liabilities and net worth (SALN) ng government officials.
“Nung umupo ako, pinatigil ko muna ang lifestyle check kasi matagal na ako may duda sa probisyon ng batas tungkol sa lifestyle check. Gusto ko i-propose sa Congress ng amendments sa (Republic Act) 6713 kasi yung provisions there, malabo, walang hulog sa logic,” ani Martires.
“Bakit ko pinatigil? What is living beyond your means? Iyong kumikita ng P50,000 a month, lives in a small house, nakaipon, bumili ng BMW na promo, zero interest, kayang-kaya niya hulugan. Is he living beyond his means? I don’t think so. What he has are distorted values and distorted priorities,” aniya.
Sa ilalim ng RA 6713 o ang Code of Conduct and Ethical Standards for Public Officials, inaatasan ang mga opisyal at kawani ng gobyerno at kani-kanilang mga pamilya na mamuhay ng simple at payak na angkop sa kanilang posisyon at kita. Gayundin ay binabawalan sila na ipangalandakan ang anumang yaman.
“Anong pakialam natin? Bakit natin siya huhusgahan na bumili ng BMW kahit ang bahay niya walang paradahan? Anong pakialam natin sa buhay ng may buhay kung hindi naman siya nagnanakaw?” wika ni Martires.
Sa tingin natin, mas lalong wala sa hulog ang lohika ni Ombudsman Martires.
Una, hindi man siya sang-ayon sa probisyon ng naturang batas ay duty-bound pa rin siya na ipatupad ito hangga’t hindi naaamyendahan.
Ikalawa, nakalimutan yata ni Ombudsman Martires ang assumption na kung ang yaman ng isang opisyal ay hindi angkop sa kita niya at ng kanyang kapamilya, ina-assume ng batas na ito ay ill-gotten o nakaw.
Ikatlo, hindi naman sa lifestyle check lang dapat magtapos ang imbestigasyon ng Ombudsman bagkus ay panimulang hakbang lang ito sa pangangalap ng ebidensya laban sa pinagsususpetsahang nakikinabang sa kanilang poder sa gobyerno.
Ikaapat, kung hindi ba nagsagawa ng lifestyle check ang Ombudsman laban sa namayapa nang si Chief Justice Renato Corona ay lalabas ang kanyang mga tagong yaman? Hindi ba’t napakahalaga ng papel na ginampanan ng kanyang SALN?
Ikalima, bakit naman may assumption na agad si Ombudsman Martires na hind matic na nagnanakaw ang isang bagsak sa lifestyle check. Eh paano n’yo malalaman kung nagnanakaw o hindi kung hindi ninyo iimbestigahan?
So, bakit kailangan ibasura ang lifestyle check at mas lalong bakit kailangang itago ang SALN ng mga opisyal ng pamahalaan? Kaya pala naman wala tayong naririnig na nakakasuhan itong Ombudsman eh. Parang may tawag diyan: Simpleng katamaran.