MAJA, NAKA-1M NA SA YOUTUBE
Isang masayang balita ang pinakawalan ng aktres na si Maja Salvador dahil umabot na sa one million ang kanyang subscribers sa YouTube.
At huwag ka day, nagcelebrate si Maja at nagpastreet food party pa bilang pasasalamat ng bongga sa kanyang mga tagahanga at tagasunod.
Sa kanyang Instragram, ipinost ni Maja ang kanyang mensahe para sa kanyang maituturing na malaking achievement sa larangan ng vlogging.
“Salamat sa pagsama sa masayang journey na ito. Marami pa tayong pagsasamahan mga beshies,” sabi ng caption sa larawan ni Maja na kitang-kita ang mga street food gaya ng fish ball at iba pa.
Kasama rin ang kanyang pamilya at boyfriend na si Rambo Nuñez sa kanyang selebrasyon at ibinahagi ito ni Maja sa pamamagitan ng isang video aa YouTube channel niya.
“Isang milyong pasasalamat mga beshies. One million na tayo, one million subscribers. Maraming-maraming salamat po sa inyong lahat. Isang milyong pasasalamat dahil sa sinamahan niyo ako sa journey na ito,” sabi ni Maja.
“Noong naisipan ko na gumawa ng YouTube channel mga beshies, ginawa ko ‘yon dahil mas gusto ko na makilala niyo po ba ako ng mas personal pa, kalalimlaliman na pagkakakilala, ‘yung ganu’n. Yung Maja na hindi niyo napapanood sa TV, hindi sumasayaw sa stage o sa mga pelikula. ‘Yung ako mismo, ‘yung walang ibang character na ginagawa,” dagdag niya.
“Kaya maraming-maraming salamat sa pagsama niyo sa akin sa journey na ito. Dahil diyan mga beshies ay umabot na tayo ng 1 million subscribers.”
Nagsimulang mag-vlog si Maja noong June, 2019 sa kanyang YouTube channel na “Meet Maja.”
“Kaya nagkaroon tayo ng YouTube channel dahil lahat ng gusto kong puntahan, lahat ng paborito kong kainan, mga yugyugan, mga kasiyahan, kahit anong moments pa ‘yan, ‘yan ang mapapanood niyo,” sabi niya.