CAYETANO, INALOK NG PUWESTO

PEACE OFFERING NI SPEAKER VELASCO…

Matapos humupa ang kaguluhan sa Kamara at maituloy na ang pagpapasa sa 2021 national budget, inihayag ng bagong-talagang House Speaker na si Marinduque Representative Lord Allan Velasco na handa niyang gawing deputy house speaker o chairperson ng alinmang komite si Taguig Representative Alan Peter Cayetano.

Sa isang panayam, sinabi ni Velasco na bukas siyang ibigay ang posisyon ng deputy speaker kay Cayetano.

“Yes, of course. He’s (Cayetano) the former speaker and I truly believe that he deserves the position,” saad ni Velasco.

Ang pahayag ni Velasco ay kasunod nang pagpapasa ng Kamara sa third and final reading ng panukalang P4.506trillion national budget.

Ayon pa sa House Speaker, maaari rin umanong maging chairman ng isang congressional committee si Cayetano.

“He can choose either a committee chairmanship or a deputy speaker position,” sabi ni Velasco.

Kung matatandaan, sinabi ni Velasco na nagkaayos na sila ni Cayetano matapos ang kanilang pagpupulong kasama ni Pangulong Rodrigo Duterte nitong nakaraang Martes.

“Like what I said last time during one of my speeches, I said

I’m extending my healing hand to former Speaker Cayetano and I did,” ani Velasco.

Nitong nakaraan lamang, niratipika ng mayorya sa Kamara ang pagkakaluklok kay Velasco bilang House Speaker kung saan ibinoto siya ng 186 na mga kongresista sa Celebrity Sports Plaza sa Quezon City.

Nilinaw rin ni Velasco na walang mangyayaring reorganization sa mga deputy speakers at committee chairmen hanggang sa muling pagbubukas ng sesyon sa susunod na buwan.

Sinabi rin ni Velasco na ang supermajority sa Kamara ay binubuo na ng 286 hanggang 289 na kongresista.

“Sa panahon ngayon, especially sa COVID, kinakailangang iisa kami, isang buo ang Kongreso nang sa gayon ‘yung pagpasa namin ng mga bills ay talagang mapabilis,” saad ni Velasco