IMBESTIGASYON SA SEA GAMES APRUB SA PALASYO
Sang-ayon ang Malacañang sa pagbubukas ng bagong imbestigasyon sa diumanoy katiwalian sa paggamit ng kaban ng bayan sa pagho-host ng 30th Southeast Asian Games.
Sinabi ni Presidential spokesperson Harry Roque nitong Linggo na ipinapaubaya ng Palasyo sa Office of the Ombudsman at House of Representatives ang pag-imbestiga sa anomalya sa nakaraang taong pagho-host ng event partikular ang organizer nitong Philippine Southeast Asian Games Organizing Committee (Phisgoc), kung saan nagsilbing chairman si dating Speaker Alan Peter Cayetano.
Inilutang ng ilang mambabatas sa Mababang Kapulungan ang pagbusisi sa paggastos ng pondo ng gobyerno para sa biennial meet.
Nauna nang ipinahayag nina House Speaker Lord Allan Velasco at Rep. Jose Antonio Sy-Alvarado, mga namumuno sa House Committee on Good Government and Public Accountability, na bukas sila sa pag-imbestiga kung saan napunta ang P6 bilyong pondo may halos isang taon matapos ganapin ang biennial meet sa bansa.
Noong isang taon ay nagbuo ang Office of the Ombudsman (OMB) ng seven-man panel para imbestigahan ang hosting ng Games kabilang ang organizer nitong Phisgoc.
“We welcome this move of the OMB in the same way that we leave the matter to the House of Representatives to conduct an investigation, if need be, on the use of government funds during last year’s SEA Games,” ani Roque.
Binatikos ang nakaraang taong SEA Games dahil sa mga aberyang naranasan ng mga atleta, opsiyal at miyembro ng media sa accreditation, accommodation, pagkain, pasilidad, at transportasyon kung saan humingi ng dispensa ang Phisgoc gayundin ang Malacañang.
Malaking kontrobersya rin ang hinarap ng Phisgoc sa diumanoy overpriced stadium cauldron na nagkakahalaga ng higit P55 milyon.
Ipinag-utos ni Pangulong Rodrigo Duterte noong isang taon na imbestigahan ang mga iregularidad at kapalpakan sa SEA Games hosting ngunit inabswelto naman si Cayetano sa mga bintang ng korapsyon.